Dario Rigo

Dario Rigo

Biografía
Nacemento	1 de abril de 1970 (54 anos) Valdagno, Italia (pt)
Altura	183 cm
Peso	77 kg
Actividade
Ocupación	xogador de hóckey a patíns, futbolista
Deporte	hóckey a patíns
Posición de xogo	Defensa
Premios
Colar de Ouro ao Mérito Deportivo

Dario Rigo, nado o 1 de abril de 1970 en Trissino, Vicenza (Italia), é un ex-xogador de hóckey a patíns italiano que xogaba de defensa. Destacou especialmente no Hockey Novara, club no que xogou en tres etapas e co que gañou 11 títulos. Internacional coa selección italiana, conquistou con esta o Campionato do Mundo de 1997 e o Campionato de Europa de 1990.

Traxectoria

Dario Rigo comezou a súa carreira como xogador de hóckey a patíns no equipo da súa cidade natal, o GSH Trissino, equipo no que xogou entre 1987 e 1991, ano no que asinou polo Hockey Novara. Estando no seu primeiro club conseguiu a medalla de ouro no Campionato de Europa celebrado en 1990 na localidade italiana de Lodi. Co Novara gañou unha Liga e unha Copa de Italia na súa última tempada (1992-93) e dúas Copas CERS consecutivas. Xogando no Hóckey Novara conseguiu coa selección italiana as medallas de prata no Campionato de Europa de Wuppertal (1992) e o Campionato do Mundo de Sesto San Giovanni (1993), ademais conseguiu a medalla de bronce nas Olimpiadas de Barcelona 1992.

Entre 1993 e 1996 xogou no Roller Monza, gañando unha Liga no seu último ano e unha Recopa de Europa o ano anterior, á vez gañaba as medallas de prata e bronce nos Campionatos de Europa de 1994 e 1996. En 1996 volveu a Novara, nesta segunda etapa no club piemontés gañou dúas Ligas e dúas copas de xeito consecutivo nos dous anos que xogou no club, e coa súa selección conseguiu as medallas de ouro no Mundial de 1997 e de bronce no Europeo de 1998. Na tempada 1998-99 pasou a xogar no Amatori Vercelli, e ao ano seguinte asinou polo H.C. Liceo da Coruña, converténdose no primeiro e único italiano na historia do club. No ano 2000 gañou coa selección o bronce no Europeo de Wimmis.

Na tempada 2000-01 iniciou a súa terceira etapa no Hockey Novara, equipo no que xogou ata o 2002, ano da súa fichaxe polo Bassano 54. Nesta terceira etapa conseguiu novamente dous dobretes consecutivos e dous bronces coa súa selección no Mundial do 2001 e no Europeo do 2002. En Bassano xogou ata a tempada 2007-08, no Bassano 54 gañou unha Liga (2003-04) e unha Copa (2004), foi na súa etapa en Bassano na última que conseguiu medallas coa súa selección, foron no Mundial do 2003 e no Europeo do 2004. Actualmente xoga no Hockey Valdagno, club polo que asinou no 2008 e co que na tempada 2009-10 gañou a Liga italiana.

Palmarés

Clubs

Hockey Novara

• 4 Ligas italianas Serie A1: 1997, 1998, 2001 e 2002
• 4 Copas de Italia: 1997, 1998, 2001 e 2002
• 1 Copa da Liga: 2001
• 2 Copa CERS: 1992 e 1993

Roller Monza

• 1 Liga italiana Serie A1: 1996
• 1 Recopa de Europa: 1995

Bassano 54

• 1 Liga italiana Serie A1: 2004
• 1 Copa de Italia: 2004

Hockey Valdagno

• 1 Liga italiana Serie A1: 2010

Selección italina

• 1 Campionato do Mundo: 1997
  • 2 pratas: 1993 e 2003
  • 1 bronce: 2001
• 1 Campionato de Europa: 1990
  • 3 pratas: 1992, 1996 e 2004
  • 4 bronces: 1994, 1998, 2000 e 2002