Tesouro de Shaikhan Dehri
| Tesouro de Shaikhan Dehri | |
 Moeda ateniense (ca. 500/490-485 a.C.) parte do tesouro. É o exemplo máis antigo coñecido do seu tipo achado no leste do país.[1] | |
| Tipo | Moedas aqueménidas e gregas |
| Cultura | Imperios aqueménida e grego |
| Características | |
| Materiais | Prata |
| Descuberta | |
| Localización | Charsadda,  Paquistán34°10′4.8″N 71°44′9.6″L / 34.168000, -71.736000 |
| Data | 2007 |
O tesouro de Shaikhan Dehri é un pequeno conxunto de moedas de prata e obxectos afíns descuberto en 2007 no sitio arqueolóxico da antiga cidade india de Pushkalavati, nas proximidades de Charsadda, no actual Paquistán.[2]
Contido do achado
[editar | editar a fonte]O tesouro pesaba 14 quilogramos e contiña tanto barriñas dobradas de prata como moedas redondas "de novo tipo". O tesouro sitúase no contexto da conquista aqueménida do val do Indo, e tamén pode relacionarse con outro famoso tesouro da rexión, o tesouro de Chaman-e-Hozori, en Cabul.[2]
Moedas
[editar | editar a fonte]Entre o seu contido é de salientar un tetradracma cuñado en Atenas cara a 500/490-485 a.C., ou posiblemente xa en 520 a.C., xunto con varios tipos locais e discos de prata fundida.[2] A moeda de Atenas é o primeiro exemplo coñecido do seu tipo descuberto nunha zona tan oriental.[1] Ademais desta, hai tamén moedas redondas punzonadas, cuxas marcas consisten en motivos xeométricos formados por un círculo central e liñas arredor.[2]
Barriñas curvadas
[editar | editar a fonte]Pola súa banda, as barras curvadas e punzonadas achadas son similares ás presentes no tesouro de Cabul, e o investigador numismático Osmund Bopearachchi atribúeas aos Paropamisadae. Son de peso estándar aqueménida, equivalentes a 1 siclo (5,5 g) ou a 2 siclos (11 g), e miden entre 25 mm e 30 mm de lonxitude. Son diferentes das barras dobradas e con marcas de punzón achadas en Taxila, estas dunha lonxitude claramente superior (35 e 55 mm).[2]
Discos sen cuñar e lingotes
[editar | editar a fonte]Ademais das moedas e as barriñas curvadas, no tesouro había tamén discos de prata sen cuñar, así como lingotes de prata duns 400 g cada un utilizados para a fabricación de moedas, o que correspondería á produción mediante fundición de arredor de 72 siclos aqueménidas. Demostrouse que a composición destes lingotes é estritamente igual á da moeda local —e diferente da composición dos siclos reais aqueménidas estándar—, o que demostra que xa no século V a.C. se fabricaban moedas en Pushkalavati, e que as técnicas metalúrxicas de cuñaxe de moedas xa estaban dispoñibles nas satrapías indias do Imperio Aqueménida naquela época, moito antes da chegada de Alexandre o Grande.[2]
![Disco de prata do período Pushkalavati, Gandhara.[3]](/wiki/Ficheiro:Ingot_Pre-Mauryan_(Gandhara)._Period_of_Achaemenid_Rule._Circa_5th_century_BCE.jpg)
![Barriña curta punzonada emitida baixo administración aqueménida.[4]](/wiki/Ficheiro:Paropamisadae_short_punch-marked_bent_bars.jpg)
![Moeda punzonada emitida no val de Cabul baixo administración aqueménida.[5]](/wiki/Ficheiro:Achaemenid_Empire_coin._Uncertain_mint_in_the_Kabul_Valley._Circa_500-380_BCE.jpg)
Notas
[editar | editar a fonte]- ↑ 1,0 1,1 "A Truly International Currency". Classical Numismatic Group (CNGcoins.org).
- ↑ 2,0 2,1 2,2 2,3 2,4 2,5 Bopearachchi, O. (2017). Páxinas 17-21.
- ↑ "Achaemenid Period Ingot". Classical Numismatic Group (CNGcoins.org).
- ↑ "Central Asian. Ancient India. Lot of six (6) AR denominations". Classical Numismatic Group (CNGcoins.org).
- ↑ "Extremely Rare Early Silver from the Kabul Valley". Classical Numismatic Group (CNGcoins.org).
Véxase tamén
[editar | editar a fonte]Bibliografía
[editar | editar a fonte]- Bopearachchi, O. (2017). "Achaemenids and Mauryans: Emergence of Coins and Plastic Arts in India". En Patel, A.; Daryaee, T. (eds.). India and Iran in the Longue Durée. UCI Jordan Center for Persian Studies. Páxinas 15-48. ISBN 978-0998863207