Colo volcánico

O pico Cão Grande, colo volcánico na illa de São Tomé (San Tomé e Príncipe), que se eleva máis de 300 m sobre os arredores.

A Torre do Demo está formada por unha antiga cheminea volcánica onde o arrefriamento da lava deu orixe á aparición de columnas basálticas.

Capela de Saint Michel d'Aiguilhe, cuxa construción se iniciou en 969, preto de Le Puy-en-Velay en Francia. O colo volcánico elévase uns 85 m por riba dos arredores.

Un colo volcánico, pitón volcánico ou neck é unha forma do relevo de forma máis ou menos cilíndrica de orixe volcánica que se crea cando a lava endurece dentro dun conduto de alimentación dun volcán por onde ascende a lava, e despois o volcán é erosionado. A súa estrutura é resistente á erosión, polo que unha vez que o cono volcánico se erosiona, este colo permanece como unha agulla ou columna relicta do cono desaparecido. Frecuentemente é o único resto que queda dunha antiga cheminea volcánica.

Non se deben confundir os colos volcánicos cos tapóns volcánicos que aparecen nalgúns volcáns activos e non erosionados, como é frecuente nos de tipo peleano, que teñen un tapón que tapa o cráter, que pode ser agudo (tipo pitón) ou abovedado (domo volcánico). Cando estes volcáns fan erupción a presión interior pode facer rebentar este tapón orixinando unha erupción na que se forman grandes nubes de piroclastos.

Exemplos notables

A Torre do Demo, en Wyoming (Estados Unidos) é, probablemente, o exemplo máis característico e ben conservado dun neck ou colo volcánico e, ao estar formado por basalto, ten grandes columnas basálticas.

Nos arredores de Rhumsiki, no Camerún, hai varias decenas de colos volcánicos.

O castelo de Edimburgo está asentado sobre un colo volcánico, coñecido como Castle Rock (rocha do castelo).

• 
  O castelo de Edimburgo, Escocia, aséntase sobre un colo volcánico, coñecido como Castle Rock.
• 
  Colo volcánico no Bosque Nacional de Ochoco de Oregón, EUA
• 
  Fortaleza da Rocha Sigiriya, Sri Lanka.
• 
  O Petit Piton en Santa Lucía, parte dun sitio que é Patrimonio Mundial da UNESCO.
• 
  Castelo Trosky (Torre "Panna"), República Checa.
• 
  Taung Kalat, Birmania.
• 
  Colo volcánico preto de Rhumsiki, Camerún.
• 
  O Roque Nublo, símbolo da illa de Gran Canaria.
• 
  Dent de la Rancune, un sitio de escalada famoso na Cadea dos Puys, Francia.