Cinco tribos civilizadas
O termo "cinco tribos civilizadas" provén da era colonial e comezos do período federal na historia dos Estados Unidos de América. Fai referencia ás cinco nacións nativas americanas, os cherokees, os chickasaw, os choctaw, os muskogee e os seminole.[1] Estas eran as cinco primeiras tribos que os colonos anglo-europeos consideraron "civilizadas" segundo a súa visión propia do mundo, xa que estas cinco tribos adoptaron atributos da cultura colonizadora moi axiña,[2] como por exemplo, o cristianismo, gobernos centralizados, alfabetización, constitucións escritas, matrimonios con brancos e plantacións con escravos. As cinco tribos civilizadas tenderon a manter relacións políticas estables cos europeos.
Historia
[editar | editar a fonte]
As tribos "civilizadas" eran uns pobos indíxenas de América que vivían no sueste dos Estados Unidos. A maioría son descendetes do que hoxe se coñece como cultura do Mississippi, unha cultura agrícola que cultivaba millo e fabas, con elites relixiosas e políticas hereditarias. Esta cultura agromou no medio oeste, no leste e no sueste entre os anos 800 e 1500. Antes do contacto cos europeos, estas tribos eran sociedades polo xeral matrilineais. A agricultura era a súa principal fonte económica. Gran parte das tribos vivían en vilas (algunhas poboadas por milleiros de persoas). Estas comunidades regulaban o seu espazo co trazado de rúas, subdivididas en zonas residencias e áreas públicas. O seu sistema de goberno era hereditario. Os seus dominios variaban de tamaño e complexidade, cun alto nivel de organización militar.[3]
George Washington e Henry Knox propuxeron unha axenda de transformación cultural na súa relación dos nativos americanos. Os cherokees e os choctaw adoptaron e apropiáronse de certos aspectos coloniais da federación de colonias. No tempo da Declaración de Independencia, a cultura dos Estados Unidos como nación estaba xurdindo con gran forza. Moitas das prácticas culturais adoptadas polas cinco tribos foron aquelas que eles atoparon como máis útiles.[4]
A comezos do século XIX, o goberno dos Estados Unidos iniciou un proceso de desprazamento das sociedades nativas que vivían ó leste do río Mississippi, incluíndo as cinco tribos, cara a terras ó oeste do río. Este desprazamento inicial supuxo a deportación dos indios dos Estados Unidos de América e forzou a un número significativo de membros das cinco tribos ó territorio indio e a outras partes do continente. Un número importante foi desprazado á área que sería coñecida no futuro como o estado de Oklahoma. No momento do seu traslado as tribos eran nacións en estado de suzeranía.
O desprazamento federalmente lexislado das tribos dende os seus fogares ancestrais no leste foi un proceso que levou varias décadas tamén coñecido como sendeiro das bágoas. O territorio ó que foron desprazados coñecíase naquela época como territorio indio, que se corresponde co actual leste de Oklahoma. A deportación máis infame foi a dos cherokees en 1838, cando o presidente Martin Van Buren fixo cumprir o controvertido Tratado de New Echota coa nación cherokee. Un punto de discordia con respecto ó tratado é se se tratou dun instrumento de desprazamento masivo en violación dos dereitos humanos sobre os cales se estabeleceu a nova república ou dun intercambio legal de territorios.
Durante a guerra civil estadounidense, os representantes das cinco tribos estaban enfrontadas. Os choctaw e os chickasaw loitaron a carón dos Confederados metres que os muskogee e os seminoles loitaron a prol da Unión. Por outra banda, os cherokees loitaron entre eles nunha guerra civil entre unha maioría a prol dos confederados e unha minoría a prounionista. Como elemento da reconstrución despois da guerra civil, os tratados da reconstrución foron asinados coas nacións indíxenas, que anteriomente asinaran tratados cos Estados Confederados de América. A guerra civil foi desastrosa para as tribos, xa que as tres primeiras batallas loitáronse en territorio indio.[5]
Unha vez que as tribos foron recolocadas no territorio indio, o goberno dos Estados Unidos prometeulles que esas terras estarían libres de colonos brancos. Algúns colonos violaron esa promesa con total impunidade, mesmo antes de 1893, cando o goberno abriu o "Cherokee Strip" para fixar asentamentos brancos no Oklahoma Land Run. En 1907, o territorio de Oklahoma e o territorio indio foi fusionado para crear o estado de Oklahoma. En comparación con outros estados, as cinco tribos teñen poboacións significativas en Oklahoma hoxe en día.
Notas
[editar | editar a fonte]- ↑ Clinton, Fred S. Oklahoma Indian History, from The Tulsa World Arquivado 24 de agosto de 2017 en Wayback Machine.. The Indian School Journal, Volume 16, Number 4, 1915, page 175-187.
- ↑ Encyclopedia of Oklahoma History & Culture (ed.). "Five Civilized Tribes". Oklahoma Historical Society. Arquivado dende o orixinal o 28 de decembro de 2014. Consultado o 22 de xaneiro de 2015.
- ↑ "The Native People of North America: Southeast Culture Area". Arquivado dende o orixinal o 27 de setembro de 2012. Consultado o 27 de maio de 2012.
- ↑ Perdue, Theda (2003). "Chapter 2 "Both White and Red"". Mixed Blood Indians: Racial Construction in the Early South. The University of Georgia Press. p. 51. ISBN 0-8203-2731-X.
- ↑ "Muscogee (Creek) Nation". Muscogeenation-nsn.gov. Arquivado dende o orixinal o 08 de outubro de 2015. Consultado o 18 de outubro de 2015.
