Convergencia de Demócratas de Navarra
| Convergencia de Demócratas de Navarra (CDN) | |
|---|---|
 | |
| Dirixentes e organización | |
| Líder | José Andrés Burguete |
| Mocidades | Jóvenes Demócratas de Navarra |
| Historia | |
| Fundación | 10 de abril de 1995 1 |
| Disolución | 2 de xuño de 2011 |
| Posicións políticas | |
| Ideoloxía | Rexionalismo navarro, democracia cristiá, reformismo, progresismo |
| Posición política | Centro |
| Outros datos | |
| Sede | Carlos III, 7. 31002 Pamplona |
| Na rede | |
| https://www.cdn.es/ | |
| 1 Escisión de Unión del Pueblo Navarro. | |
Convergencia de Demócratas de Navarra (CDN) foi un partido político español de centro e rexionalista que actuaba en exclusiva no ámbito da Comunidade Foral de Navarra fundado en 1995 como froito dunha escisión desde Unión do Pobo Navarro (UPN). Tras as eleccións de 2011, e por primeira vez desde a súa fundación, CDN quedou sen representación no Parlamento de Navarra. O 2 de xuño de 2011, a asemblea de afiliados decidiu disolver o partido.
As mocidades de CDN denominábanse Jóvenes Demócratas de Navarra (JDN), en 2012 decidiu integrarse en Juventudes Navarras (é a organización xuvenil de Unión del Pueblo Navarro, partido que representa o centro-dereita rexionalista en Navarra. Defínese como Asociación de mozos comprometidos coa identidade foral de Navarra e co desenvolvemento integral da súa mocidade.)
A maioría dos seus afiliados e cargos pasáronse a Unión del Pueblo Navarro.
Ideoloxía
[editar | editar a fonte]Definíanse como «un proxecto político de centro progresista [...]. Desde a idea da "navarridade" integradora, oposta ao "navarrismo" excluínte, [sobre] os principios políticos [de] a identidade de Navarra como Comunidade Foral diferenciada, o seu desenvolvemento integral e a cohesión da sociedade navarra desde o seu pluralismo».[1]
O seu último líder foi José Andrés Burguete, desde que en marzo de 2008, renunciase ao cargo o fundador do partido Juan Cruz Alli, que foi presidente do Goberno de Navarra por UPN entre 1991 e 1995. Entre 1995 e 1996 formou coalición de goberno co Partido Socialista de Navarra e Eusko Alkartasuna. Entre 2003 e 2009 integrouse nunha coalición de goberno con UPN. Dispuxo de dúas consellerías, a de Educación con Carlos Pérez-Nievas López de Goicoechea e a de Vivenda que ocupaba José Carlos Esparza Sáez. En 2009, debido ás súas discrepancias con UPN acerca da reforma da Lei Foral do éuscaro o presidente Miguel Sanz destituíu os dous conselleiros, deixando as responsabilidades que ocupaban en mans doutros membros do seu partido (UPN), acabando con seis anos de alianza política.
Defendía os foros de Navarra, e os dereitos históricos e entendía que "o dono do seu futuro é o pobo navarro". Opúñase abertamente á integración de Navarra no País Vasco aínda que defendía que a cuarta disposición transitoria da Constitución española, que prevé un referendo ante esa eventualidade, se mantivese.
Evolución electoral
[editar | editar a fonte]A pesar do seu éxito inicial, CDN experimentou un notable descenso electoral, tendencia que só conseguiu frear nas eleccións forais de 2003.
Nas eleccións ao Parlamento de Navarra de 1995 obtivo o 18,55% dos votos e 10 deputados autonómicos. En 1999 o 6,86% e 3 representantes. En 2003 alcanzou o 7,65% e aumentou un escano (até 4). En 2007, obtivo 14.259 votos (4,4%), o que se traduciu en 2 parlamentarios.[2]
Nas eleccións municipais de 1995 alcanzou o 8,34% e 42 concelleiros. Durante uns meses en 1995, obtivo a alcaldía de Zizur Mayor, con Luís Ibero. En 1999, o 4,91% e 25. En 2003 continuou descendendo ao 3,46% e 17 concelleiros. En 2007 obtivo 7.661 votos (2,29%) e 16 concelleiros. Desde as eleccións municipais de 2007 e até maio de 2011, CDN ostentou catro pequenas alcaldías en Navarra, as de Azuelo, Roncal, Legaria e Enériz; e 24 concelleiros en diferentes concellos de Navarra. CDN só obtivo unha vez a alcaldía de Pamplona, e foi nas eleccións municipais de 1995, con Javier Chourraut (CDN), (con 6 edís), grazas ao pacto de goberno entre PSN-PSOE (5) e EU (3), que lle deu a alcaldía fronte ao candidato de UPN e lista máis votada con 10 edís.
Nas eleccións xerais pasou do 5,25% en 1996 ao 1,64% en 2004 e nas europeas rexistrou o 0,86%, sen alcanzar representación en ningún dos casos.
Tras as eleccións de maio de 2011 CDN deixou de ter representación no Parlamento de Navarra, tal como prevían a maioría das sondaxes, ao non superar o 3% mínimo esixido e quedar á metade cun total de 4.651 votos.[3][4] Con todo, obtivo as alcaldías de Enériz e Azuelo, sendo a única candidatura que se presentou, e media ducia de concelleiros en toda a Comunidade Foral, entre eles o histórico Luís Ibero Elía, en Zizur Mayor.
Resultados electorais
[editar | editar a fonte]Eleccións ao Parlamento de Navarra
[editar | editar a fonte]| Ano | Cabeza de lista | Votos | Porcentaxe | Escanos |
|---|---|---|---|---|
| 1995 | Juan Cruz Alli | 55.153 | 18,56% | 10 / 50 |
| 1999 | Juan Cruz Alli | 20.821 | 6,86% | 3 / 50 |
| 2003 | Juan Cruz Alli | 23.516 | 7,65% | 4 / 50 |
| 2007 | Juan Cruz Alli | 14.412 | 4,37% | 2 / 50 |
| 2011 | José Andrés Burguete | 4.654 | 1,44% | 0 / 50 |
Eleccións municipais
[editar | editar a fonte]| Ano | Líder | Votos | Porcentaxe | Concelleiros |
|---|---|---|---|---|
| 1995 | Juan Cruz Alli | 24.186 | 8,59% | 42 / 1.774 |
| 1999 | Juan Cruz Alli | 14.573 | 5,07% | 25 / 1.677 |
| 2003 | Juan Cruz Alli | 10.440 | 3,58% | 17 / 1.725 |
| 2007 | Juan Cruz Alli | 7.699 | 2,36% | 16 / 1.776 |
| 2011 | José Andrés Burguete | 3.039 | 0,99% | 13 / 1.835 |
Eleccións xerais
[editar | editar a fonte]| Ano | Votos | Porcentaxe | Escanos |
|---|---|---|---|
| 1996 | 17.020 | 5,25% | 0 / 5 |
| 2000 | 8.646 | 2,86% | 0 / 5 |
| 2004 | 5.573 | 1,64% | 0 / 5 |
Disolución
[editar | editar a fonte]Como consecuencia dos malos resultados electorais cultivados nas súa últimas eleccións, o 2 de xuño de 2011, a asemblea de afiliados decidiu disolver o partido político tras 16 anos de actividade.[5]
A maioría dos seus afiliados e cargos pasáronse a Unión do Pobo Navarro, por tanto dalgunha maneira considérase parte de UPN continuador de CDN.
Notas
[editar | editar a fonte]- ↑ Citado da páxina web de Juan Cruz Alli.
- ↑ "Resultados das eleccións forais de 2007 en Navarra". elecciones2007.navarra.es. Consultado o 20 de decembro de 2013.
- ↑ El PP irrumpe con 5 escaños en el Parlamento, los mismos que perdería UPN, que bajaría a 17 Copia arquivada en Wayback Machine, Diario de Navarra, 25 de novembro de 2008.
- ↑ "La encuesta de 'El Mundo' está realizada en clave nacional", dice Miguel Sanz, Diario de Navarra, 2 de xuño de 2010.
- ↑ CDN se disuelve y extingue como partido por los malos resultados electorales Arquivado 07 de xaneiro de 2015 en Wayback Machine., ABC, 2 de xuño de 2011.
