Adolphe Delessert
| Biografía | |
|---|---|
| Nacemento | 15 de setembro de 1809 Cossonay, Vaud |
| Morte | 6 de abril 1869 Saint-Barthélemy, Vaud |
| País de nacionalidade | francesa |
| Actividade | |
| Ocupación | explorador, naturalista, ornitólogo |
| Familia | |
| Familia | Famille Delessert (en)   |
Adolphe Delessert, nado o 15 de setembro de 1809 en Cossonay, Vaud (Suíza), e finado o 6 de abril 1869 en Saint-Barthelemy, Vaud (Suíza), foi un explorador e naturalista francés.
Traxectoria
[editar | editar a fonte]Decidiu marchar de Francia para estudar as plantas do sueste asiático, e saíu de Nantes o 24 de abril de 1834 cun amigo, George Samuel Perrottet, fixo escala na illa de Madeira e nas illas Canarias, e chegou o 15 de xullo á illa de Francia (hoxe Mauricio). Comezou o seu traballo nas Mascareñas e logo foi a Pondicherry.
A finais de ano embarcou para as Indias Orientais Neerlandesas, fixo escala en Penang, no estreito de Malaca e despois en Malaca. Despois marchou a Singapur, e chegou a Batavia o 27 de xaneiro de 1835 despois de ter que enfrontarse a un terrible tifón.
De volta en Pondicherry, enviou as súas coleccións de historia natural a Francia. Despois visitou Madrás e cazou nos seus arredores.
En 1836 Delessert permaneceu gran parte do ano na illa Bourbon (hoxe Reunión), e despois, en xaneiro de 1837 embarcou cara a Bengala. Despois visitou Calcuta onde coñeceu a Charles Gaudichaud-Beaupré.
De novo en Pondicherry en 1838, visitou as montañas Nilgiri e multiplicou as súas herborizacións. Tamén fixo alí observacións meteorolóxicas que comunicou á Sociedade Asiática de Calcuta. Descansando en Calcuta, chegou a Mahé, Cananor, Goa e Bombai pola costa de Malabar. Saíu definitivamente da India o 25 de febreiro de 1839, e marchou a Adén, regresando despois a París o 30 de abril.
Trouxo das súas viaxes numerosas coleccións de mamíferos, aves, réptiles, peixes, insectos, cunchas, plantas e minerais.
Abreviatura
[editar | editar a fonte]A abreviatura Delessert emprégase para recoñecer a Adolphe Delessert como autoridade na descrición e taxonomía en zooloxía.
