Tesouro de Bedoya

Tesouro de Bedoya
Arracadas.
Tipo	Xoiaría / Moedas / Caldeiro
Características
Materiais	Ouro e prata
Descuberta
Localización	Ferrol, Galicia
Data	c. 1940
Conservación
Localización	Museo de Pontevedra

O tesouro de Bedoya é un conxunto de pezas de ouro e prata atopadas en Ferrol e conservadas no Museo de Pontevedra.

Historia

O nome do tesouro vén dado polo apelido da familia Bedoya que o atopou descoñecéndose o lugar exacto do seu achado ou procedencia. Foi atopado na década de 1940 nunha eira no lugar da Chousa, na parroquia de Doniños. Francisco Bedoya Fojo mandou limpar a leira, e o servente atopou un pequeno caldeiro de bronce con algo que brillaba no interior. O atopado foi gardado durante 10 anos no faiado da casa. O tesouro foi amosado a Xosé Filgueira Valverde, entón director do Museo de Pontevedra, que certificou a súa autenticidade. O 12 de outubro de 1953 o Museo de Pontevedra mercou o tesouro por 30.000 pesetas.

Descrición

O tesouro está formado por pezas de ouro de orixe castrexa e por aneis e moedas de ouro e prata da época romana:

• Un diadema de ouro;
• Dúas arracadas de ouro, de tipo arriñonado;
• Dúas arracadas de ouro, de tipo laberintiforme;
• Un anel signatario de ouro, con entalle;
• Un anel de ouro, cunha pedra (ametista) engarzada;
• Dous áureos, datados entre os anos 54 e 85 despois da era actual;
• Vinte e sete denarios de prata, datados entre os anos 63 antes da era actual a 91 despois da actual;
• Un caldeiro de bronce, o que contiña o tesouro.

Véxase tamén

Outros artigos

• Tesouro

Ligazóns externas

• O tesouro de Bedoya: análise de localización. GRUPO DE ARQUEOLOXÍA DA TERRA DE TRASANCOS. Anuario Brigantino.
• Sección de ourivería do Museo de Pontevedra^{[Ligazón morta]}