Dobra (San Tomé e Príncipe)
| Dobra (San Tomé e Príncipe) | |
|---|---|
 | |
| Código: | STN |
| Ámbito: |  San Tomé e Príncipe |
| Símbolo: | Db |
| Fracción: | 100 céntimos |
| Moedas: | 10, 20 e 50 céntimos, 1 e 2 dobras |
| Billetes: | 5, 10, 20, 50, 100 e 200 dobras |
| Emisor: | Banco Central de San Tomé e Príncipe |
| Taxa de troco: 02-08-2022 | 1 STN = 0,0412853 |
A dobra é a moeda de curso legal de San Tomé e Príncipe. Abréviase Db e está dividida en 100 céntimos.
A primeira dobra (STD) foi introducida en 1977, substituíndo ao escudo santomense. Debido á inflación, en 2018 a dobra foi reconvertida (STN) cunha taxa de conversión de 1000 a 1.[1]
Moedas
[editar | editar a fonte]Primeira dobra
[editar | editar a fonte]En 1977 introducíronse as moedas de 50 céntimos, 1, 2, 5, 10, e 20 dobras. Agás as de 50 céntimos e 1 dobra, de latón, todas estaban feitas dunha aliaxe de níquel e cobre, así como a de 50 dobras introducida en 1990. Nestas moedas estaba representada unha combinación de produtos alimenticios e flora e fauna local. Aínda que hoxe en día apenas se ven en circulación debido á grande inflación do país, estas moedas nunca foron retiradas e aínda se poden usar.
En 1997 introduciuse unha serie nova de moedas con valores máis grandes, de 100, 250, 500, 1.000 e 2.000 dobras. As dúas primeiras son redondas e as outras teñen forma de heptágono con curvas de largura constante. Feitas de aliaxe de aceiro e níquel, representan temas de vida salvaxe.
Todas as moedas levan inscrito o escudo de armas do país na parte dianteira, e a frase "Aumentemos a Produção" e o valor no reverso.
Segunda dobra
[editar | editar a fonte]Coa reconversión da dobra en 2018, introducíronse novas moedas cos valores de 10, 20 e 50 céntimos, así como 1 e 2 dobras.[1]
Billetes
[editar | editar a fonte]Primeira dobra
[editar | editar a fonte]O 30 de setembro de 1977, o Banco Nacional de San Tomé e Príncipe introduciu os billetes de 50, 100, 500 e 1.000 dobras.[2] En 1996, introducíronse billetes de 5.000, 10.000, 20.000 e 50.000 dobras, mentres que os antigos billetes foron substituídos por moedas en 1997. No 2006, emitiuse unha nova serie con melloras de seguridade.
En decembro de 2008 e debido á continua inflación, fíxose necesario emitir un novo billete, de 100.000 dobras.
Todos os billetes levan impreso o retrato do rei Amador, excepto o de 100.000, que leva o retrato de Francisco José Tenreiro.
Segunda dobra
[editar | editar a fonte]Coa reconversión da dobra en 2018 (1 nova dobra equivale a 1.000 dobras antigas), introducíronse os billetes de 5, 10, 20, 50, 100 e 200 dobras. Os billetes de 5 e 10 dobras, están feitos de polímero, e todos eles levan imaxes de diversas bolboretas por diante, e imaxes de vida salvaxe local por atrás.
Acordo con Portugal en 2009
[editar | editar a fonte]En xullo de 2009, o goberno de San Tomé e Príncipe asinou un acordo de empréstito con Portugal, país do que foi colonia. Con este acordo pretendíase ligar a dobra co euro. Portugal proporcionaría un máximo de 25 millóns de euros nun movemento aprobado pola Comisión Europea. San Tomé e Príncipe afirmaba que esta ligazón entre a dobra e o euro garantiría estabilidade ao país. Tardaron un ano en negociar o acordo que se fixo efectivo en xaneiro de 2010. O acordo era similar a outro que Portugal asinara dez anos antes con Cabo Verde.
Reconversión da dobra
[editar | editar a fonte]O 25 de agosto de 2017, o Banco Central de San Tomé e Príncipe anunciou a reconversión da dobra, en conmemoración do 25 aniversario do banco. A nova dobra equivale a 1.000 das antigas dobras.[3]
Notas
[editar | editar a fonte]- ↑ 1,0 1,1 www.numismatica-visual.es. "Nuevas monedas y billetes para Santo Tomé y Príncipe" (en castelán). Consultado o 18 de maio de 2018.
- ↑ Linzmayer, Owen. "Sao Tome and Principe". The Banknote Book (en inglés). www.BanknoteNews.com.
- ↑ www.delarue.com (25 de agosto de 2017). "O Banco Central de San Tomé e Príncipe celebra o seu 25 aniversario revelando a nova serie de billetes deseñados por De La Rue" (en inglés). Consultado o 18 de maio de 2018.