Gran Cordilleira Divisoria
| ||||
| Tipo | cordilleira  | |||
|---|---|---|---|---|
| Localización | ||||
| División administrativa | Queensland, Australia, Nova Gales do Sur, Australia, Victoria, Australia e Territorio da Capital Australiana | |||
| ||||
| Características | ||||
| Altitude | 2.228 m | |||
| Dimensións | 3.500 ( ) km | |||
| Punto máis alto | Monte Kosciuszko (2.228 m ) | |||
| Historia | ||||
| Período de tempo | Carbonífero | |||
A Gran Cordilleira Divisoria (en inglés: Great Dividing Range) é a cadea de montañas máis importante de Australia. Esténdese por máis de 3500 km, dende o extremo nordés de Queensland, ao longo de toda a costa oriental atravesando Nova Gales do Sur, e o estado de Victoria máis ao sur, ata o extremo sur do continente, onde torce cara ao oeste e finaliza na inmensa planicie central nos montes Grampianos, en Victoria.
O punto máis elevado na Australia continental é o Monte Kosciuszko (2228 m), e todas as outras zonas alpinas do país australiano forman parte desta cordilleira. As zonas máis altas, na zona sur de Nova Gales do Sur e o leste de Victoria, son chamadas os Alpes australianos.[1]
Historia
[editar | editar a fonte]
A Gran Cordilleira Divisoria formouse durnante o carbonífero, hai uns 300 millóns de anos, cando Australia colisionou co que agora son partes de Suramérica e Nova Zelandia.[2]
Nas montañas habitaban pobos aborixes australianos tales como os kulin e tiveron un papel significativo na exploración de Australia polos colonizadores europeos. Un dos primeiros exploradores en cruzar a cordilleira foi Gregory Blaxland, seguido por exploradores australianos como Allan Cunningham, John Oxley, Hamilton Hume e Charles Sturt.
Cara a fins da década de 1820 as pradarías máis fértiles próximas ás montañas xa foran exploradas e creáranse algúns asentamentos de colonos. Estes incluían as rexións de Gippsland e Riverina no sur, ata as planicies de Liverpool e os Darling Downs no norte.
Características
[editar | editar a fonte]Todas as zonas alpinas da parte continental de Australia, incluíndo a súa montaña máis elevada, o monte Kosciuszko (2228 metros), forman parte desta cordilleira.[3] As zonas máis elevadas no sur de Nova Gales do Sur e leste de Victoria chámanse Alpes australianos.
O núcleo central da Gran Cordilleira Divisoria posúe centos de picos e atópase rodeado por moitas outras montañas menores, canóns, vales e planicies. Algunhas das principais planicies e mesetas son High Plains do sueste australiano, as Terras Altas Centrais e as planicies de Bogong High de Victoria. Outras mesetas que se consideran parte da Gran Cordilleira Divisoria son a meseta Atherton, as mesetas do Norte, a zona vitivinícola de Canberra e as mesetas do Sur.
As montañas Azuis, a serra de Bunya, a cadea Liverpool, a cadea McPherson e a cadea Moonbi son algunhas das serras menores que forman a cordilleira. Mentres que algúns dos picos das terras altas alcanzan alturas apenas por riba de 2000 metros, a idade e a erosión da cordilleira fan que a maioría dos montes non sexan excesivamente empinados, e por iso case todos os picos poden ser ascendidos sen a necesidade de equipo especial de montaña.
Nalgunhas áreas, tales como a serra de Snowy, os Alpes Victorianos, o Scenic Rim e os riscos da zona leste de New England, as terras altas forman unha importante barreira. Noutras áreas as pendentes son suaves e en certas zonas a cadea é apenas perceptible. Algúns dos pasos máis coñecidos a través das montañas son o paso de Cunningham, o paso do Cabalo Morto e o paso da Araña.
Captación de auga
[editar | editar a fonte]Nas zonas baixas realízanse actividades de explotación forestal, o que é motivo de friccións cos conservacionistas. As montañas son tamén a fonte de practicamente toda a subministración de auga da zona leste de Australia, tanto mediante auga de escorredura que se capta en diques, como mediante a gran conca artesiana.
A Gran Cordilleira Divisoria divide as concas de captación de regatos e ríos que flúen directamente cara ao océano Pacífico na costa leste de Australia, dos regatos e ríos da conca do Murray-Darling que flúe cara ao centro do continente.[1][3]
Áreas protexidas
[editar | editar a fonte]Unha gran parte da cordilleira atópase dentro dunha serie de parques nacionais e outras reservas incluídos o parque nacional Alpino, o parque nacional das Montañas Azuis, o parque nacional Heathcote-Greytown e o Parque Mount Worth State.
Notas
[editar | editar a fonte]- ↑ 1,0 1,1 Shaw, John H., “Collins Australian Encyclopedia”, William Collins Pty Ltd., Sydney, 1984, ISBN 0 00 217315-8
- ↑ Prost, G.; Prost, B. (2017). The Geology Companion: Essentials for Understanding the Earth. CRC Press. p. 98. ISBN 978-1-4987-5609-9. Consultado o 2 de febreiro de 2020.
- ↑ 3,0 3,1 Johnson, David (2009). The Geology of Australia. Cambridge University Press. p. 202. ISBN 0-521-76741-5.
Véxase tamén
[editar | editar a fonte]Ligazóns externas
[editar | editar a fonte]- Australia.gov. "Australian Rocks and Mountains". Arquivado dende o orixinal o 15 de xullo de 2012. Consultado o 18 de setembro de 2012.
- "Kosciuszko National Park". Australian Alps National Parks. Australian Government. Consultado o 18 de maio de 2019.
- Australian rocks and mountains
- Australian Explorer
- Crossing the Great Dividing Range
- Northern Rivers (NSW) Geology Blog – Great Dividing Range
