Casa de Galicia en Valladolid
| Casa de Galicia en Valladolid | |
|---|---|
 | |
| Tipo | asociación |
| Data de fundación | 19 de outubro de 1954 |
| En | Valladolid |
| País | España |
| 41°39′05″N 4°43′15″O / 41.651391666667, -4.7208861111111 | |
| Na rede | |
| https://galiciaenvalladolid.es/ | |
   | |
| [ editar datos en Wikidata ] | |
A Casa de Galicia en Valladolid é unha asociación fundada o 19 de outubro de 1954 por un grupo de galegos e galegas afincados en Valladolid. Creada coa intención de formar unha prolongación da "rexión galega"[1], as súas actividades son de tipo promocional do patrimonio cultural galego. Ademais, son levadas a cabo actividades culturais, benéficas, deportivas e recreativas.
Fundación
[editar | editar a fonte]A fundación da Casa de Galicia de Valladolid foi concibida en base á necesidade de crear unha asociación para reunir a todos os galegos e galegas que vivían en Valladolid. Se xa no ano 1953 saíu á luz na prensa local a idea de unificar esforzos para a creación dunha Casa Galicia en Valladolid, foi definitivamente o 19 de outubro do ano 1954 cando se oficializou a constitución da Casa de Galicia de Valladolid, durante o transcurso dunha cea.
- Directiva fundacional
| Presidente | Luis de Castro García |
| Vicepresidente | Xosé Mosquera Pérez |
| Secretario | Miguel Pérez-Fernández |
| Tesoureiro | Ramón Artiga |
| Contador | César Pérez Aseijo |
| Vogais | Joaquín Fernández, José Mª Ponte Fernández, Amadeo Díaz, Francisco Domínguez Riostra, José Martínez e Germán Coural Castro. |
O ano da súa fundación, a asociación contaba con 180 socios, dos que eran galegos ou galegas o 67%. Estes socios tiñan que abonar 25 pesetas cada mes. A domiciliación da asociación estaba situada na rúa López Gómez nº4.
Organigrama
[editar | editar a fonte]Se a directiva fundacional anteriormente nomeada contaba cun presidente, un vicepresidente, un secretario, un tesoureiro, un contador e varios vogais, as posteriores directivas sufriron algúns cambios. Deste xeito, a directiva de 1998 ampliaba en dous os cargos directivos ao desempeñar Manuel Valeiro Posada o cargo de vicesecretario e Rubén Darío Pérez Melero o de vicetesoureiro. Ademais, destacamos a inclusión dunha muller na directiva (Mª Elena Fernández Sánchez), situación que non se daba na directiva fundacional.
- Directiva de 1998
| Presidente | Antonio Barbosa Fernández |
| Vicepresidente | Raúl Jorge Ojea Feijóo |
| Secretaria | Mª Elena Fernández Sánchez |
| Vicesecretario | Manuel Valeiro Posada |
| Tesoureiro | Julio Enrique L. Robles |
| Vicetesoureiro | Rubén Darío Pérez Melero |
| Contador | Juan Ayala Gemedo |
| Vogais | Francisco Villares Ortuño, José Mª Pérez Sanjurjo, Fernando Guerra Velasco, Rafael Vallejo Paz e Manuel Fernández Ruíz |
Outro dos cambios significativos no organigrama interno foi levado a cabo no ano 2000. Mentres que se mantén a recente modificación de 1998 sobre os cargos de vicesecretario e vicetesoureiro, algúns vogais pasan a ter designacións específicas sobre determinados temas ou ámbitos. Polo tanto, en lugar de seren todos chamados vogais, créase o vocal de cultura, o de turismo, o de mantenimiento, o de juventud e o de folclore. A directiva de 2000 estaba formada polos mesmos integrantes que a de 1998, mais coa inclusión de Juan Antonio Morandeira como vogal de folclore.
Evolución histórica
[editar | editar a fonte]A partir do ano fundacional, a Casa Galicia de Valladolid foi aumentando en tamaño e importancia. Aínda así, é a partir dos anos 70 o momento de maior actividade en todos os sentidos. A asociación é trasladada á Praza Leones de Castilla, nº10, 1º en febreiro de 1970 e en 1974 conta con edificio social en propiedade. Esta sede social posúe dous andares, baixo e patio. Estas instalacións están formadas por un bar, un restaurante, salóns ambientados con equipo musical e TV, biblioteca e un patio exterior. O bar e o restaurante están abertos a todo o público, lugares onde todo o mundo pode degustar a gastronomía tradicional galega.
A Casa Galicia de Valladolid foi evolucionando paulatinamente até conseguir a concesión da personalidade xurídica o 29 de novembro de 1978 en pleno auxe de crecemento. De feito, o ano anterior, en 1977, a asociación acadou o maior número de socios histórico con 412 membros. Outro dato importante é que o seu crecemento non truncou a participación de galegos e galegas posto que, se en 1988 existían 273 socios, 119 eran galegos ou galegas e 24 descendentes directos. Unha situación similar tivo lugar en 1991, ano en que de 300 socios, 205 eran galegos ou galegas e 55 descendentes directos. Tamén en 1998, cando de 350 socios, 225 eran galegos ou galegas (un 65%). Porén, non foi só o número de socios o que aumentou, senón tamén a cota destes. Se no ano fundacional apuntamos a cifra de 25 ptas./mes, en 1988 serían 500 ptas./mes e en 1998 750 ptas./mes. Na actualidade, a asociación trasladouse á Praza Colegio de Santa Cruz nº4.
Actividades culturais
[editar | editar a fonte]As actividades culturais[2] da Casa Galicia de Valladolid representan os asuntos centrais da cultura galega e os máis recorrentes. En consecuencia, entre elas atópanse cursos de galego (tanto de reforzo para galegos e galegas como para persoas que descoñecen a lingua), grupos de baile tanto de adultos como de nenos, grupos de música, un grupo coral e a publicación da revista Abrente.
Os cursos de galego comezaron en 1986 con periodicidade anual. Realizáronse 6 cursos[3] cun número medio de 40 alumnos por curso.
O grupo de baile de adultos recibiu o nome de "Axousere"[4] e fundouse en 1979. Formado por 30 compoñentes, en 1998 a súa directora era Esther Domínguez Calleja.
O grupo de baile formado por nenos recibiu o nome de "Anaquiños" e fundouse en 1977. Formado por 10 compoñentes, en 1998 a súa directora era Esther Domínguez Calleja.
O grupo de música da asociación é o grupo "Nivaria", formado por 22 músicos. O seu director en 1998 era César Mayorga Muñoz.
O grupo coral "Casa de Galicia" está formado por 22 membros. A súa directora en 1998 era Mari Luz Abia Cuadrado.
Ademais destas actividades culturais, a Casa de Galicia de Valladolid tamén celebra a Semana do Día das Letras Galegas, unha Semana cultural anual en que se celebran conferencias, concursos de fotografía, pintura, certames literarios, etc. Tamén realizan excursións a Galicia e, como xa comentamos anteriormente, posúen unha biblioteca que contaba en 1998 cun fondo aproximado de 2500 exemplares.
Outras actividades
[editar | editar a fonte]Ademais das actividades culturais, a asociación leva a cabo actividades recreativas, deportivas e sociais. Entre as recreativas, destacan a conmemoración de festas galegas como o Entroido, o Día de Santiago Apóstolo ou o Magosto. Dende a asociación practícase fútbol sala e baloncesto feminino, con 22 participantes en cada modalidade. Por último, tamén participan no ámbito social con donativos á Asociación Española contra o Cancro e apoian economicamente a persoas sen medios, especialmente para regresaren a Galicia.
Notas
[editar | editar a fonte]- ↑ Extraído literalmente do libro de Sixirei.
- ↑ Os datos que se presentan en toda a entrada como actuais están extraídos do libro de Sixirei e, en consecuencia, representan as cifras do ano 2000.
- ↑ Recordamos que os datos son os que presenta o libro de Sixirei.
- ↑ O nome é un desvío da norma da Real Academia Galega (RAG).
Véxase tamén
[editar | editar a fonte]Bibliografía
[editar | editar a fonte]- Cañada, Silverio (1974). Gran Enciclopedia Galega Silverio Cañada. Gijón.[cómpre nº de páxina]
- Santos Gayoso, Enrique (1990). Historia de la prensa gallega 1800-1986. Cuadernos do Seminario de Sargadelos (en castelán) 52. Sada: Ediciós do Castro. ISBN 84-7492-489-8.
- Sixirei Paredes, Carlos (2001). Asociacionismo galego no exterior, Tomo II (PDF). Xunta de Galicia.[cómpre nº de páxina]