Glauconita

Glauconita
Fórmula química	(K,Na)(Fe3+,Al,Mg)2(Si,Al)4O10(OH)2
Clase	Silicato
Subclase	Filosilicato
Sistema cristalino	Monoclínico, prismático
Cor	Verde, verde azulado, verde amarelado
Brillo	Térreo
Dureza	2 (escala de Mohs)
Fractura	Micácea
Exfoliación	Si
Raia	Verde brillante
Densidade	2,67 g/cm3

A glauconita é un mineral do grupo dos silicatos, subgrupo filosilicatos e dentro destes pertence ás micas. É un hidroxi-silicato con numerosos ións metálicos, con numerosas variedades, até o punto de que máis que un mineral, a glauconita case é considerada como un grupo de minerais.

A cor é distintivamente verde, podendo ter tonalidade azulada ou amarelada. Normalmente encóntrase en forma de agregados redondeados, con partículas escamosas, como todas as micas, pero de gran moi fino.

O seu nome provén do grego glaukos, que significa azul-verdoso, en alusión á súa cor. A verba glauconio usouse antes de 1823, cando se renomeou glauconita.

Ambiente de formación

Mineral común nas secuencias sedimentarias desde o Cámbrico até a actualidade, sendo o compoñente principal das arenitas verdes, precisamente chamadas así polo seu alto contido en glauconita.

Formado por alteración diaxenética da biotita depositada nun ambiente sedimentario mariño superficial, empregado polos xeólogos como indicador do ambiente de sedimentación mariño.

Localización, extracción e uso

Abunda nas areas terciarias mariñas do mar Báltico e en numerosas rochas sedimentarias repartidas por todo o mundo. En España son glauconíferas as arenitas e arxilas de Guadalajara e Cuenca.

A glauconita emprégase na industria téxtil, na industria azucareira e na industria cervexeira. Polo seu contido en potasio tamén se usou para a elaboración de fertilizantes agrícolas. Outro uso é como colorante non tóxico e resistente aos axentes atmosféricos.

Véxase tamén

Outros artigos

• Lista de minerais

Ligazóns externas

• Datos sobre localización de glauconita
• Sitio web con datos de glauconita
• Galería de imaxes de glauconita en Internet: [1] [2]