Josef Bican

Josef Bican
	; (1940)
Biografía
Nacemento	25 de setembro de 1913 ; Viena, Austria
Morte	12 de decembro de 2001 (88 anos); Praga, República Checa
Lugar de sepultura	Cemitério Vyšehrad (pt)
Outros nomes	Pepi, Manolo
Altura	178 cm
Peso	77 kg
Actividade
Campo de traballo	Fútbol
Lugar de traballo	Viena ; Praga ; Hradec Králové (pt)
Ocupación	futbolista, adestrador de fútbol, deportista
Período de actividade	6 de setembro de 1931 - 1957
Nacionalidade deportiva	Austria ; Checoslovaquia ; Protectorado de Bohemia e Moravia
Deporte	fútbol
Posición de xogo	Dianteiro
–
Traxectoria
Participou en
1934	Mundial de Fútbol Italia 1934
Premios
	honorary citizen of Prague (en) ;
Descrito pola fonte	regional database of the Municipal Library of Hradec Kralove (en) >>>:Bican, Josef, 1913-2001,

Josef "Pepi" Bican, nado en Viena o 25 de setembro de 1913 e finado o 12 de decembro de 2001, foi un dos grandes futbolistas austríacos e checoslovacos de tódolos tempos. Gañou cinco veces a Bota de Ouro.

Traxectoria

Xuventude

Os seus pais eran Ludmila, unha vienesa de orixe checa e Frantisek, que viña de Sedlice, na zona sur de Bohemia. O pai de Josef foi futbolista, e xogou para o Hertha Vienna. Aínda que volveu ileso da primeira guerra mundial, morreu moi novo, aos 30 anos. A causa foi unha magoadura nos riles da que rexeitou operarse, por mor dun golpe nun encontro de fútbol.

A súa nai traballaba na cociña dun restaurante. O pouco que gañaba non daba para comprar unhas botas, así que Josef comezou a xogar ao fútbol descalzo. Isto curiosamente fixo que logo desenvolvera moita habilidade no manexo do balón.

Bican asistía á escola Jan Amos Komensky, unha escola checa de Viena. Aos 12 anos comeza a xogar para os xuvenís do Hertha Viena. Cando chega ós 18 anos, é fichado polo Rapid Viena, que nese entón era un dos grandes clubs da cidade.

Unha das poucas veces que a súa nai foi ve-lo xogar co Rapid, anoxouse moito cunha falta que lle fixeran ó seu fillo, e, tras saltar dende a bancada paraugas en man, comezou a bater no opoñente de Josef.

Entre as súas virtudes destacou sobre todo a súa velocidade: era quen de correr os 100 metros en 10,8 segundos, que constituiría unha magnífica marca no atletismo da época.

Seleccións

O 29 de novembro de 1933 con 20 anos e 64 días fai o seu debut coa selección austríaca, nun encontro contra a Escocia que rematou 2-2.

Ao ano seguinte, participou con Austria no Mundial de Fútbol Italia 1934, chegando ata as semifinais. No encontro polo terceiro posto perderon coa Alemaña por 3-2.

En 1937 Josef Bican deixa a cidade de Viena para xogar co Slavia Praga. Alí converteuse en cidadán checoslovaco.

Non puido disputar o mundial de 1938 por un erro burocrático, mais si fixo diversas aparicións coa selección checoslovaca. Tamén xogou varios encontros con Bohemia e Moravia. En total, 29 goles en 34 encontros internacionais. O seu derradeiro encontro de seleccións foi en 1949 con Checoslovaquia e contra Bulgaria. Perderon por 3-1.

A Posguerra

Despois da segunda guerra mundial algúns dos mellores clubs de Europa andaban tentando facerse cos servizos de Bican. A Juventus ofreceulle unhas magníficas condicións mais el desestimounas por mor duns rumores que dicían que os comunistas estaban a piques de chegar ó poder en Italia. Decidiu ficar en Praga e, curiosamente, os comunistas chegaron ao poder alí en 1948. Bican rexeitou unirse ao Partido Comunista, tal coma rexeitara unirse ao Partido Nazi.

Bican tentou de mellorar as súas relacións cos comunistas fichando polo Vitkovice Zelezarna. En 1951 foise para o Hradec Králové pero o 1 de maio de 1953 o Partido Comunista obrigouno a abandonar o club e a cidade. Volvería entón ao Slavia Praga, onde ficou ata 1955, retirándose do fútbol con 42 anos.

Cando Pelé estaba a piques de chegar aos 1000 goles moitos xornalistas andaban á procura doutro xogador que tivera superado o millar. E así apareceu o nome de Bican, que sostiña ter anotado 5000 goles. Cando lle preguntaron por que non falaba nunca do asunto, Bican respondeulles: "Quen me vai crer se digo que marquei cinco veces máis goles que Pelé?". Esta cifra semella excesiva e a única fonte documentada son os goles que anotou en liga e coas seleccións (ver táboa abaixo).

Josef "Pepi" Bican pasou os seus derradeiros meses nun hospital, aqueixado de problemas de corazón. Morreu aos 88 anos de idade.

Estatísticas

Tempada	Club	Encontros	Goles
1937/38	Slavia Praha	19	22
1938/39	Slavia Praha	21	29
1939/40	Slavia Praha	20	50
1940/41	Slavia Praha	22	38
1941/42	Slavia Praha	20	45
1942/43	Slavia Praha	20	39
1943/44	Slavia Praha	23	57
1945/46	Slavia Praha	17	31
1946/47	Slavia Praha	22	43
1947/48	Slavia Praha	13	20
1948	Slavia Praha	7	21
1949	Vítkovické Železárny	(II)	-
1950	Vítkovické Železárny	21	22
1951	Vítkovické Železárny	12	8
1952	Hradec Králové	(II)	-
1953	Slavia Praha	8	7
1954	Slavia Praha	14	11
1955	Slavia Praha	7	4
1937-55	Total	266	447

Foi 12 máximo anotador de liga na súa carreira e 5 veces Bota de Ouro.