Diversidade sexual
A diversidade sexual e de xénero (DSX) ou simplemente diversidade sexual é un termo que se usa para referirse de maneira inclusiva a toda a diversidade de sexos, orientacións sexuais e identidades de xénero, sen necesidade de especificar cada unha das identidades, comportamentos e características que conforman esta pluralidade.[1][2][3][4]
En Occidente, habitualmente utilízanse clasificacións simples e herméticas en torno ao sexo (homes, mulleres e intersexuais), á orientación sexual (heterosexuais, homosexuais e bisexuais) e á identidade de xénero (transxéneros e cisxéneros), reunidas baixo as siglas LGTBI (lesbianas, gais, transxéneros, bisexuais e intersexuais). Con todo, outras culturas posúen maneiras diferentes de entender o sistema sexual.[5][6][7] Ademais, nas últimas décadas popularizáronse diversas teorías da sexoloxía, como a teoría de Kinsey e a teoría cuir que propoñen que esta clasificación resulta insuficiente para describir a complexidade da sexualidade na especie humana, e mesmo tamén noutras especies animais.[8]
Por exemplo, poida que as persoas experimenten unha orientación sexual intermedia entre heterosexual e bisexual (heteroflexible) ou entre homosexual e bisexual (homoflexible) ou que esta varíe ao longo do tempo, ou que inclúa atracción independentemente do sexo ou xénero (pansexual). Noutras palabras, dentro da bisexualidade existe unha gran diversidade de tipoloxías e preferencias que varían desde unha completa heterosexualidade a unha completa homosexualidade (escala de Kinsey).[9]
A diversidade sexual tamén inclúe ás persoas intersexuais, que nacen cunha variedade de características intermedias entre homes e mulleres.[10] Ademais tamén se inclúen todas as identidades transxénero e transexuais que non se encadran dentro do sistema de xénero binario e que, do mesmo xeito que a orientación sexual, poden experimentarse en distintos graos máis aló do cisxénero e a transexualidade, como é o caso das persoas de xénero fluído.[11]
Por último, a diversidade sexual tamén engloba ás persoas asexuais, quen experimentan desinterese na actividade sexual;[12] así como a todas aquelas persoas que consideran que a súa identidade non se pode definir, incluídas no ámbito anglosaxón baixo o termo paraugas queer.
Socialmente reivindícase a diversidade sexual como forma da aceptación de calquera forma de ser, con iguais dereitos, liberdades e oportunidades dentro do marco dos Dereitos Humanos. En moitos países reivindícase a visibilidade da diversidade sexual nas marchas do Orgullo LGTBI.[13]
Notas
[editar | editar a fonte]- ↑ (en inglés) Sexual and gender diversity. Rutgers. For sexual and reproductive health and rights.
- ↑ (en portugués) Diversidade Sexual e a Cidadania LGBT. Governo do Estado de São Paulo. Secretaria da Justiça e da Defesa da Cidadania. 2014.
- ↑ Meyer, Elizabeth J. (2010). Gender and Sexual Diversity in Schools (en inglés). Springer Science & Business Media. ISBN 978-90-481-8558-0.
- ↑ (en inglés) FAQ on health and sexual diversity: The basics. World Health Organization. 2016.
- ↑ (en inglés) Sexual variation in India: A view from the west. Indian Journal of Psychiatry. 2010.
- ↑ Epprecht, Marc; Nyeck, S. N (2013). Sexual Diversity in Africa: Politics, Theory, and Citizenship (en inglés). McGill-Queen's University Press. ISBN 978-07735-4187-0.
- ↑ (en inglés) Gender diversity in Indonesia: Sexuality, Islam and queer selves. 2010.
- ↑ Roughgarden, Joan (Director) (2008). Sexual Diversity in the Animal Kingdom (en inglés).
- ↑ (en inglés) Beyond Heterosexual, Bisexual, and Homosexual: A Diversity in Sexual Identity Expression. Archives of Sexual Behavior. 2016.
- ↑ Un cuerpo, mil sexos: intersexualidades. Topia. 2010. ISBN 978-987-1185-42-9.
- ↑ (en inglés) Theorising Gender Diversity: Current trans, future directions. University of Huddersfield. 2013.
- ↑ Carrigan, Mark; Gupta, Kristina; Morrison, Todd G. (2015). Asexuality and Sexual Normativity: An Anthology (en inglés). Routledge. ISBN 978-0-415-73132-4.
- ↑ (en inglés) Pride Weekend events celebrate gender and sexual diversity in Oxford. Arquivado 17 de maio de 2017 en Wayback Machine. The Daily Mississippian. 17 may 2017.
Véxase tamén
[editar | editar a fonte] |
A Galipedia ten un portal sobre: Diversidade sexual |
