Pilar Magadán Chao
| Biografía | |
|---|---|
| Nacemento | 17 de novembro de 1930  Meira, España |
| Morte | 4 de marzo de 2016 (85 anos) Salamanca, España |
| Actividade | |
| Ocupación | folclorista, musicóloga |
| Descrito pola fonte | Gran Enciclopedia Galega Silverio Cañada |
 | |
Pilar Magadán Chao, nada en Meira o 17 de novembro de 1930 e finada en Salamanca o 4 de marzo de 2016,[1] foi unha musicóloga e intérprete galega.
Traxectoria
[editar | editar a fonte]Filla de Manuel Magadán López e de Asunción Chao Abraira, en 1942 aprobou o exame de ingreso no Instituto de Lugo.[2] Residiu en Salamanca desde 1943, e alí estudou peritaxe mercantil, ao tempo que fixo solfexo, harmonía, piano e órgano nos conservatorios de Salamanca e Madrid. Estudou canto na Coruña con María Fraga Irure e en Santander co profesor Llompart.
Baixo a dirección do musicólogo salmantino Aníbal Sánchez Fraile estudou a obra de Francisco Salinas e dos cancioneiros de Dámaso Ledesma e do propio Sánchez Fraile, así como a relación musical e literaria de varias obras de Juan del Encina coa tradición popular cantora de Salamanca.[3][4] En 1970 fundou o grupo musical Voces Blancas Salmantinas.[5] En decembro de 1974, por encargo da Deputación de Salamanca, creou a Escuela de Instrumentistas Populares e desenvolveu unha metodoloxía para a aprendizaxe da gaita e o tamboril salmantinos. Deixou o cargo en 1978.[6]
En 1976 ingresou como membro de número do Centro de Estudios Salmantinos, coa lectura do discurso La canción popular salmantina universal y universitaria, nun acto celebrado na aula Francisco Salinas da Universidade de Salamanca que contou coa presenza de alumnos de dita escola acompañando a actuación do grupo Voces Blancas Salmantinas. Entre 1977 e 1980 o conxunto gravou cinco discos baixo dirección de Pilar Magadán, nos Estudios RCA de Madrid, coa interpretación e análise dunha escolma de tonadas e tocatas salmantinas. A edición, patrocinada pola Caja de Ahorros y Monte de Piedad de Salamanca, reeditouse en CD en 1999 co financiamento de Caja Duero.[7]
En 1991 o pleno do Concello de Ciudad Rodrigo nomeouna membro de número do Centro de Estudios Mirobrigenses. Ingresou o 29 de xuño de 1994 coa lectura do discurso El Santuario de la Peña de Francia y la Diócesis de Ciudad Rodrigo a través de la Canción Popular, nun acto celebrado no claustro da catedral de Ciudad Rodrigo.[8] O discurso reeditouse no ano 2000 acompañado dun disco coas interpretacións de Voces Blancas Salmantinas. Á súa vez o discurso incluíuse no volume La Peña de Francia también es música xunto cos traballos Fiesta en la Peña de Francia e Serranas fuentes inéditas sobre el Santuario de la Peña de Francia.
En febreiro de 1999 o Concello de Ciudad Rodrigo e o CEM encargáronlle un informe sobre o arquivo musical de Dámaso Ledesma, custodiado pola súa familia. O posterior informe fixo que a Biblioteca Nacional de España adquirise o arquivo.
Foron múltiples as actividades de Pilar Magadán, individualmente e co seu grupo: cursiños, recitais e activa colaboración en festas populares de localidades salmantinas; colexio maior San Pablo, de Madrid; Universidade Menéndez Pelayo e Museo de Prehistoria de Santander; Otoño Musical de Aranda de Duero; Jornadas Internacionales de Estudio de El Rebollar (Departamento de Español da Universidade de Orleáns); Cursos de Estranxeiros na Universidade Pontificia de Salamanca. Na Universidade Civil, a Capela do Estudo Salmantino contou coa intervención coral de Voces Blancas Salmantinas, durante os oficios de Semana Santa e na Festa do Corpus Christi, dende 1971 até 1986.
Recoñecementos
[editar | editar a fonte]- Encina Charra da vila de Ciudad Rodrigo polo seu labor na música tradicional salmantina (1986).
Obra
[editar | editar a fonte]- Cancionero Gallego (Galaxia, 1974)
- Notas sobre la canción popular salmantina (Salamanca: El Adelanto-Varona, 1982). Compilación de artigos publicados no xornal El Adelanto e en diversas revistas xunto co discurso de ingreso no CES.
- Fiesta en la Peña de Francia (Salamanca: Editorial San Esteban y Tecnosaga, 1989)
- El Santuario de la Peña de Francia y la Diócesis de Ciudad Rodrigo a través de la Canción Popular (Ciudad Rodrigo: CEM - Ayuntamiento de Ciudad Rodrigo, 1994)
Discografía
[editar | editar a fonte]- Voces Blancas Salmantinas (RCA, 1977)
- Voces Blancas Salmantinas II (RCA, 1978)
- Por tierras salmantinas (RCA, 1979)
- Salamanca, Música popular (RCA, 1979)
- Villancicos de Salamanca (RCA, 1980)
Notas
[editar | editar a fonte]- ↑ J. L. Puerto: “Pilar Magadán”. El Adelanto, 6 de xuño de 2006.
- ↑ "La Provincia". El Progreso (en castelán). 17 de xuño de 1942. p. 2.
- ↑ “Un doble triunfo de D. Aníbal Sánchez Fraile”. El Adelanto, 9 de decembro de 1969.
- ↑ J. I. Yuste: “Pilar Magadán y la enseñanza musical”. El Adelanto, 9 de decembro de 1969.
- ↑ “Recital de canción popular salmantina”, El Adelanto, 10 de febreiro de 1970.
- ↑ “Dimite la directora en la escuela de tamborileros”. Palenque, 9 de outubro de 1978.
- ↑ A. Sánchez: “Las Voces Blancas Salmantinas reeditan sus cinco grabaciones”, El Adelanto, 23 de decembro de 1999.
- ↑ J. Tomás Muñoz: “Ingreso en el CEM”, El Adelanto, 1 de xullo de 1994.
Véxase tamén
[editar | editar a fonte]Bibliografía
[editar | editar a fonte]- Dicionario biográfico de Galicia. Ir Indo Edicións. 2010-2011.
- “Magadán Chao, Pilar”, en VV. AA., Gran Enciclopedia Gallega, t. XXVII, Lugo, El Progreso, 2003, pp. 131-132.
- E. Cobo (2004). “Pilar Magadán y los cancioneros salmantinos”, en Audio-Clásica n.º 95.
- D. Preciado (1984). “Magadán Chao, Pilar”, Revista de Musicología, VII, 1, p. 235.
- Manzano Alonso, Miguel: "Pilar Magadán Chao". Diccionario biográfico español, RAH.
