Wajdi Mouawad

Wajdi Mouawad

(2019)
Biografía
Nacemento	16 de outubro de 1968 (56 anos) Dair al-Qamar, Líbano
Educación	Escola Nacional de Teatro do Canadá
Actividade
Ocupación	actor, director de cinema, guionista, escritor, dramaturgo, director
Premios
(2021)  Premio Europeo de Dramaturgo (2010)  Cabaleiro da Orde Nacional do Quebec (2009)  Gran Premio do Teatro da Academia Francesa (2004)  Premio Jacqueline-Déry-Mochon (2000)  Premios literarios do Gobernador Xeral  Oficial da Orde do Canadá  cabaleiro da orde das Artes e as Letras
Sitio web	wajdimouawad.fr

Wajdi Mouawad (en árabe: وجدي معوض), nado en Beirut o 16 de outubro de 1968, é un escritor, actor e director de teatro canadense.

Traxectoria

Naceu no seo dunha familia libanesa cristiá-maronita. Os seus pais fuxiron do Líbano a París, Francia, en 1977 por mor dos conflitos civís que arrasaron o país até a década de 1990. Cinco anos máis tarde, en 1983, estabelecéronse no Quebec. Diplomouse en 1991 pola Escola Nacional de Teatro do Canadá. De 2000 a 2004, dirixiu o Teatro de Quat'Sous de Montreal e, en 2005, fundou as compañías de creación "Au carré de l'hypoténuse", en Francia, e "Abé carré cé carré" en Montreal con Emmanuel Schwartz.

Alcanzou renome internacional tralo éxito da súa tetraloxía Le sang des promesses (Forêts, Littoral, Incendies, Ciels), escrita e dirixida por el.

En 2009, foi o artista asociado do Festival de Avignon e recibiu o Gran premio do teatro da Academia francesa polo conxunto da súa obra dramática. De 2007 a 2012 foi director artístico do Teatro Francés do National Arts Center (NAC) (en inglés) ou Centre National des Arts (CNA) (en francés) de Otava. Naqueles anos, foi asociado do Espace Malraux de Chambéry (Francia) coa súa compañía francesa, Au carré de l’hypoténuse, creada en 2005 á vez que a súa compañía quebequesa, Abé Carré Cé Carré. Foi artista asociado do teatro Le Grand T de Nantes (Francia) a partir de 2012, e dende abril de 2016 é o director do teatro nacional da Colline, en París.