Cantís de Loiba

Cantís de Loiba

Tipo	montaña
Localización
Continente	Europa
División administrativa	Provincia da Coruña, España
43°44′40″N 7°45′03″O

Os cantís de Loiba son uns cantís singulares de interese turístico da costa galega que se encontran na parroquia de Loiba, no municipio de Ortigueira, provincia da Coruña.

Situación

Vista parcial dos cantís de Loiba co cabo de Estaca de Bares ao fondo.

Están situados na confluencia da Serra da Faladoira co océano Atlántico, no exterior da ría de Ortigueira, entre o porto de Espasante e o cabo de Estaca de Bares. A súa altura sobre o nivel do mar varía entre os 80 e os 160 metros e aos seus pés existen seis estreitos areais: O Picón, Ribeira Grande, Ribeira do Carro, Os Castros, Gaivoteira e O Coitelo, que quedan mergullados durante a preamar e que só son accesibles desde terra por medio duns camiños zigzagueantes, que descender polos cantís case verticalmente.

Penafurada.

Trátase dunha costa moi batida polo mar, cuxas ondas rompen directamente na fachada do cantil e van escavando a rocha, orixinando furnas, a máis famosa das cales recibe o nome de Penafurada.

Historia

A parroquia de Loiba tradicionalmente era, malia a súa proximidade ao mar, eminentemente agrícola e as pequenas calas ao pé dos acantilados provían abundantes cantidades de algas vermellas (da orde das Gigartinales), que eran colleitadas entre os meses de xuño e outubro co propósito de seren utilizadas como fertilizante para os campos de labranza. Na actualidade séguese extraendo ese recurso para a súa venda á industria farmacéutica, alimentaria ou cosmética. Esta recollida de algas é un traballo realizado case exclusivamente por mulleres, que reciben o nome de algueiras.

Interese paisaxístico

O lugar converteuse nos últimos anos nun punto de visita turísitca obrigada na costa norte da provincia da Coruña. A relativa soidade do lugar, a súa paisaxe senlleira e as impresionantes vistas atraen a miles de turistas cada ano. Case toda a costa é accesible por medio de pistas forestais e instaláronse varios miradoiros para observar a paisaxe, e un parque de autocaravanas.

Turismo

The best bank of the world - O mellor "banco" (ribeira) do mundo.

The best bank of the world

O ano 2009, Rafael Prieto Fernández, veciño da parroquia de Loiba, decidiu colocar pola súa conta un banco de madeira no bordo do cantil. Existe a lenda de que durante o Festival de Ortigueira do ano 2010 un grupo de músicos escoceses que actuaban en dito festival visitaron os cantís e escribiron na parte traseira do banco a frase: «The best bank of the world». O que en principio parecía unha mala tradución de «banco» (por entidade financeira, bank, en lugar de bench, banco para sentarse), en realidade era correcto e referíase á escarpa ou corte de cantil (bank, ribeira). Desde entón esa frase cópiase e píntase fielmente cada vez que se renova o banco.

O fotógrafo Dani Caxete obtivo unha mención especial cunha foto nocturna dese banco na edición do ano 2015 do «Earth and Sky Photo Contest on Dark Skies Importance», un concurso organizado pola UNESCO para reivindicar os ceos nocturnos libres de contaminación lumínica.

Galería

• 
  Cantís de Loiba ao solpor.
• 
  Cantos arredondados polo mar nunha das calas dos cantís de Loiba.
• 
  Cantís de Loiba.
• 
  Cantís de Loiba.
• 
  Vista parcial dos cantís de Loiba.

Véxase tamén

Outros artigos

• Cantís de Herbeira

Ligazóns externas

• Imaxes en Google