Couzadoiro, Ortigueira
| San Cristovo de Couzadoiro | |
|---|---|
 Igrexa de San Cristovo de Couzadoiro | |
 | |
| Concello | Ortigueira[1] |
| Provincia | A Coruña |
| Coordenadas | 43°39′49″N 7°47′22″O / 43.6637, -7.7895 |
| Área | 21,8 km² |
| Poboación | 106 hab. (2017) |
| Densidade | 4,86 hab./km² |
| Entidades de poboación | 23[1] |
| [ editar datos en Wikidata ] | |
San Cristovo de Couzadoiro[1] é unha parroquia do concello coruñés de Ortigueira, na comarca do Ortegal. Segundo o padrón municipal de 2009 tiña 152 habitantes (82 homes e 70 mulleres) distribuídos en 23 entidades de poboación, o que supón unha diminución en relación ao ano 1999 cando tiña 229 habitantes.
Xeografía
[editar | editar a fonte]Couzadoiro está situada na parte oriental do concello no curso medio do río Baleo e na aba occidental da Serra da Faladoira, do coto de Roca e dos montes do Burgo. Limita ao norte con San Salvador de Couzadoiro, dende o Coto polo rego de Montecalvelo até o coto de Vilariño; polo leste os altos da Faladoira son linde co concello de Mañón dende o coto de Vilariño até Xuncos de Mouraz; polo suroeste o rego de Xuncos de Mouraz, afluente do Baleo, sepáraa da parroquia de Devesos, e polo oeste limita coa parroquia de Cuíña no monte da Penouseira.
Dende a estrada AC-682 na Ponte do Baleo, parte outra que leva até Devesos e que atravesa a parroquia polo alto de Corbelle. Tamén atravesa esta parroquia outra estrada que une a mesma Ponte do Baleo con Mañón por Montecalvelo e o alto do Foxo.
O río Baleo, duns 14 quilómetros, forma un val ao que van dar gran cantidade de regos e regatos de certa importancia, polo que vai recibindo distintos nomes ao longo do seu curso. Na parte alta chámaselle o río das Mestas, máis abaixo é o río Grande, e xa preto da enseada de Ladrido onde desemboca, coñécese coma Baleo.
Patrimonio
[editar | editar a fonte]A igrexa parroquial de San Cristovo, á beira do rego de Meixonfrío, é un templo de certa amplitude; de planta de cruz latina con cinco pequenos altares, un dos cales é de estilo churrigueresco. Venérase nesta igrexa unha imaxe da virxe do Loreto, que deu lugar a unha romaría moi popular hoxe practicamente esquecida.
Seguindo este mesmo rego até a súa unión co Baleo, no lugar da Veiga está o pazo da Torre. Alí mesmo hai tamén unha ponte pola que pasaba o camiño real de Ortigueira a Viveiro até que se construíu a finais do século XIX a estrada da Costa, desde Liñares (Neda) a Viveiro, pasando por Ortigueira e O Barqueiro, onde se construiu unha ponte.
Galería de imaxes
[editar | editar a fonte]-
Pazo da Torre
Lugares e parroquias
[editar | editar a fonte]Lugares de San Cristovo de Couzadoiro
[editar | editar a fonte]| Lugares da parroquia de Couzadoiro no concello coruñés de Ortigueira | |
|---|---|
|
O Acivido | Biduído de Abaixo | Biduído de Arriba | Castelo | Castrillón | Cernada | O Chao | A Corredoira | Corvelle de Abaixo | Corvelle de Arriba | O Coutado | O Cristo | Cu de Petos | A Ferrería | O Foxo | Martiñan | Meixonfrío | As Mestas | Montecalvelo | O Nogueirido | O Pazo | A Pena | As Penas do Rego | O Pesco | O Piñeiro | Porto de Insua | O Preguntoiro | Randamil | Riba de Souto | San Miguel | Santaballa de Abaixo | Santaballa de Arriba | O Teixeiro de Abaixo | O Teixeiro de Arriba | A Torre | O Trabado | O Vilar | Xiros | Xorres |
