María Brey Mariño

María Brey Mariño

Biografía
Nacemento	4 de setembro de 1910 A Pobra de Trives, España
Morte	3 de febreiro de 1995 (84 anos) Madrid, España
Actividade
Ocupación	crítica literaria, bibliotecaria
Membro de	Corpo Facultativo de Arquiveiros, Bibliotecarios e Arqueólogos (1931–)

María Brey Mariño, nada na Pobra de Trives o 4 de setembro de 1910 e finada en Madrid o 3 de febreiro de 1995, foi unha bibliotecaria, arquiveira, medievalista e tradutora galega.

Traxectoria

Era filla única de Juan Brey Guerra, xuíz da Estrada destinado na Pobra de Trives onde naceu. Estudou en Bilbao, e licenciouse en Filosofía e Letras na Universidade Central de Madrid. Foi bolseira da Junta para Ampliación de Estudios e Investigaciones Científicas no Centro de Estudios Históricos. En agosto de 1931 ingresou por oposición no CFABA, sendo o seu primeiro destino a Biblioteca da Universidade de Santiago de Compostela, e máis tarde, por concurso de méritos, á Biblioteca da Presidencia do Consello de Ministros, en Madrid. Durante a guerra civil trasladouse a Valencia onde traballou na Casa da Cultura que dirixía Antonio Machado, e despois na Xunta de Adquisición de Libros xunto a María Moliner. Depurada en 1940, foi postergada e inhabilitada para desempeñar cargos de confianza durante cinco anos e trasladada ao Arquivo da Delegación de Facenda de Huelva. Posteriormente foi destinada á Biblioteca das Cortes. Exiliouse co seu home en Nova York en 1961, motivado polo veto do ministro de Educación, Jesús Rubio, á entrada de Rodríguez-Moñino na Real Academia Española. Nos Estados Unidos dedicáronse a catalogar os manuscritos poéticos castelás dos séculos XV, XVI e XVII da biblioteca da Hispanic Society of America en Nova York.

Casou co bibliófilo e catedrático Antonio Rodríguez-Moñino en 1939, traballou como tradutora para a Editorial Castalia e a súa colección de clásicos recollidos nas series "Gallardo" e "Ibarra" e, despois en "Odres nuevos".

Finou en Madrid o 3 de febreiro de 1995.

Véxase tamén

Bibliografía

• Redondo Abal, Francisco Xavier (2014). María Brey Mariño. Consello da Cultura Galega.

Ligazóns externas

• "María Brey Mariño". Álbum de Mulleres do Consello da Cultura Galega. 
• María Brey, la tía ilustrada y perseguida de Rajoy en El Mundo
• “A tía de Rajoy foi unha ‘esquerdista nada cordial’” en Galicia Confidencial
• Rodríguez-Moñino Soriano, Rafael : "María Brey Mariño" Real Academia de la Historia.