Karoniaktajeh Louis Hall
| Biografía | |
|---|---|
| Nacemento | 15 de xaneiro de 1918  Kahnawake, Canadá |
| Morte | 9 de decembro de 1993 (75 anos) Kahnawake, Canadá |
| Grupo étnico | Pobo mohawk |
| Actividade | |
| Ocupación | escritor, activista |
Karoniaktajeh Louis Hall, nado en Kahnawake o 15 de xaneiro de 1918,[1] e finado ibídem o 9 de decembro de 1993,[2] foi un artista, escritor e activista mohawk de Kahnawake. É coñecido por ser o creador da "bandeira guerreira mohawk", tamén coñecida como a "bandeira da unidade", que foi utilizada como símbolo de resistencia pola Sociedade Guerreira Mohawk (en mohawk: Rotisken'rakéhte), na crise de Oka en 1990. Hall era coñecido pola súa forte participación na revitalización das tradicións espirituais haudenosaunee (pobos iroqueses) e da cultura Kanonsiononwe (casa longa).[3] Hall era un experto na Kaianera'kó:wa (Gran Lei da Paz), a constitución da Confederación Iroquesa, e foi unha parte fundamental no estabelecemento do Territorio Mohawk de Ganienkeh.[4]
Traxectoria
[editar | editar a fonte]
Hall foi un dos primeiros artistas indíxenas americanos do século XX que tivo unha práctica artística explicitamente política. Hall foi un pintor autodidacta e un artista notable entre o movemento Poder Vermello.[3] A súa obra tiña elementos de pintura tradicional, propaganda política e deseño gráfico. Ademais da súa práctica visual, Hall tamén publicou boletíns e libros, incluíndo A Tale of One Mohawk, The Warriors' Handbook, Rebuilding the Iroquois Confederacy, e The Mohawk Warrior Society: A Handbook on Sovereignty and Survival.[6][4] Agás a "bandeira guerreira mohawk" de 1990, o traballo de Hall non se mostrou en ningunha galería ou museo.[3]
Hall uniuse ao American Indian Movement (AIM), e deseñou un cartel para eles en 1973. AIM foi unha organización de dereitos civís formada por persoas das Primeiras Nacións dos Estados Unidos e o Canadá. Este movemento procurou desafiar e loitar contra as forzas opresivas postas sobre os nativos norteamericanos. Hall participou en papeis a todos os niveis en AIM, e é aquí onde loitou para devolver o goberno tradicional e as ideas de Longhouse en Kahnawake.[3]
Antes da crise de Oka, Hall estivo implicado na toma de posesión do territorio tradicional Ganienkeh no estado de Nova York en 1974.[7] Aquí, Hall foi o correspondente secretario e voceiro do Consello de Moss Lake.[7] Os nativos americanos afirmaron que o territorio de Ganienkeh estendíase por máis de 9 millóns de hectáreas desde Nova York ata Vermont, e que a terra lles fora quitada ilegalmente en 1797.[7] Foi nese momento cando Hall creou a primeira versión da "bandeira da unidade". Esta primeira versión amosaba a silueta dun home nativo de pelo longo cun sol vermello e branco detrás del. Hall dixo que a bandeira está "deseñada para todas as nacións indias. Unha única pluma significa 'todo nunha soa mente'. Deganawida quería que todos os indios estivesen baixo a Gran Lei da Paz. Igualdade para todas as nacións indias”.[8] Deganawida, tamén chamado O Gran Pacificador, foi o fundador da Confederación Iroquesa.[9]
Unha nova versión da "bandeira da unidade" foi deseñada por Hall durante a crise de Oka de 1990 e utilizouse como símbolo de resistencia aos bloqueos nos territorios de Kanesatake e Kahnawake.[3][10] Esta nova bandeira substituíu o home de pelo longo anterior por un guerreiro Kanien’kehá:ka. En contraste coa bandeira anterior, que era un símbolo para todos os indíxenas americanos, esta bandeira foi feita especificamente para a Rotisken'rakéhte ou Sociedade Guerreira Mohawk. Esta bandeira foi descrita por Hall como unha manifestación visual da Kaianera'kó:wa (Gran Lei da Paz).[11]
Pasamento e legado
[editar | editar a fonte]Louis Karoniaktajeh Hall morreu o 9 de decembro de 1993, aos 75 anos. Estaba na súa casa da comunidade mohawk de Kahnawake no momento da morte.[4]
A práctica artística e o activismo político de Hall lémbrase e aínda vive na actualidade. A "Bandeira da Unidade" converteuse nun símbolo emblemático da paz e da resistencia, e produciuse en masa en forma de adhesivos, chaveiros, roupa e pancartas. A "bandeira da unidade" tamén se utilizou en contextos de dereitos civís máis contemporáneos. Durante a "disputa pesqueira" da Esgenoôpetitj entre 1999 e 2002, os micmac ondearon a "bandeira da unidade", defendendo o seu dereito a pescar, recoller e cazar os recursos naturais da súa nación.[12][11] A bandeira tamén se ondeou nas manifestacións en Standing Rock, concentracións durante as protestas de Idle No More e Black Lives Matter,[11] e en Nablus, Palestina durante a conflito israelí-palestino de 2023.[13]
Notas
[editar | editar a fonte]- ↑ "The Mohawk Warrior Society by Louis Karoniaktajeh Hall". cbc.ca. 20 de setembro de 2022. Consultado o 21 de novembro de 2024.
- ↑ "Traditionalist Mohawk activist, writer and painter Louis Karoniaktajeh Hall died in his home in the Mohawk community of Kahnawake". nationnewsarchives.ca. 15 de decembro de 1993. Consultado o 21 de novembro de 2024.
- ↑ 3,0 3,1 3,2 3,3 3,4 Cross, Wasontiio S. (2011-09-15). Louis Karoniaktajeh Hall and the Art of Resistance (Tese) (en inglés). Concordia University.
- ↑ 4,0 4,1 4,2 Roslin, Alex (15 de decembro de 1993). "Mohawk Activist Louis Hall Dies". The Nation Archives.
- ↑ "HAUDENOSAUNEE - MOHAWK - ONEIDA - ONONDAGA - CAYUGA - SENECA - TUSCARORA- Kahnawake Branch Of The Mohawk Nation Six Nation Iroquois Confederacy". www.kahnawakelonghouse.com. Consultado o 12 de xuño de 2022.
- ↑ "Louis Karoniaktajeh Hall". Heard Museum | ARGUS.net (Final) (en inglés). Consultado o 2022-12-19.
- ↑ 7,0 7,1 7,2 "INDIANS SEEKING SUPPORT FOR THEIR LAND CLAIMS". The New York Times (en inglés). 1976-12-15. ISSN 0362-4331. Consultado o 2022-12-19.
- ↑ "The Warrior/Unity Flag". Warrior Publications (en inglés). 2012-03-19. Consultado o 2022-12-19.
- ↑ Echevarria, Evelio; Winters, Frank (1995). "Brave Are My People: Indian Heroes Not Forgotten". American Indian Quarterly 19 (2): 252. ISSN 0095-182X. JSTOR 1185177. doi:10.2307/1185177.
- ↑ "Bloody Blockades: The Legacy of the Oka Crisis". Harvard International Review. 2020-06-30. Consultado o 2022-12-19.
- ↑ 11,0 11,1 11,2 Deer, Jessica (11 de xullo de 2020). "Legacy of the Warrior Flag". CBC News.
- ↑ Blackduck, Allison (20 de outubro de 2000). "Burnt Church". The Nation Archives.
- ↑ Hamadeh, Khalid. "The flag of the Indigenous Kanien'kehá (Mohawk) nation in the mountains of Nablus city in the West Bank, Palestine, symbolizing a shared struggle against settler colonialism from Turtle Island to Palestine. Photo by @renazzal". Twitter. Consultado o 13 de xullo de 2024.