DÚAS PONTES FUNDIDAS A actual ponte sobre o río Navea é o resultado dunha construción medieval reaproveitando unha obra anterior, aínda que a fábrica romana é recoñecible en moitos aspectos (estrivos, aparello construtivo, etc). A primitiva ponte sería moito máis ancha que a medieval (7,60 metros fronte aos 3,60 actuais) e tamén variaría a sua estrutura na que poderían existir dous arcos.

A VÍA A vía romana (Via Nova ou Via XVIII segundo o itinerario antonino) descendía dende o Alto da Cerdeira ata este lugar, onde atravesaba o río Navea e onde se atoparon multitude de restos romanos. Entre eles cóntase o Miliario de Tito e Domiciano, coa inscrición VIA NOVA AB ASTURICA, que nos indica que a partir deste punto as distancias eran contadas dende Astorga. Tamén contamos con dúas lápidas votivas adicadas a Aelio Sporo e a Popilius Hirsutus.

ARA DE VILANOVA A ara votiva de Vilanova, atopada en 1969 detrás do altar e retablo da igrexa parroquial, é un bloque cúbico de granito toscamente labrado e coa seguinte inscrición:

SEVERVUS FL / AVINI FIL(ius) / IOVI OP(timo) MA(ximo) / V(otum) L(ibens) S(olvit) M(erito)