Dólar de prata Christa McAuliffe

Dólar de prata Christa McAuliffe
A/: Retrato de Christa McAuliffe. Marcas de deseñadora e gravadora (LJM e PM). Lenda: CHRISTA McAULIFFE / 2021 / LIBERTY / IN GOD WE TRUST	R/: McAuliffe ensinando a tres alumnos. Sete estrelas. Logotipo de FIRST. Marcas de ceca (P), de deseñadora (ESD) e de gravador (JFM). Lenda: I TOUCH THE FUTURE / I TEACH / E PLURIBUS UNUM / ONE DOLLAR / UNITED STATES OF AMERICA
Valor: 1 dólar. Deseñadoras: Laurie Musser (anv.) e Emily Damstra (rev.). Gravadores: Phebe Hemphill (anv.) e Joseph Menna (rev.). Datas de emisión: 2020. Ceca: US Mint: Ceca de Filadelfia ("P"). Tiraxe: 70.229 exemplares. Aliaxe: 90 % prata e 10 % cobre. Diámetro: 38,1 mm. Peso: 26,73 g. Espesor: 3,1 mm. Canto: estriado.

O dólar de prata Christa McAuliffe é unha moeda conmemorativa, non circulante, emitida pola Casa da Moeda dos Estados Unidos en 2021 e cuñada pola Ceca de Filadelfia.

Esta moeda dun dólar foi autorizada pola Lei Pública 116-65, do 9 de outubro de 2019, pola que se creaba unha moeda conmemorativa en recoñecemento da profesora de Estudos Sociais e astronauta Christa McAuliffe, a primeira participante no programa "Profesor no Espazo", da Administración Nacional de Aeronáutica e do Espazo, finada, xunto cos seus seis compañeiros, na explosión do transbordador espacial Challenger, o 28 de xaneiro de 1986.

Deseño

A Casa da Moeda dos Estados Unidos convocou en 2020 un concurso para escoller o deseño da moeda conmemorativa, consonte as indicacións da lei que a autorizaba, e os deseños participantes foron presentados o 23 de xuño dese mesmo ano. Logo de producirse a escolla, o director da US Mint, David J. Ryder, fixo público o 18 de decembro de 2020 o deseño gañador.

O anverso da moeda, deseñado por Laurie Musser e gravado por Phebe Hemphill, está caracterizado por un retrato de Christa McAuliffe cara á esquerda, cunha ollada esperanzada, rodeada pola lenda CHRISTA McAULIFFE, así como a data da emisión e os lemas LIBERTY e IN GOD WE TRUST, habituais da moeda estadounidense.

Christa McAuliffe en 1985.

Pola súa banda, o reverso, deseñado por Emily Damstra e gravado por Joseph Menna, amosa unha escena de McAuliffe exercendo o seu labor docente con tres estudantes de educación secundaria que observan abraiados o que a súa profesora lles sinala no firmamento. As sete estrelas renden homenaxe ás persoas que perderon a vida no accidente do transbordador espacial Challenger. No campo tamén está presente o logotipo da organización FIRST (For Inspiration and Recognition of Science and Technology). Todo isto está rodeado pola lenda I TOUCH THE FUTURE / I TEACH, así como o lema E PLURIBUS UNUM e a mención ao valor facial da moeda e ao nome do país.

Produción e comercialización

A lei que autorizou a emisión destas moedas conmemorativas prevía unha tiraxe máxima de 350.000 exemplares, aínda que finalmente só se cuñaron 16.038 moedas en versión estándar e 54.191 con acabamento especial proof. A moeda produciuse na Casa da Moeda de Filadelfia en ambas as versións, e a poboación empezou a poder facer encargas por adiantado a partir do día 28 de xaneiro de 2021.

Un 10 % dos beneficios acadados pola venda desta moeda vai destinado ao programa de robótica FIRST, co fin de atraer a xente nova cara á ciencia, a enxeñaría e as matemáticas (CTEM).

Véxase tamén

Outros artigos

• Christa McAuliffe
• Moeda dun dólar estadounidense
• Moedas do dólar estadounidense
• Casa da Moeda dos Estados Unidos

Ligazóns externas

• "2021 Christa McAuliffe Silver Dollar" (ModernCommemoratives.com)