Tesouro de West Bagborough
| Tesouro de West Bagborough | |
 | |
| Tipo | 681 moedas romanas |
| Data | c. 367 |
| Cultura | Roma Antiga |
| Características | |
| Materiais | Prata |
| Descuberta | |
| Localización | West Bagborough, Somerset, .svg){kind=small} Reino Unido
|
| Coordenadas | 51°5′24″N 3°10′48″O / 51.09000, -3.18000 |
| Descubridor/a | James Hawkesworth |
| Data | 10 de outubro de 2001 |
| Conservación | |
| Localización | Museo de Somerset |
O tesouro de West Bagborough é un conxunto de 681 moedas romanas e 72 fragmentos do mesmo metal, de mediados do século IV d. C., achado en outubro de 2001 preto de West Bagborough, en Somerset, Inglaterra.
O achado
[editar | editar a fonte]Este depósito foi descuberto o 10 de outubro de 2001[1] por James Hawkesworth, un policía da localidade de Bishops Lydeard afeccionado ás procuras con detector de metais.[2] Nas proximidades non se apreciaron rastros de edificios nin de ningún outro tipo de estrutura, do que se deduce que o conxunto se depositou nun lugar illado.[3][4]
O achado comunicóuselle inmediatamente ao xuíz de instrución de West Somerset, quen o puxo ao coidado do Museo do Condado de Somerset. Logo da correspondente investigación levada a cabo en Taunton, o conxunto foi declarado formalmente "tesouro" en abril de 2002,[5] consonte a Lei do Tesouro de 1996, e valorouse en 40.650 libras.[4]
O tesouro foi adquirido polos Servizos Museísticos do Condado de Somerset, co apoio financeiro do Consello do Condado de Somerset e do Heritage Lottery Fund.[4] Ademais, outras entidades e particulares fixeon as súas doazóns, entre eles o Victoria and Albert Museum, que achegou 16.400 libras, a través do seu fondo de subvencións para a adquisición de recursos.[6]
Logo da súa adquisición, o tesouro exponse no Museo de Somerset, nos terreos do castelo de Taunton.[7]
Contido
[editar | editar a fonte]Entre as 681 moedas de prata hai dous denarios de principios do século II, e oito miliarenses e 671 siliquas, todas elas do período 337-367 d.C. Entre elas hai arredor de 50 de copias, algunhas integramente de prata de boa lei e outras dunha aliaxe de cobre recuberta por unha lámina de prata.[2][4]
Os fragmentos de prata que acompañaban as moedas deste tesouro pesan en conxunto 722 gramos.[1][8] Trátase de restos de prata fundida, vertida e cortada con cicel, logo de arrefriar.[9]
A datación das moedas indica que o tesouro foi soterrado cara a 365 d. C. A maior parte das moedas foron cuñadas nos períodos de Constancio II (337-361) e Xuliano (361-363), e proceden de diversas cecas imperiais romanas, como as de Arles e Lugdunum, en Francia, Tréveris en Alemaña, e Roma.[4]
Na seguinte táboa reflíctese a distribución por períodos das moedas do achado:[1][8]
| Emperador | Período | Exemplares |
|---|---|---|
| Traxano | 98-117 | 1 |
| Marco Aurelio | 139-161 | 1 |
| Século II | 2 | |
| Dinastía constantiniana | 307-363 | 603 |
| Dinastía valentiniana | 364-392 | 12 |
| (Incerto) | 161-180 | 52 |
Notas
[editar | editar a fonte]- ↑ 1,0 1,1 1,2 Abdy, R.; Minnitt, S. (2002).
- ↑ 2,0 2,1 "Policeman digs up clues to ancient crime". En BBC. 4 de abril de 2002.
- ↑ "39765: Excavation (2001), Coin Hoard, West Bagborough". Somersetheritage.org.uk
- ↑ 4,0 4,1 4,2 4,3 4,4 Minnit, S. (2003).
- ↑ "15127: Roman coin hoard, West Bagborough". Somersetheritage.org.uk
- ↑ "Grants Listing: Towns & Cities S-Z". Purchase Grant Fund. Victoria and Albert Museum.
- ↑ Minnit, S. (2003).
- ↑ 8,0 8,1 "Comparison of Roman coin finds reported in the "Treasure Annual Reports" 1997-2001". Forumancientcoins.com
- ↑ Minnit, S. (2003).
Véxase tamén
[editar | editar a fonte] |
Wikimedia Commons ten máis contidos multimedia na categoría: Tesouro de West Bagborough |
Bibliografía
[editar | editar a fonte]- Abdy, R.; Minnitt, S. (2002). "196: West Bagborough, Somerset: 669 Roman silver coins". En Treasure Annual Report 2001. Department for Culture, Media and Sport. Páxina 97.
- Bland, R. (2018). Coin Hoards and Hoarding in Roman Britain AD 43-c.498. British Numismatic Society / Spink. ISBN 9781907427794
- Minnit, S. (2003). "West Bagborough Hoard of Roman Silver". En Somerset Archaeological and Natural History Society Newsletters. Nº 67.