Marga Faulstich
| Biografía | |
|---|---|
| Nacemento | 16 de xuño de 1915  Weimar, Alemaña |
| Morte | 1 de febreiro de 1998 (82 anos) Maguncia, Alemaña |
| Residencia | Alemaña |
| Actividade | |
| Campo de traballo | Química |
| Ocupación | química |
| Empregador | Schott AG (pt)  (1935–1979) |
| Interesada en | Optical lens design (en) |
Marga Faulstich, nada en Weimar o 16 de xuño de 1915 e finada en Maguncia o 1 de febreiro de 1998, foi unha química alemá que dedicou a súa vida á química dos cristais. Traballou para a empresa Schott AG durante 44 anos sobre máis de 300 tipos de vidro óptico.[1] Rexistrou ao seu nome corenta patentes[2] e foi a primeira muller executiva de Schott AG.
Traxectoria
[editar | editar a fonte]Faulstich tivo dous irmáns e en 1922 a familia trasladouse á cidade de Jena, onde estudou a escola media. Despois de graduarse no instituto en 1935, empezou a formarse como axudante en Schott AG, un dos principais fabricantes de cristais en Europa especializado en óptica e tecnoloxía. Nos seus primeiros anos alí, traballou no desenvolvemento de capas de lámina delgada. Os achados de ciencia básica investigados utilízanse desde entón para a fabricación de lentes de sol, lentes con tratamento antirreflexante e fachadas de vidro.
Grazas ao seu talento, Faulstich avanzou rápido na súa carreira: de axudante a técnico e a asistente científico, e finalmente científica. O seu prometido morreu na segunda guerra mundial e centrouse só na súa carreira. En 1942, estudou química mentres continuaba traballando en Schott. Non puido acabar os seus estudos porque a situación cambiou tras a guerra. Pertencía á zona de ocupación soviética mentres que as instalacións máis avanzadas de vidro do mundo estaban en Jena, e os países aliados querían obter e utilizar o seu know how. En consecuencia, 41 especialistas e directores de Schott AG foron levados ao sector occidental, incluíndo a Faulstich.
En 1949, construíuse un novo instituto de investigación en Landshut para que o persoal de Schott AG puidese continuar o seu traballo. Con todo, despois de que a fábrica de Jena fose expropiada en 1948 e a división de Alemaña establecésese en 1949, decidiuse construír unha nova fábrica en Maguncia-Neustadt para os "41 vidreiros" de Schott AG. A nova fábrica nos arredores de Maguncia Neustadt ('cidade nova') abriuse en 1952, e Faulstich continuou traballando, investigando e desenvolvendo novos vidros, con especial atención a lentes para microscopios e prismáticos. Ademais das súas investigacións, Faulstich dirixiu un crisol.
En 1979, retirouse despois de 44 anos en Schott AG. Pasou os anos seguintes realizando grandes viaxes, pero aínda deu conferencias e presentacións sobre o vidro. Morreu en Maguncia á idade de 82 anos.
Recoñecementos
[editar | editar a fonte]- En 1973, Faulstich recibiu un recoñecemento internacional pola invención da lente lixeira SF 64.[3]
- Google distinguiuna cun doodle na súa páxina de inicio o 16 de xuño de 2018.[4][5]
Notas
[editar | editar a fonte]- ↑ "German Women – Scientists and Inventors – German Culture". germanculture.com.ua. Consultado o 2021-06-20.
- ↑ "Marga Faulstich Inventions, Patents and Patent Applications - Justia Patents Search". patents.justia.com. Consultado o 2021-06-20.
- ↑ "Marga Faulstich, química | Efemérides | Mujeres con ciencia". Mujeres con ciencia (en castelán). Consultado o 25 de julio de 2018.
- ↑ "103. Geburtstag von Marga Faulstich: Dieser Deutschen verdanken wir die Sonnenbrille" (en alemán). Axel Springer. 16 de junio de 2018. Consultado o 16 de junio de 2018.
- ↑ "Marga Faulstich’s 103rd Birthday". www.google.com (en inglés). Consultado o 2021-06-20.
Véxase tamén
[editar | editar a fonte]Bibliografía
[editar | editar a fonte]- "Germany's Female Inventors". Deutsche Welle. Consultado o 19 de enero de 2014.
- "Von Jena nach Mainz – und zurück. Schott-Geschichte zwischen Kaltem Krieg und deutscher Wiedervereinigung." (PDF) (en alemán). Mainz: Schott Glaswerke [Schott Glassworks]. 1995. Arquivado dende o orixinal (PDF) o 06 de decembro de 2008. Consultado o 19 de enero de 2014.
Ligazóns externas
[editar | editar a fonte]- Marga Faulstich, química, no blog Mujeres con Ciencia