Edicións Celta
| Edicións Celta | |
|---|---|
| Tipo | editorial |
| Data de fundación | 1938 |
| Sede | Lugo |
| País | Galicia |
| [ editar datos en Wikidata ] | |
 | Este artigo contén varias ligazóns externas e/ou bibliografía ao fin da páxina, mais poucas ou ningunha referencia no corpo do texto. Por favor, mellora o artigo introducindo notas ao pé, citando as fontes. Podes ver exemplos de como se fai nestes artigos. |
Edicións Celta é unha empresa editorial fundada en Lugo en 1938. Publicou libros en galego e castelán, tanto de narrativa como de poesía. Entre os autores que colaboraron no proxecto editorial cómpre salientar a Castelao, Xosé Neira Vilas, Manuel María e Xesús Alonso Montero.
Historia e características
[editar | editar a fonte]Edicións Celta foi creada en Lugo inicialmente como imprenta en 1938 por Francisco Esteban González, quen tamén tivo unha librería co mesmo nome. Esta empresa comezou a editar ao ano seguinte, 1939, o seu primeiro título El correo de los enamorados, de Adela Díaz González.
Carácter editorial
[editar | editar a fonte]Edicións Celta mantivo un papel de referente pola difusión da cultura galega durante o Franquismo. A súa primeira publicación en galego foi Contos en cuarto crecente e outras prosas de Manuel María en 1952.
Aínda sen ter unha liña editorial claramente definida, tivo un meritorio labor na visualización dalgúns autores galegos, algúns deles (como o caso de Manuel María) sen posibilidade real de publicar noutras editoriais.
Tipo de publicacións
[editar | editar a fonte]Presentou un dos best-séller da época: Supersticiones de Galicia y preocupaciones vulgares, de Xesús Rodríguez López (5 edicións), varios poemarios de Manuel María e publicacións técnicas, como os manuais de tráfico e os textos de diferentes leis e decretos do estado, que son os que axudarían a manter unha actividade editorial que chegou aos 144 títulos no período 1939-1975
Década dos 50
[editar | editar a fonte]A editorial continuou coas súas publicacións lexislativas, e foi engadindo títulos de interese como Contribución ao estudo das fontes literarias de Rosalía, de Carballo Calero en 1959. Editou tamén outro tipo de publicacións, do tipo dos almanaques e guías turísticas, como a da propia cidade de Lugo tamén en 1959
1960-61
[editar | editar a fonte]No curso dos anos 1960-61 chegou a Lugo como catedrático de Literatura do Instituto Masculino Xesús Alonso Montero, e a Libraría e Editora Celta converteuse nun dos seus centros de acción. En Edicións Celta non había director, nin consello asesor (eran o propietario, Francisco Esteban e o seu fillo Paulino, os que se ocupaban de todo), mais foi evidente que Alonso Montero exerceu de asesor, ou case de director, nos anos que pasou na cidade (1960-1976).
Títulos importantes
[editar | editar a fonte]En 1962, Alonso Montero encargouse da publicación, cun limiar seu, da segunda edición de Retrincos de Castelao, con gravados de Maside. Ao ano seguinte (1963), Alonso Montero publicou na editora o seu primeiro libro lucense, La palabra en la realidad, e foi o editor literario e responsábel da aparición doutras moitas obras: Textos literarios sobre Lugo y su provincia (1963), O clero i-o uso do idioma galego, de Xosé Alvilares Moure (1965), e a Conferencia de Castelao na Habana, Galicia y Valle-Inclán (1971). En 1969 publicou unha das súas obras máis vendidas, Os cen mellores poemas da lingua galega, unha antoloxía que tivo moi boa acollida de público e chegou ás catro edicións en 1975. Por iniciativa de Alonso Montero xurdiu a publicación das Prosas recuperadas de Castelao en 1974.
Os autores
[editar | editar a fonte]Podemos salientar algunhas das obras dos autores mencionados como colaboradores do proxecto editorial:
- La palabra en la realidad, Xesús Alonso Montero, 1963.
- Terra Cha, Manuel María, 1954, 3ª ed. 1972.
- Espantallo amigo, Xosé Neira Vilas, 1971.
- Retrincos, Alfonso Daniel R. Castelao, 1962, 4ª ed. 1971.
Manuel María publicou tamén en Celta:
- Documentos persoaes, 1958 (2ª ed. en 1970).
- Libro de pregos, 1962, ano en que tamén sairá na editorial lucense unha 2ª edición corrixida e aumentada de Contos en cuarto crecente.
- Os soños na gaiola, que foi inicialmente publicado en 1968 por Cartonaxes Anmi, é reeditado por Celta en 1972, xa como edición comercial.
Véxase tamén
[editar | editar a fonte]Outros artigos
[editar | editar a fonte]Bibliografía
[editar | editar a fonte]- Enciclopedia Galega Universal. Vigo, Ir Indo, 1999- [cómpre nº de páxina]
- "Edicións Celta" en Diccionario Enciclopédico Galego Universal, t. 23, p. 61.
- Rodríguez Iglesias, Francisco (ed.): Galicia. Literatura. A Coruña, Hércules de Edicións, 2000- (6 vols.) [cómpre nº de páxina]
- "CELTA, Edicións" en Gran Enciclopedia Galega Silverio Cañada.
- Vilavedra, Dolores (coord.): Diccionario da Literatura Galega, Vigo, Galaxia, 1995-2003 (4 vols.) [cómpre nº de páxina]