A guerra do tabaco
| A guerra do tabaco | |
|---|---|
| Título orixinal | A guerra do tabaco |
| Autor/a | Carlos González Reigosa |
| Cuberta | Vilar Cardona |
| Orixe | Galiza |
| Lingua | galego |
| Colección | Colección Negra |
| Tema(s) | Contrabando |
| Xénero(s) | Novela policíaca |
| Editorial | Edicións Xerais |
| Data de pub. | 1996 |
| Formato | 14,5 x 22 cm. edición rústica cosida a fío |
| Páxinas | 226 |
| ISBN | ISBN 978-84-8302-061-0 |
| Precedido por | O misterio do barco perdido |
| Seguido por | Narcos |
| [ editar datos en Wikidata ] | |
A guerra do tabaco é unha novela de Carlos González Reigosa, publicada en 1996. É a terceira entrega da saga do detective Nivardo Castro xunto co xornalista Carlos Conde.
Trama
[editar | editar a fonte]A obra narra unha guerra entre varios narcotraficantes galegos, na época do paso do contrabando de tabaco ao tráfico de haxix e cocaína.
Orlando é un xefe dun clan contrabandista da ría de Arousa. Leva tempo no negocio, no que comezara xunto a Plácido, outro patriarca do seu propio clan. Nos últimos anos apareceron outros dous clans na zona, o dos irmáns Mingallo e o de Roque Caruncho, que tamén trafican con outras drogas, mais non hai problemas entre eles.
Preto da Costa da Morte comeza a operar un novo contrabandista, Alberte Cuñal, que no canto de con Winston trafica con Marlboro. Orlando provoca unha guerra entre clans para recuperar o liderado no negocio, mais faille entender aos clans da súa área que a guerra é culpa do inimigo común e que hai un traidor entre eles. Hai un morto por cada clan da ría de Arousa, e o home de confianza de Orlando sofre un atentado que silencian como se fose un accidente de tráfico para ocultar que ía no coche con dúas prostitutas portuguesas.
O xornalista Carlos Conde está a investigar o contrabando en Galicia, e conta coa colaboración de Agapito Landín, tenente da Garda Civil e de Desiderio Monelo, policía nacional. Amais pídelle axuda a Nivardo Castro, un detective amigo seu, e a Franco Franzini, un coñecido seu italiano que se fai pasar por membro da Mafia de Nápoles, a camorra.
Logo de investigaren por Ámsterdam, Vila Real e a costa galega, o detective e o xornalista vense implicados no caso, sendo usados por Alberte Cuñal como cebo para poder matar a Orlando. Finalmente, os dous líderes son apreixados.
Traducións
[editar | editar a fonte]- Ao castelán polo propio autor co título de La guerra del tabaco publicado en 2000 por Plaza&Janés Editores[1].
Notas
[editar | editar a fonte]- ↑ Ficha Arquivado 27 de marzo de 2018 en Wayback Machine. en BiTraGa.
Véxase tamén
[editar | editar a fonte]Ligazóns externas
[editar | editar a fonte]- Ficha na web da editorial.
