Juan Lago Collazo

Juan Lago Collazo

Biografía
Nacemento	Paredes, España
Morte	París, Francia
Actividade
Ocupación	político

Juan Lago Collazo, coñecido como Juan da Ferreira, nado en Paredes (Vilaboa) e finado en París, foi un político galego.

Traxectoria

Durante a República foi secretario da Sociedade de Oficios Varios de Vilaboa. Co golpe de Estado do 18 de xullo de 1936 foi detido e torturado para que entregase os libros do sindicato. Sobreviviu a unha tentativa de paseo no cemiterio de Ponte Sampaio. Enrolouse no exército franquista e pasouse ao bando leal. Participou na batalla do Ebro. Coa derrota da República pasou a Francia e foi internado nun campo de refuxiados. Enrolouse como tenente nun dos batallóns auxiliares do exército francés. Trasladado á fronte de guerra, foi feito prisioneiro polos alemáns e conducido desde Estrasburgo ao campo de concentración de Mauthausen o 13 de decembro de 1940. Para sobrevivir mudou a súa identidade pola dun compañeiro morto, o cubano Alberto Martínez Sánchez. A finais de 1943 foi trasladado a Ebensee, un campo satélite de Mauthausen. Estivo preso en Mauthausen catro anos e medio, até o 5 de maio de 1945. Logo da liberación do campo foi atendido pola Cruz Vermella e trasladado a París. Despois foi trasladado a Fort de Champigny, un cuartel do exército francés preto de París convertido en fogar de convalecencia. Alí coñeceu a Andrés Campos, un emigrante de Murcia, que o acolleu e lle prestou axuda. Coa colaboración de Germaine, a filla de Andrés coa casou finalmente, preparou os exames de mecánica e conseguiu emprego nunha fábrica. Visitou Paredes en varias ocasións nos anos sesenta. Morreu en París, e as súas cinzas foron depositadas polo seu irmán Ramón no cemiterio de Cedeira.

Vida persoal

Casou en París con Germaine Campos en 1948. Tivo unha filla, Vivianne.

Véxase tamén

Ligazóns externas

• Todas as vidas de Juan Lago Collazo Arquivado 01 de xuño de 2020 en Wayback Machine.
• Juan Lago, sobrevivente de Mauthausen
• O Souto