Bonloc

Bonloc
	Bonloc (fr); Lekuine (eu)
Localización
	43°22′07″N 1°16′00″O / 43.3686, -1.2667
Estado	Francia
Divisións administrativas	Francia Metropolitana
Rexións	Aquitania-Lemosín-Poitou-Charentes
Departamento	Pireneos Atlánticos
Distritos	arrondissement of Bayonne (en)
Cantón	canton of Hasparren (en)
Poboación
Poboación	367 (2021) (359,8 hab./km²)
Xeografía
Situado na entidade territorial estatística	Bayonne Functional Area (en)
Superficie	1,02 km²
Bañado por	Aran (en)
Altitude	123 m-51 m-146 m
Comparte fronteira con	Ayherre ; Hasparren ; Mendionde
Organización política
Membro de	Communauté d'agglomération du Pays Basque (en)
Identificador descritivo
Código postal	64240
Fuso horario	UTC+01:00, horario estándar; UTC+02:00, horario de verán

Bonloc (en francés, forma oficial) ou Lekuine (en éuscaro), é unha localidade e comuna francesa situada no departamento de Pireneos Atlánticos, na rexión de Aquitania e o territorio histórico vascofrancés de Lapurdi.

Xeografía

Bonloc, cunha superficie de 102 ha, é a máis pequena comuna do departamento. A súa poboación en 2012 era de 370 habitantes,^[1] o que representaba unha densidade de 363 hab/km². O seu xentilicio é Lekuidar.^[2]

Está atravesada polo río Arán, tamén coñecido como Harana e Joyeuse, un afluente do Adour.

Limita coas comunas de Hasparren, ao noroeste; Ayherre, ao leste e Mendionde, ao suroeste.

Historia

Bonloc ten unha historia rica e particular. A vila dependeu, desde o século XII até principios do século XVIII, do mosteiro de Roncesvales. Paul Raymond sinalou que Bonloc fora unha antiga encomenda relixiosa.^[3] Esta institución medieval era unha illa feudal, con dereitos señoriais até o século XVII.^[4] Os seus habitantes tiñan un estatuto de colo, intermedio entre a escravitude e o estado de home libre, e debían pagar diversos impostos ao mosteiro. Na vila había unua casa que servía de albergue nun dos camiños de Compostela.^[5]

A principios do século XVIII, e até a Revolución francesa, a aldea foi unha posesión do Bispado de Baiona. A Revolución francesa procedeu á abolición dos privilexios e desmantelou a riqueza do clero. Os residentes de Bonloc alcanzaron daquela un estado de cidadán completo e quizais por iso é polo que os lekuindarras son particularmente celosos de conservar a súa identidade.^[6]

Tratado de Bonloc

Un feito histórico acaecido en Bonloc foi o Tratado de Bonloc. O 30 de novembro de 1273 asinouse nesta vila un tratado de alianza entre Henrique I, rei de Navarra e Eduardo I, rei de Inglaterra, polo cal a infanta Xoana, herdeira do Reino de Navarra (a futura raíña Xoana I de Navarra), casaría con Henrique, príncipe herdeiro do Reino de Inglaterra. Pero as mortes prematuras do rei Henrique I, o 22 de xullo de 1274, e do príncipe Henrique, o 14 de outubro do mesmo ano, deixaron este tratado sen efecto. Porén, a alianza anglo-navarra sería confirmada polo matrimonio, en 1276, de Branca de Artois, viúva de Henrque I e nai de Xoana, con Edmundo, conde de Lancaster, irmán do rei Eduardo I.^[7]

Un costume local

Un costume propio de Bonloc continúa perdurando hoxe: na véspera de san Xoán, á tardiña, os cazadores e, en xeral, calquera persoa que teña unha arma de fogo tiran ao aire desde a porta da súa casa. Non se sabe exactamente de onde procede este hábito, pero todos respectan escrupulosamente a tradición.^[6]