Aquiropsétidos

A dos Aquiropsétidos (Achiropsettidae) é unha pequena familia de peixes osteíctios da orde dos pleuronectiformes e suborde dos pleuronectoideos que abrangue unhas poucas especies distribuídas por augas antárticas e subantárticas.

Etimoloxía

O nome científico Achiropsettidae está formado pola raíz do termo grego antigo άχειρος ácheiros, "sen mans" (de α- a- elemento privativo, e χείρ cheír, "man"), o elemento -psett-, do nome científio Psetta ("rodaballo"), e a desinencia ´-idae, propia dos nomes das familias de animais. Literalmente: "os rodaballos mancos", aludindo á brevidade ou ausencia das aletas pectoriais destes peixes.

Características

As peincipais caracaterístiocas morfolóxicas destes peixes son:

• Corpo moi deprimido.
• Boca terminal, con ambas as mandíbulas prominentes.
• Son peixes planos sinistros, é dicir, ambos os ollos están situados no lado esquerdo da cabeza.
• A aleta caudal está separada das [àleta|aletas dorsal e anal.
• As aletas pectorais son rudimentarias ou están ausentes.
• Ningunha das aletas ten raios espiñosois.
• A liña lateral é recta está ben desenvolvida.
• O tamaño dos peixes desta familia varía considerabelmente, desde o 11 cm de Pseudomancopsetta andriashevi até os 57 cm de Neoachiropsetta milfordi.
• Pouco se sabe dos hábitos das especies desta familia.

Hábitat e distribución xeográfica

As especies desta familia son bentónicas, e distribúense por augas antárticas e subantárticas.

Clasificación

Segundo o WoRMS e a FishBase a familia comprende tan só catro xéneros monoespecífiocos:

Familia Achiropsettidae

• Xénero Achiropsetta (Norman, 1930)
  • Achiropsetta tricholepis (Norman, 1930)
• Xénero Mancopsetta (Gill, 1881)
  • Mancopsetta maculata (Günther, 1880)
    • Mancopsetta maculata antarctica (Kotlyar, 1978) - Rapapelos manco o Antártico.
    • Mancopsetta maculata maculata (Günther, 1880)
• xénero Neoachiropsetta (Kotlyar, 1978)
  • Neoachiropsetta milfordi (Penrith, 1965)
• Xénero Pseudomancopsetta (Evseenko, 1984)
  • Pseudomancopsetta andriashevi (Evseenko, 1984)

Véxase tamén

Bibliografía

• Lahuerta Mouriño, Fernando e Francisco X. Vázquez Álvarez (2000): Vocabulario multilingüe de organismos acuáticos. Santiago: Xunta de Galicia / Termigal. ISBN 84-453-2913-8.
• Nelson, Joseph S. (2006): Fishes of the World. Nova York: John Wiley & Sons, Inc. ISBN 978-0-471-25031-7.
• van der Laan, R.; W. N. Eschmeyer & R. Fricke (2014): "Family-group names of Recent fishes". Zootaxa Monograph 3882 (1): 1-230.

Outros artigos

• Teleósteos
• Pleuronectiformes

Ligazóns externas

• Achiropsettidae no SIIT.
• Achiropsettidae no ADW.
• Achiropsettidae Arquivado 13 de xuño de 2015 en Wayback Machine. na EOL.