Bandeira da dinastía Qing

Bandeira da dinastía Qing
Características
Uso	...
Proporción	2:3
Adopción	1889-12 de febreiro de 1912
Cores	Dourado      Vermello      Branco      Azul

A bandeira da dinastía Qing foi o símbolo adoptado a finais do século XIX pola dinastía Qing, a derradeira dinastía imperial chinesa, que gobernou o país até 1912. Componse dun dragón azul sobre un fondo amarelo cunha perla vermella no recuncho superior esquerdo. Converteuse na bandeira nacional da China e adóitase denominar como a "bandeira do dragón amarelo" (chinés: 黄龙旗; trad. 黃龍旗; pinyin huánglóngqí).

Gobernando a China dende 1644 ata o derrocamento da monarquía durante a Revolución Xinhai, a dinastía Qing foi a derradeira dinastía imperial na historia chinesa. Entre 1862 e 1912, a dinastía representouse coa bandeira do dragón.

O 10 de xaneiro de 1912, a bandeira do dragón amarelo foi substituída pola bandeira de cinco cores e o 12 de febreiro o emperador Pu Yi abdicou, poñendo fin ao goberno da dinastía Qing.

Deseño

Dende a dinastía Ming, o amarelo foi considerado a cor real dos sucesivos emperadores chineses. Os membros da familia imperial da China naquela época eran os únicos aos que se lles permitía amosar a cor amarela nos edificios e nas pezas de roupa. O emperador da China adoitaba usar un dragón chinés como símbolo do poder e da forza imperial. Xeralmente, un dragón de cinco garras era usado só polos emperadores.

Na cultura da China, unha perla en chamas móstrase encima da cabeza do dragón. A perla está asociada coa riqueza, a boa sorte e a prosperidade.

O deseño da bandeira baseouse en gran parte no Bandeira Amarela Simple, unha das tres bandeiras superiores do exército entre as Oito Bandeiras baixo o mando directo do propio Emperador da China, e unha das catro bandeiras de "á dereita".

As Oito Bandeiras

As Oito Bandeiras eran divisións administrativas/militares baixo a dinastía Qing nas que estaban todas as familias manchús. Na guerra, as Oito Bandeiras funcionaban como exércitos, pero o sistema de bandeiras tamén era o marco organizativo básico de toda a sociedade manchú.

• 
  Bandeira Amarela Simple
• 
  Bandeira Amarela con Bordado
• 
  Bandeira Branca Simple
• 
  Bandeira Branca con Bordado

• 
  Bandeira Vermella Simple
• 
  Bandeira Vermella con Bordado
• 
  Bandeira Azul Simple
• 
  Bandeira Azul con Bordado, 1911 -1912

Versión triangular (1862–1889)

A bandeira triangular exhibida no Museo Nacional de Mongolia.

O incidente de Arrow de 1856 ocorreu como resultado de que os buques civís chineses ondeaban bandeiras estranxeiras xa que a dinastía Qing non tiña bandeira oficial naquel momento. En 1862, os mariñeiros das frotas chinesa e británica enfrontáronse en Wuhan no río Yangtze. En resposta ás protestas do Goberno británico de que os seus barcos eran incapaces de distinguir correctamente entre os buques da armada chinesa e os buques civís, Yixin (Príncipe Gong) instou a Zeng Guofan a crear unha bandeira gobernamental para os Qing, e suxeriu o uso dunha bandeira de dragón amarela, que tamén foi usada como unha das Oito Bandeiras dos manchús, así como no exército chinés. Despois da debida consideración, Zeng Guofan concluíu que unha bandeira cadrada imitaba demasiado coa bandeira amarela lisa das Oito bandeiras, co potencial de ser vista como un respaldo á xerarquía das Oito bandeiras; polo tanto eliminou unha esquina para crear unha bandeira triangular.

A versión triangular da bandeira amarela do dragón estaba restrinxida só ao uso naval e gobernamental, a ningún barco civil tiña permitido ondear o banderín amarelo e nunca se converteu formalmente na bandeira nacional. Unha excepción foi o 23 de febreiro de 1873, cando rematou a rexencia do Emperador Tongzhi e este asumiu o goberno directo do imperio Qing. Ese día todos os barcos ondearon a bandeira triangular por primeira vez como celebración. Tamén nalgunhas ocasións diplomáticas e en exposicións internacionais, esta bandeira foi utilizada para representar a China.

Versión rectangular (1889–1912)

Unha introdución ás bandeiras nacionais en 1899.

Imaxe dunha batalla da revolución de 1911; a bandeira Qing é visible á esquerda.

En setembro de 1881, cando os dous cruceiros Chaoyong e o Yangwei encargados a Birkenhead, Inglaterra foron enviados á China, Li Hongzhang decatouse de que a bandeira triangular era única entre as bandeiras navais doutros países. Como resultado, solicitou permiso á Corte Imperial e posteriormente cambiou a bandeira naval triangular nunha rectangular.

Ao ver os países occidentais ondear bandeiras nacionais en ocasións oficiais, Li Hongzhang tamén pediu á Emperatriz viúva Cixi que elixise unha bandeira nacional para a dinastía Qing. Entre as propostas de uso da bandeira Ba gua, a bandeira do dragón amarelo e a bandeira Qilin, Cixi seleccionou o deseño do dragón amarelo. En 1888, a corte imperial promulgou a bandeira naval como bandeira nacional Qing.

Influencia

O Palacio do Dalai Lama en Lhasa (Tíbet). Esta é unha tarxeta de coleccionista da serie 71, "Scenes From Around the World - Midday in Berlin", tarxeta #5/12. Bandeira do Dragón Amarelo, na parte superior dereita.

Outra bandeira da dinastía Qing.

Outra bandeira triangular da dinastía Qing

Unha réplica do Dingyuan, buque insignia da frota de Pequín coa bandeira Qing en 2012.

A noción do amarelo como representación da etnia manchú utilizouse nas bandeiras das cinco razas baixo unha unión, da República da China, e do Imperio da China, aínda que en 1912 este concepto foi desafiado por Sun Yat-sen, quen considerou inadecuado utilizar a cor imperial tradicional para representar a etnia manchú. Ademais, o amarelo mostaza foi usado na bandeira de Manchukuo en deferencia á dinastía Qing, en cuxa bandeira estaba baseada.

O dragón azul apareceu no emblema nacional dos doce símbolos, que foi o emblema estatal da China de 1913 a 1928.