Martin McDonagh

Martin McDonagh

(2011)
Biografía
Nacemento	26 de marzo de 1970 (54 anos) Londres (Reino Unido)
Educación	Sacred Heart Catholic School (en) Salesian College (en)
Actividade
Ocupación	director teatral, director de cinema, escritor, guionista, dramaturgo, realizador
Período de actividade	1996 -
Familia
Irmáns	John Michael McDonagh
Premios
(2023)  Golden Globe Award de melhor roteiro (pt) , premiado polo traballo The Banshees of Inisherin (2004)  Óscar á mellor curtametraxe de acción en vivo, premiado polo traballo Six Shooter (pt) (1999)  Europe Theatre Prize (en) (1997)  Plimpton Prize (en)
Descrito pola fonte	Obálky knih,

Martin McDonagh, nado en Camberwell (Londres) o 26 de marzo de 1970, é un dramaturgo e realizador anglo-irlandés, coñecido polas súas pezas teatrais de gran brutalidade e estilo cinematográfico. Considérase que cultiva unha vertente extrema do teatro da crueldade, coñecida como In-yer-face, que destaca o aspecto violento e grotesco das obras para captar a atención do público, e que tivo como predecesor o xénero do monicreque.

Traxectoria

Naceu en Inglaterra, fillo de pais irlandeses. Con 16 anos os pais regresaron a Irlanda, véndose obrigado a deixar os estudos e poñerse a traballar en Londres xunto ao seu irmán máis vello, o guionista John McDonagh. Subsistiu con pequenos traballos e axudas sociais. Pasaba os veráns cos seus pais en Galway.

Desde novo escribiu obras para a radio e a televisión, porén, non lle foron aceptadas.^{[Cómpre referencia]} Entre 1994 e 1995 comezou co teatro. Nas vacacións en Irlanda familiarizouse co dialecto local, que usou en moitas das súas obras para ironizar e salientar o aspecto da vida rural irlandesa e a súa particular poesía.

Obra

En 1996 acadou o premio do Círculo da Crítica Teatral británica ao dramaturgo máis prometedor do ano coa súa primeira obra, A raíña da beleza de Leenane (The Beauty Queen of Leenane), que en 1998 foi nomeada ao Premio Tony á mellor obra. Esta obra inicia unha triloxía de obras ambientadas no Condado de Galway, co que gañou o favor do público e da crítica. O ciclo, The Leenane Trilogy, complétase con Un cranio furado (A Skull in Connemara) e Oeste solitario (The Lonesome West), as dúas de 1997. As tres obras foron coproducidas polo Royal Court Theatre de Londres e o Druid Company Theatre de Galway.

A súa segunda triloxía irlandesa é The Aran Islands Trilogy, ambientada nunhas pequenas illas fronte á costa de Galway. Está composta por O tolleito de Inishmaan (The Cripple of Inishmaan, 1997), The Lieutenant of Inishmore (2001) e The Banshees of Inisheer, sen editar ao non considerala o autor suficientemente boa^{[Cómpre referencia]} a que foi adaptada en 2022 como película nomeada a 9 Oscar. The Cripple of Inishmaan foi estreada no Royal National Theatre (Cottesloe) de Londres. The Lieutenant of Inishmore, estreada en Londres pola Royal Shakespeare Company, é unha comedia negra sobre un terrorista expulsado do IRA pola súa brutalidade, que de volta á súa aldea toma unha sanguenta represalia contra dos que asasinaron o seu gato.

Cartel de The Pillowman, nunha produción da compañía teatral Stage 2, da Universidade Sur de Utah, Estados Unidos.

A súa obra máis coñecida é The Pillowman (2003), a súa primeira obra "non irlandesa". Foi escrita cando McDonagh era dramaturgo residente do Royal National Theatre, onde foi estreada. O actor Jeff Goldblum foi un dos protagonistas da montaxe estreada no Booth Theater de Broadway, en 2005. Trata dun escritor detido pola policía nun estado totalitario debido a que os seus contos se relacionan con asasinatos de nenos. Carentes de probas contundentes, os interrogadores pretenden executalo extraxudicialmente. Os contos (algúns deles postos en escena) sorprenden polos atroces maltratos e asasinatos infrinxidos a nenos. No 2004 a obra recibiu o Premio Laurence Olivier e o Premio do Círculo da Crítica de Nova York á mellor obra estranxeira, e o Premio Tony 2005 ao mellor texto teatral.

Na tempada 2009-10 estreouse a súa seguinte obra, A Behanding in Spokane.

Cine

En 2005 iniciouse no cinema coa curtametraxe Six shooter. Fala dun home que viaxa en tren cara á súa casa unhas horas horas despois da morte da súa esposa, e que se encontra no vagón cun mozo estraño que resulta ser un psicópata. O filme obtivo o Oscar á mellor curtametraxe en 2006.

En xaneiro de 2009 presentouse a súa primeira longametraxe, In Bruges, que abriu o Festival de Sundance. Está protagonizado por Ralph Fiennes, Colin Farrell e Brendan Gleeson. En 2009 gañou o premio BAFTA (British Academy Film Awards) ao mellor guión e foi nomeada ao Oscar ao mellor guión orixinal. Colin Farrell logrou o Globo de Ouro ao mellor actor de comedia. En 2022 dirixiu de novo a Colin Farrell, xunto a Brendan Gleeson en The Banshees of Inisherin.

Traducións

A súa obra foi traducida a 40 linguas e estreada en diversos países. En galego estreáronse A raíña da beleza de Leenane (dirixida por Xúlio Lago), Un cranio furado e Oeste solitario (dirixidas por Quico Cadaval), e mais O tolleito de Inishmaan (dirixida por Cándido Pazó).

Véxase tamén

• Banshee

Ligazóns externas

• Web de Martin McDonagh (en inglés)
• Serra Porteiro, Elisa (2012) Is Irishness part of the joke?: Martin McDonagh’s drama on the Galician stage The Boolean, pp.94-97