Castro de Moura

Castro de Moura
Tipo	castro
Localización
42°41′04″N 7°14′05″O
Estado	España
Comunidade autónoma	Galicia
Provincia	provincia de Lugo
Concello	Samos
Parroquia	San Cristovo de Lóuzara
Lugar	Frexulfe
Arqueoloxía
Conservación	Moi alterado.
Ocupación	Sec. III a.C.-II d.C.
Descuberta	?
Escavación	1994
Id. catálogo	GA27055031
Dimensións
Superficie	0,6
[ Wikidata ]

O castro de Moura é un castro da Idade de Bronce Final que se atopa preto do lugar de Frexulfe, na parroquia de San Xoán de Lóuzara, no concello lucense de Samos. Ocupa un lugar a 946 metros sobre o nivel do mar, desde o que se domina visualmente boa parte do val do Loúzara.

Morfoloxía

Ten forma ovalada e componse dun único recinto de pequenas proporcións, mide de norte a sur 115 metros e de leste a oeste uns 70 metros. Nas partes escavadas téñense constatado unha ocupación datable cara ao cambio de era.

Arqueoloxía

Foi obxecto de escavacións arqueolóxicas de urxencia con motivo da instalación dun poste repetidor da RTVG. Escaváronse un total de 103 m². Destapouse unha estrutura circular que podería corresponder a un fondo de cabana, no que destaca a gran cantidade de buratos de postes aparecidos no interior cunha disposición en forma de círculo. A planta circular defínese por un rebaixe na rocha e por un aliñamento de pedras de escasa altura.

Con posterioridade a este primeiro traballo de escavación realizouse unha segunda intervención, na que se destapou unha estrutura pétrea de laxes de xisto e parte dun fondo de cabana (Hervés, 1994).

Atendendo aos restos atopados, fálase dunha ocupación entre o século III a.C. e a época romana, se ben estes datos deben terse en conta como hipóteses de traballo non definitivas. O lugar ata fai pouco tempo fora obxecto de explotación agrícola, polo que as estruturas atopadas se atoparon nun nivel superior moi alterado.

Materiais

• Cerámica: Destacan os restos cerámicos, que son de calidade e moitos deles presentan marcas de torno. En número destacan os restos de olas. Adoitan ser de pastas escuras e lisas. Poucas teñen decoracións, algunhas con motivos de decoracións de cordóns de pirámides.
• Material lítico : Destacan dous muíños planos, unha afiadoira rectangular, unha fusaiola decorada con tres círculos concéntricos ou pesas de xisto para a fixación do tellado.
• Elementos metálicos : só se atopou unha lámina de bronce.

Véxase tamén

Outros artigos

• Cultura castrexa
• Castros de Galicia

Ligazóns externas

• Purificación Rodríguez García· "Notas sobre un Castro de la Montaña Lucense:el Castro de Moura (Lóuzara. Samos)" Revista de Guimarães, Volume Especial, II, Guimarães, (1999), pp. 481-493