MHC de clase III
A MHC de clase III (complexo maior de histocompatibilidade de clase III ou CMH de clase III) é un grupo de proteínas que pertencen ao complexo maior de histocompatibilidade (MHC polas súas siglas en inglés). A diferenza doutros tipos de MHC, como os MHC de clase I e MHC de clase II, cuxas estruturas e funcións na resposta inmunitaria están ben definidas, as MHC de clase III están pouco definidas estrutural e funcionalmente. Non están implicadas na unión a un antíxeno (proceso chamado presentación de antíxeno, unha función clásica das proteínas MHC). Soamente unhas poucas delas están realmente implicadas na inmunidade, mentres que moitas son moléculas de sinalización noutras comunicacións entre células. Son coñecidas principalmente a partir dos seus xenes porque o seu cluster de xenes está situado entre os do clase I e clase II.[1] Este cluster foi descuberto cando se atoparon novos xenes (concretamente os dos compoñentes do complemento C2, C4 e factor B) situados entre os xenes da clase I e II no brazo curto (p) do cromosoma 6 humano. Comprobouse despois que contén moitos xenes que codifican diferentes moléculas de sinalización, como os factores de necrose tumoral (TNFs) e proteínas de choque térmico. Describíronse máis de 60 xenes de MHC de clase III, o que representa un 28 % do total de xenes MHC (224).[2] A rexión previamente considerada dentro do cluster de xenes do MHC de clase III que contén os xenes para os TNFs coñécese agora como MHC de clase IV[3] ou rexión inflamatoria.[4]
A diferenza doutras proteínas MHC, as proteínas do MHC de clase III prodúcense nas células do fígado (hepatocitos) e en glóbulos brancos especiais (macrófagos), entre outras.
Estrutura do xene
[editar | editar a fonte]Os xenes do MHC de clase III están localizados no cromosoma 6 (6p21.3) en humanos. O cluster comprende 700 kb e contén 61 xenes. Este cluster é a rexión máis densa en xenes do xenoma humano. Son basicamente similares aos doutros animais. As funcións de moitos deses xenes é aínda descoñecida.[5] No cluster están localizados moitos retroelementos, como os retrovirus endóxenos humanos (HERV) e os elementos Alu.[6] A rexión que contén os xenes STK19(G11)/C4/Z/CYP21/X/Y, que varía en tamaño de 142 a 214 kb, considérase como o cluster xénico máis complexo do xenoma humano.[7]
Diversidade
[editar | editar a fonte]Os xenes do MHC de clase III son similares en humanos, ratos, anfibios (Xenopus tropicalis) e no opóssum Monodelphis domestica, pero non todos os xenes son comúns. Por eemplo, os xenes NCR3, MIC e MCCD1 humanos están ausentes en ratos. Os NCR3 e LST1 humanos están ausentes nos opóssum.[4] Porén, as aves (polo e codorniz) teñen só un único xene, que codifica un compoñente do sistema de complemento (C4).[8] Nos peixes, os xenes están distribuídos en diferentes cromosomas.[9]
Notas
[editar | editar a fonte]- ↑ Gruen, JR; Weissman, SM (2001). "Human MHC class III and IV genes and disease associations". Frontiers in Bioscience 6 (3): D960–172. PMID 11487469. doi:10.2741/A658.
- ↑ The MHC sequencing consortium (1999). "Complete sequence and gene map of a human major histocompatibility complex". Nature 401 (6756): 921–923. Bibcode:1999Natur.401..921T. PMID 10553908. doi:10.1038/44853.
- ↑ Gruen JR, Weissman SM. Human MHC class III and IV genes and disease associations. Front Biosci. 2001 Aug 1;6:D960-72. doi: 10.2741/gruen. PMID 11487469.
- ↑ 4,0 4,1 Deakin, Janine E; Papenfuss, Anthony T; Belov, Katherine; Cross, Joseph GR; Coggill, Penny; Palmer, Sophie; Sims, Sarah; Speed, Terence P; Beck, Stephan; Graves, Jennifer (2006). "Evolution and comparative analysis of the MHC Class III inflammatory region". BMC Genomics 7 (1): 281. PMC 1654159. PMID 17081307. doi:10.1186/1471-2164-7-281.
- ↑ Xie, T; Rowen, L; Aguado, B; Ahearn, ME; Madan, A; Qin, S; Campbell, RD; Hood, L (2003). "Analysis of the gene-dense major histocompatibility complex class III region and its comparison to mouse". Genome Research 13 (12): 2621–36. PMC 403804. PMID 14656967. doi:10.1101/gr.1736803.
- ↑ Dawkins, R; Leelayuwat, C; Gaudieri, S; Tay, G; Hui, J; Cattley, S; Martinez, P; Kulski, J (1999). "Genomics of the major histocompatibility complex: haplotypes, duplication, retroviruses and disease.". Immunological Reviews 167: 275–304. PMID 10319268. doi:10.1111/j.1600-065X.1999.tb01399.x.
- ↑ Milner, CM; Campbell, RD (2001). "Genetic organization of the human MHC class III region.". Frontiers in Bioscience 6 (3): D914–926. PMID 11487476. doi:10.2741/A653.
- ↑ Shiina, T; Shimizu, S; Hosomichi, K; Kohara, S; Watanabe, S; Hanzawa, K; Beck, S; Kulski, JK; Inoko, H (2004). "Comparative genomic analysis of two avian (quail and chicken) MHC regions". Journal of Immunology 172 (11): 6751–63. PMID 15153492. doi:10.4049/jimmunol.172.11.6751.
- ↑ Sambrook, JG; Figueroa, F; Beck, S (2005). "A genome-wide survey of Major Histocompatibility Complex (MHC) genes and their paralogues in zebrafish". BMC Genomics 6: 152. PMC 1309616. PMID 16271140. doi:10.1186/1471-2164-6-152.