Albert Henry Vestal

Albert Henry Vestal

Biografía
Nacemento	18 de xaneiro de 1875 Indiana, Estados Unidos de América
Morte	1 de abril de 1932 (57 anos)
Membro da Cámara de Representantes dos Estados Unidos
Datos persoais
Educación	Valparaiso University (en) Indiana State University (en)
Actividade
Lugar de traballo	Washington, D.C.
Ocupación	político, avogado
Partido político	Partido Republicano

Albert Henry Vestal, nado en Frankton, Indiana, o 18 de xaneiro de 1875 e finado en Washington o 1 de abril de 1932, foi un xurista e político republicano estadounidense, membro da Cámara de Representantes por Indiana e presidente da Comisión de Moeda, Pesos e Medidas, e da Comisión de Patentes.

Traxectoria

Primeiros anos e formación

Albert Henry naceu nunha granxa próxima a Frankton, no condado de Madison, Indiana, o 18 de xaneiro de 1875, un dos oito fillos de Mary Jackson (1833-1916) e de William Vestal (1835-1907).

A súa nai proviña dunha familia de orixe escocesa e irlandesa. O seu pai, de relixión metodista e descendente dunha familia inglesa á que tamén pertencera o líder confederado Stonewall Jachson era un granxeiro que se instalara en Frankton en 1872.

A infancia de Albert H. Vestal transcorreu no ambiente dos traballos propios dunha explotación agraria. Asistiu á escola pública no municipio de Pipe Creek e con só dezaseis anos desprazouse ao condado de Nemaha, en Nebraska onde comezou a exercer a docencia.

Logo volveu á súa casa familiar e iniciou a súa formación superior, primeiro na Universidade Estatal de Indiana, en Terre Haute, e despois na Escola Normal Nacional de Valparaíso, Indiana —que logo pasou a ser a Valparaiso University—. Alí compaxinou os seus estudos co exercicio da docencia ata que en 1896 acadou a súa licenciatura en Dereito.

Carreira pública

O mesmo ano da súa licenciatura ingresou no Colexio de Avogados e comezou o exercicio da profesión en Franckton, Indiana, que seguía a compaxinar coa docencia. Logo dun curto período traballando no despacho de Wood & Ellis, constituíu a súa propia sociedade con James M. Farlow.

Vestal foi elixido fiscal do condado de Madison, con apoio republicano, e exerceu ese cargo entre 1900 e 1906. Tras deixar a fiscalía, retomou o exercicio da avogacía en Anderson, no despacho Vestal & Van Nuys.

Vestal co tamén representante republicano C. J. McLeod, no exterior do Capitolio, en 1926.

A súa carreira política comezou en 1908, cando se postulou para figurar nas listas republicanas ao Congreso, aínda que sen éxito. En 1914 chegou a figurar na candidatura, aínda que non saíu elixino. Nas eleccións de 1916 conseguiu resultar elixido como representante republicano; foi nomeado o 4 de marzo de 1917 e seguiu sendo elixido sucesivamente ata a súa morte en 1932.

Durante esta etapa presidiu a Comisión de Moeda, Pesas e Medidas entre 1919 e 1925, e a Comisión de Patentes de 1925 a 1931. Tamén foi o voceiro da maioría na Cámara entre 1923 e 1932.

Vida persoal

Vestal casou o 15 de setembro de 1895 en Penniville, Indiana, con Madge Horn, con quen tivo dous fillos, chamados Vivian e Ralph. Logo do falecemento da súa esposa o 5 de agosto de 1899, Vestal casou en segundas nupcias o 8 de xaneiro de 1903, en Anderson, con Hulda Maude Malone (1879-1951).

Albert Henry Vestal finou en Washington o 1 de abril de 1932, e o seu corpo foi soterrado no cemiterio East Maplewood de Anderson, Indiana.

Véxase tamén

Bibliografía

• Beers, J. H. (1908). Commemorative biographical record of prominent and representative men of Indianapolis and vicinity. Beers, Chicago. 1908. Páxinas 760-761
• Brandon, R. H. (1908). Who is Who in Anderson. Anderson.

Outros artigos

• Cámara de Representantes dos Estados Unidos
• Comisión de Moeda, Pesos e Medidas da Cámara de Representantes dos Estados Unidos