W. E. B. Du Bois
.jpg)
William Edward Burghardt Du Bois, ás veces chamado Web Dubois, nado en Great Barrington (Massachusetts) o 23 de febreiro de 1868 e finado en Ghana o 27 de agosto de 1963, foi un sociólogo, historiador e socialista afroamericano de orixe haitiana que loitou polo recoñecemento dos dereitos cívicos dos negros nos Estados Unidos. Foi tamén editor e poeta. Pertenceu á francmasonería.
Foi laureado co Premio internacional da paz (outorgado polo Consello mundial da paz) en 1952 e co Premio Lenin da paz en 1959.
Traxectoria
[editar | editar a fonte]Orixes familiares e primeiros anos
[editar | editar a fonte]William Edward Burghard Du Bois naceu o 23 de febreiro de 1868 en Great Barrington, Massachusetts, fillo de Alfred Du Bois e Mary Silvina Burghardt Du Bois.[1] A familia materna formaba parte dunha pequena comunidade de persoas negras libres de Great Barrington, e posuía terras na rexión. Ademais, a nai descendía de devanceiros holandeses, africanos e ingleses.[2] O bisavó de Du Bois era Tom Burghardt, un escravo (nado no occidente africano contra 1730) do colono holandés Conraed Burghardt. Tom serviu brevemente no Exército Continental durante a Guerra de Independencia dos Estados Unidos de América, o que puido ser a causa da súa liberación a finais do século XVIII. O fillo de Tom Burghardt, Jack Burghardt, foi á súa vez pai de Othello Burghardt, avó de W. E. B. Du Bois.[3]
W. E. B. Du Bois afirmaba ser parente de Elizabeth Freeman, que segundo el casou co seu bisavó Jack Burghardt.[4][5] Porén, Freeman era 20 anos maior ca Burghardt, e non existe rexistro oficial dese matrimonio. É posible que Burghardt casase coa filla de Freeman, Betsy Humphrey, tras ser abandonada polo seu esposo Jonah Humphrey, e tras o pasamento da primeira muller de Burghardt cara a 1810. Hai evidencia parcial de que ambos mantiveron algún tipo de relación íntima.[6]
O bisavó paterno de W. E. B. Du Bois foi James Du Bois (de Poughkeepsie, Nova York), un home francoamericano de orixe hugonote casado cunha muller escrava.[7] Un dos seus fillos foi Alexander, nado en Long Cay, nas Bahamas, en 1803; este emigrou xunto co seu pai aos Estados Unidos en 1810.[8] Alexander Du Bois estivo un tempo traballando en Haití, onde naceu Alfred Du Bois, froito das súas relacións cunha amante. Alexander regresou a Connecticut, deixando en Haití ao seu fillo.[9]
Arredor de 1860, Alfred Du Bois viaxou aos Estados Unidos, establecéndose en Massachusetts. Casou con Mary Silvina Burghardt o 5 de febreiro de 1867 en Housatonic, unha vila situada en Great Barrington.[9] Alfred abandonou a Mary en 1870, dous anos despois do nacemento do seu fillo William, quizais por presións da familia materna.[10] Mary Du Bois mudouse a casa dos pais en Great Barrington, onde viviron até que o fillo cumpriu os cinco. Mary traballou para contribuír ao fogar (malia a oposición do seu irmán e veciños), mais faleceu dun ictus a comezos da década de 1880. Faleceu en 1885.[11][12]
A poboación de Great Barrington era en gran parte de orixe europea, mais Du Bois puido asistir á escola pública local e xogar cos seus compañeiros brancos. Porén, xa de adulto, escribiu sobre o racismo que viviu como fillo abandonado e membro dunha minoría. O profesorado, recoñecendo a súa capacidade, animouno a continuar as súas pescudas intelectuais. Du Bois pensaba que podía empregar os seus coñecementos para apoderar ás persoas afroamericanas.[13] En 1884, graduouse do instituto de Great Barrington con matrícula. A congregación da súa igrexa local fixo unha colecta para financiar a súa educación universitaria.[14]
Formación
[editar | editar a fonte]Estudou na Fisk University de Nashville (Tennessee), e logo en Harvard a partir de 1888. Foi o primeiro negro norteamericano graduado cun doutoramento en Filosofía por Harvard en 1895.
Madurez
[editar | editar a fonte]Despois dos seus estudos en Harvard e en Berlín, publicou unha das primeiras obras sociolóxicas americanas: The Philadelphia Negro (O negro de Filadelfia). Ensina na Universidade de Atlanta e publica en 1903 o ensaio The Souls of Black Folk. Foi tamén autor de varias novelas, das que destaca The Dark Princess (A Princesa Negra).
En 1909, participou na creación da NAACP, e dirixiu o seu xornal, The Crisis.
A partir dos anos 1940, mostra unha simpatía crecente polas teses comunistas. En 1961, con 93 anos, afilíase oficialmente ao Partido comunista dos USA. Logo emigrou a Ghana, da que recibiu a nacionalidade, e onde faleceu en 1963.
Notas
[editar | editar a fonte]- ↑ Lewis 2009, p. 11.
- ↑ Lewis 2009, pp. 14-15.
- ↑ Lewis 2009, p. 13.
- ↑ Du Bois 1984, p. 11.
- ↑ Lewis 1993, p. 14.
- ↑ Piper & Levinson 2010.
- ↑ Lewis 2009, p. 17.
- ↑ Chandler 2014, pp. 100-103.
- ↑ 9,0 9,1 Lewis 2009, p. 18.
- ↑ Lewis 2009, p. 21.
- ↑ Rabaka 2007, p. 165.
- ↑ Lewis 2009, pp. 29-30.
- ↑ Lewis 2009, pp. 27-44.
- ↑ Lewis 2009, pp. 39-40.
Véxase tamén
[editar | editar a fonte]Bibliografía
[editar | editar a fonte]- Du Bois, W. E. B. (1984). Dusk of Dawn (en inglés). Transaction Publishers.
- Chandler, Nahum Dimitri (2014). X: The Problem of the Negro as a Problem for Thought (en inglés). Fordham University Press. ISBN 978-0-8232-5407-1.
- Lewis, David Levering (1993). W. E. B. Du Bois: Biography of a Race 1868-1919 (en inglés). Henry Holt and Co.
- Lewis, David Levering (2009). W. E. B. Du Bois: A Biography (en inglés). Henry Holt and Co. ISBN 978-0-8050-8769-7.
- Piper, Emilie; Levinson, David (2010). One Minute of a Free Woman: Elizabeth Freeman and the Struggle for Freedom (en inglés). Upper Housatonic Valley National Heritage Area. ISBN 978-0-9845492-0-7.
- Rabaka, Reiland (2007). W. E. B. Du Bois and the Problems of the Twenty-first Century: An Essay on Africana Critical Theory (en inglés). Lexington Books.
| Control de autoridades |
|
|---|
- Sociólogos dos Estados Unidos de América
- Activistas afroamericanos
- Escritores en lingua inglesa
- Activistas polos dereitos humanos dos Estados Unidos de América
- Nados no condado de Berkshire, Massachusetts
- Nados en 1868
- Finados en 1963
- Estadounidenses de ascendencia francesa
- Estadounidenses de ascendencia neerlandesa
- Estadounidenses de ascendencia inglesa
- Alumnos da Universidade Humboldt de Berlín
- Premio Lenin da Paz