Lagarta cinsenta

Psammodromus hispanicus
Estado de conservación
Case ameazada
Clasificación científica
Reino: Animalia Filo: Chordata Clase: Sauropsida Orde: Squamata Familia: Lacertidae Subfamilia: Gallotiinae Xénero: Psammodromus Especie: P. hispanicus
Nome binomial
'Psammodromus hispanicus' Fitzinger, 1826
Distribución de Psammodromus hispanicus. Distribución de Psammodromus hispanicus.
Sinonimia
Psammodromus hispanicus, Malmkmus, 1826 Lacerta edwardsiana, Dugés, 1829. Lacerta edwasii, Zang, 1903. Psammodromus edwarsii, Duméril y Bibron, 1839.

A lagarta cinsenta ou cincenta (Psammodromus hispanicus) é unha especie de lagarta da familia Lacertidae, que vive en Francia, Portugal e España e forma parte da fauna de Galicia, aínda que aquí é moi escasa. Viven principalmente en áreas secas e abertas de clima mediterráneo.

Características

Son lagartas pequenas, as menores da herpetofauna galega. Poden ter 50 mm de longo sen contar o rabo, o cal ten unha lonxitude 1,5 veces a do resto do corpo, polo que a lonxitude total con rabo pode chegar a 120 a 130 mm. Cando eclosionan miden só de 20 a 25 mm.

O corpo é delgado cunha pequena cabeza bicuda, e con patas traseiras grandes e moi longas, e rabo delgado. As escamas dorsais teñen quilla e están imbricadas. As do ventre son imbricadas pero sen quilla. A coloración é xeralmente marrón escura, marrón olivácea ou vermello escura ou cor de óxido con moitas manchas irregulares claras, bandas e liñas, especialmente nos flancos. Estas tamén aparecen no dorso, onde xeralmente teñen moitas pequenas bandas brancas beireadas de cor escura. O ventre é amarelado. As femias son máis grandes en primavera porque están cargadas de ovos. Emiten sons agudos cando son capturadas e poden morder; tamén chían durante a cópula. Os machos son máis pequenos que as femias pero de cabeza máis granade. Están activos de día.

Distribución

Encóntranse na maior parte da Península Ibérica, excepto a costa cantábrica e os Pireneos. En Francia poden atoparse ao longo da costa mediterránea. En Galicia é unha especie rara e escasa, que só se atopou na zona de Ourense capital e no val de Verín, que son zonas bastante cálidas, xa que é unha especie moi termófila.

A subespecie edwarsianus encóntrase en Francia, e a subespecie hispanicus na Península Ibérica.

Alimentación e depredación

Basicamente comen insectos e arañas. Son predados por moitas especies: aves, serpes e mamíferos.

Reprodución

Reprodúcense tras saír da súa hibernación en primavera. Despois dunha poucas semanas pon de 2 a 8 ovos, debaixo de palla ou moreas de ramas, que se incuban durante unhas 8 semanas. A femia pode facer dúas postas. Durante o cortexo e a cópula o macho persegue á femia mordéndoa no rabo, extremidades e no lombo, e a cópula é breve.

Vive só 2 ou 3 anos, e moitos exemplares morren despois da primeira temporada de apareamento; alcanzando a súa madurez sexual no seu primeiro ano.

Hábitat

Habita zonas con vexetación arbustiva mediterránea, praderías temperadas, áreas costeiras areosas, terras de cultivo, pasteiros e xardíns rurais. Está ameazada pola perda do seu hábitat e a IUCN considéraa nas súas listas como "Case ameazada" (NT). Atópanse ata os 1.500 m de altura.

Notas

• Reptiles & Amphibians of France Reptiles & Amphibians of France website.

Véxase tamén

Outros artigos

• Psammodromus manuelae
• Psammodromus algirus
• Lista de réptiles de Galicia

Ligazóns externas

• Fotos desta especie.