Ácido múcico

Ácido múcico
Nome IUPAC Ácido (2S,3R,4S,5R)-2,3,4,5-tetrahidroxihexanodioico
Outros nomes Galactaric acid
Identificadores
Número CAS	526-99-8
PubChem	3037582
Imaxes 3D Jmol	Image 1
SMILES C(C(C(C(=O)O)O)O)(C(C(=O)O)O)O
Propiedades
Fórmula molecular	C6H10O8
Masa molecular	210,1388
Aspecto	Po cristalino
Se non se indica outra cousa, os datos están tomados en condicións estándar de 25 °C e 100 kPa.

O ácido múcico ou ácido galactárico, C₆H₁₀O₈ ou HOOC-(CHOH)₄-COOH, é un azucre ácido aldárico de 6 carbonos, con dous grupos carboxilo (COOH), un en cada extremo da molécula . É un derivado da oxidación da galactosa. Obtense pola oxidación nítrica das seguintes substancias: o azucre do leite (lactosa), a dulcita, a galactosa, a quercita e a maioría das variedades de goma natural . Os sales e ésteres deste ácido denomínanse mucatos (ou galactaratos).

Forma un po cristalino que funde aos 213 °C. É insoluble en alcohol, e practicamente insoluble en auga fría. É opticamente inactivo. Cando se quenta con piridina ata os 140° convértese en ácido alómico. Cando se dixire con ácido clorhídrico fumante convértese en furfural. Se o quentamos con sulfuro de bario transfórmase no ácido carboxílico tiofeno. A destilación seca do seu sal de amonio dá lugar a dióxido de carbono, amoníaco, pirrol e outras substancias. Mesturado con bases cáusticas dá lugar ao ácido oxálico.

Con bisulfato potásico o ácido múcico forma 3-hidroxi-2-pirona por deshidratación e descarboxilación.

Pode utilizarse para substituír o ácido tartárico en axentes levedantes e tabletas de soda. A combinación do ácido múcico con substancias como a morfina e a adrenalina formando mucatos, prolonga os seus efectos .

Reacción do ácido múcico para dar 3-hidroxi-2-pirona con: a) bisulfato potásico a 160°C durante 4 horas; b) ácido clorhídrico ata pH=7.