Carrán elegante

O carrán elegante (Thalasseus elegans, antes Sterna elegans) é un carrán da familia Laridae. Reprodúcese nas costas do Pacífico do sur dos Estados Unidos e México e pasa o inverno no sur do Perú, Ecuador e Chile.

Esta especie reprodúcese en densas colonias en illas da costa, como as illas mexicanas Illa Rasa e illa Montague, e excepcionalmente no continente en lagos de auga doce grandes axeitados preto da costa. Nidifica nunha escavación no chan e pon un ou dous ovos. A diferenza dalgúns dos carráns brancos máis pequenos, non é moi agresivo cos posibles predadores, confiando na gran densidade dos niños (a miúdo separados só por 20–30 cm) e na nidificación preto doutras especies máis agresivas, como a gaivota Larus heermanni, para evitar a predación.

Aliméntase mergullándose para pescar, case invariablemente no mar, como a maioría dos carráns Thalasseus. Xeralmente mergúllase directamente. O macho ofrece peixes á femia como parte do cortexo.

Esta especie do Pacífico chega errabunda ata o oeste de Europa como unha ave vagante rara, nidificou en España e ten hibridado co carrán cristado en Francia; hai tamén un rexistro en Cidade do Cabo, Suráfrica en xaneiro de 2006, que foi o primeiro rexistro en África desta especie. Un exemplar foi rexistrado nas Illas Británicas, en Pagham, Sussex occidental en xuño de 2017. E maio de 2021, 1500 niños feitos na area con miles de ovos foron abandonados cando un dron se estrelou preto do sitio de nidación da Reserva Ecolóxica de Bolsa Chica (California), espantando a 2.500 carráns elegantes nidificantes e causando unha perda catastrófica.

Etimoloxía

O nome do seu xénero actual significa en antigo grego 'pescador' e deriva de thalassa, 'mar', e o nome específico deriva do latín elegans, 'elegante'. O xénero foi creado cando un estudo de 2005 puxo en evidencia que a sistemática dos carráns tiña que ser revisada. Antes estaba dentro do xénero Sterna.

Identificación

Voando

Este é un carrán de tamaño medio-grande cun bico longo e delgado de cor alaranxada, dorso gris claro e parte ventral branca. As patas son negras. En inverno a fronte faise branca. A súa chamada é un característico ruído alto renxente como o do carrán cristado.

Podería confundirse co carrán real americano ou co carrán de Forster, pero o carrán real americano é meirande e con bico máis groso e mostra máis cor branca na fronte en inverno. Fóra da súa área de distribución habitual, pode tamén confundirse doadamente co carrán bengalés. Ver tamén as ligazóns externas do final da páxina.

Esta especie é algo máis clara pola parte superior que o carrán bengalés cun sobrecú branco (non gris), cun bico lixeiramente máis longo e delgado cunha curvatura diferente. O negro da súa crista que baixa desde a coroa esténdese polo ollo, creando un pequeno "borrón" negro fronte aos ollos. Nos carráns reais americanos, a crista negra acaba no ollo, e o carrán bengalés ten unha crista menos espeluxada.

Medidas:

• Lonxitude: 39–42 cm
• Peso: 190–325 g
• Envergadura das ás: 76–81 cm

Notas

Ligazóns externas

• Busca en Flickr de carán elegante