Comité de Milicias Antifascistas de Cataluña
O Comité de Milicias Antifascistas de Cataluña foi un organismo creado o 21 de xullo de 1936 en Barcelona por Lluís Companys, a iniciativa da Confederación Nacional do Traballo e a Federación Anarquista Ibérica, para organizar militarmente as forzas que loitaban contra o alzamento militar en Cataluña durante a guerra civil española e para coordinar os grupos armados de milicianos que saían cara a fronte de Aragón. Na práctica, o Comité deu resposta á nova correlación de forzas xordida logo do fracaso do Golpe de Estado en Cataluña, e foi o órgano efectivo de goberno entre xullo e setembro de 1936, ante a situación revolucionaria que dominaba o país.
O Comité tiña representantes das organizacións sindicais e os partidos da Fronte Popular, sendo o predominio anarcosindicalista, baixo as figuras de Joan García Oliver, Buenaventura Durruti e Diego Abad de Santillán, que tamén impuxeron un Consello Supremo de Economía en Cataluña para dirixir o proceso de colectivizacións en fabricas e empresas.
Figuraron no primeiro comité central tres dirixentes da CNT (Buenaventura Durruti, José Asens e Joan García Oliver), dous da FAI (Diego Abad de Santillán e Aurelio Fernández Sánchez), dous da Unión Xeral de Traballadores (José del Barrio, Salvador González e Antonio López Raimundo) un do PSUC (Josep Miret i Musté), dous do POUM (Josep Rovira i Canals e Julián Gorkin), tres de ERC (Artemi Aiguader i Miró, Jaume Miravitlles i Navarra e Joan Pons), un da Unió de Rabassaires (Josep Torrents), un de Acció Catalana Republicana (Tomàs Fàbregues), e Lluís Prunés e dous militares, asesores da Generalitat (Vicenç Guarner e Josep Guarner).
O comité organizaba as milicias obreiras e as columnas que partían á fronte, principalmente á de Aragón. Foi disolto o 27 de setembro de 1936 polo mesmo Companys cando a situación se estabiliza e chegaba cun único centro de poder político garantido polo goberno da Generalitat de Cataluña, no que se integrasen representantes do Comité. Á súa volta, as milicias obreiras militarizadas foron absorbidas polo exército regular republicano.
Ligazóns externas
[editar | editar a fonte]- Los Organismos Revolucionarios: El Comité Central de las Milicias Antifascistas de Cataluña, por Joan García Oliver.
Bibliografía
[editar | editar a fonte]- Dicccionari d'Història de Catalunya, Edicions 62
