Voo 605 de Indian Airlines
| Voo 605 de Indian Airlines | |
|---|---|
 Airbus A320 semellante ao do accidente
| |
| Resumo | |
| Data | 14 de febreiro de 1990 |
| Causa | erro do piloto, fallos de deseño do avión e automatización |
| Lugar | val de Challaghatta próximo aeroporto HAL |
| Coordenadas | Coordenadas: 12°56′53″N 77°38′52″L / 12.948055555556, 77.647777777778 |
| Orixe | aeroporto Chhatrapati Shivaji |
| Destino | aeroporto HAL |
| Finados | 92 |
| Feridos | 54 |
| Aeronave | |
| Tipo de aeronave | Airbus A320-231 |
| Operador | Indian Airlines |
| Rexistro | VT-EPN |
| Pasaxeiros | 139 |
| Tripulación | 7 |
| Superviventes | 54 |
O voo 605 de Indian Airlines era un servizo regular doméstico de pasaxeiros dende Bombai ata Bangalore. O 14 de febreiro de 1990 o Airbus A320-231 con rexistro VT-EPN que operaba a ruta esnafrouse nun campo de golf mentres intentaba aterrar en Bangalore, matando 92 dos seus 146 ocupantes.
O voo 605 foi o oitavo accidente con máis vítimas mortais na India. O accidente causou a segunda perda e accidente fatal dun Airbus A320, despois do voo 296 de Air France.[1]
Segundo o informe publicado polo equipo de investigación indio, a causa probable determinouse que foi a incapacidade dos pilotos para avanzar os aceleradores, incluso despois dos avisos de altitude de "400", "300" e "200" pés durante o descenso.[1] O informe dixo que a tripulación do voo 605 non era consciente da situación e do perigo que estaban enfrontando no momento, provocando unha reacción tardía durante o descenso.[1]
Tras o accidente o comité de investigación indio publicou 62 recomendacións para a Dirección Xeral de Aviación Civil india (DGCA), incluíndo o rexistro das horas nas cintas do control de tráfico aéreo e a formación de varios comités de investigación especializados en varios temas operacionais da aviación. Incluídas nas recomendacións estaba a adición dunha sirena de accidentes en Bangalore, a avaliación da porta de evacuación e as ramplas nos Airbus, e un cambio de deseño no botón dos instrumentos. O informe tamén instou o goberno a avaliar todos os aeroportos da India para evitar incidentes semellantes.[2]
O accidente xerou críticas na Asociación de Pilotos Comerciais india que afirmaba que o Airbus A320 tiña fallos graves. Alegaron que os sistemas do avión eran demasiado confusos e que a tripulación do voo 605 se esforzou por evitar o accidente.[2]
Voo[editar | editar a fonte]
Engalaxe e aproximación[editar | editar a fonte]
O voo 605 engalou do aeroporto de Bombai ás 11:58 hora local tras unha hora de atraso. Antes disto, o avión fora usado noutros dous voo o mesmo día do accidente, operando como voo 669 e voo 670, voando de Bombai a Goa e regresando. O aparello era un Airbus A320-231 con rexistro VT-EPN, que levaba 139 pasaxeiros e 7 tripulantes. A engalaxe e o voo foron normais.[2]
Ás 12:53 hora local, a trama de radar do voo 605 apareceu no radar de Bangalore. Entón solicitóuselle que virase á dereita e fixese unha aproximación visual á pista 09. A tripulación desactivou o piloto automático e despois cambiou á torre de Bangalore tras ser transferidos polo radar de Bangalore.[2]
Accidente[editar | editar a fonte]
Mentres o voo 605 estaba intentando aterrar o tren de aterraxe tocou terra no Karnataka Golf Club, a uns 2 800 pés do aeroporto. A meirande parte da xente no avión, incluídos algúns tripulantes, pensaron que o avión tocara na pista. O voo 605 entón ascendeu, pero despois impactou contra o chan por segunda vez. O impacto causou que os cintos de seguridade de varias persoas rompesen, facendo que fosen proxectadas dos asentos e golpeasen o chan do avión. O voo 605 golpeou un terraplén. Os dous motores e o tren de aterraxe separáronse do avión. O aparello voou sobre unha estrada e esnafrouse nunha área de herba e rochas preto do aeroporto.[2]
Busca e rescate[editar | editar a fonte]
Tras o accidente iniciouse un incendio e os superviventes comezaron a escapar dos restos ardendo. Varias persoas conseguiron saír do avión por unha abertura na fuselaxe. Os tripulantes de cabina que sobreviviron abriron a porta de emerxencia e comezaron a evacuar os pasaxeiros. No accidente morreron polo menos 92 persoas, 88 pasaxeiros e 4 tripulantes, mentres que 54 sobreviviron con feridas. 2 persoas morreron polas súas feridas tras o accidente.[2]
Segundo testemuñas, non chegaron brigadas de bombeiros ao lugar do accidente xa que non había instalacións para comunicarse entre a torre e os vehículos de bombeiros. Había dispoñible un transmisor de radio portátil para as comunicacións entre a torre e a estación de bombeiros do aeroporto, pero ese día non estaba operativo.[2]
