Estratexia
A estratexia é un plan a longo prazo sobre o que facer para acadar un determinado obxectivo.
Terminoloxía[editar | editar a fonte]
Hoxe en día, a palabra "estratexia" é de uso común en diversos contextos, incluíndo o ámbito empresarial, deportivo, educativo e moitos outros. A xente pode falar de "estratexia empresarial" para referirse aos plans e accións deseñados para alcanzar obxectivos comerciais específicos. Tamén se utiliza en contextos como a "estratexia de mercado", "estratexia de xogo", "estratexia de busca" ou "estratexia de aprendizaxe". Con todo, o significado orixinal remite ao que hoxe se chama "estratexia militar".[1]
Etimoloxía[editar | editar a fonte]
A palabra "estratexia" vén do grego antigo στρατηγία (*strategia*), que significa "a arte de dirixir exércitos".[2] Esta palabra está formada por:
- στρατός (*stratós*): que significa "exército".
- ἄγω (*ago*): que significa acción de "dirixir".
- O sufixo -ια (*-ia*): usado para crear substantivos abstractos que expresan unha relación á palabra anterior.
O termo foi empregado inicialmente no contexto militar para referirse ao papel do líder máis importante que tomaba todas as grandes decisións para o exército, é dicir, o máximo xeneral dun país. A palabra "estrataxema" provén da mesma raíz, e ambas da raíz protoindoeuropea *ster- que significa expansión ou expandirse.[3]
Historia[editar | editar a fonte]
A palabra "estratexia" foi introducida na teoría militar europea ao redor do século XVIII. Count Guibert, un pensador militar francés, utilizou o termo "La Strategique" en 1799 para describir a "ciencia da guerra", e a partir de aí o seu uso espallouse rapidamente desde o século XIX a outros contextos.[4]
Estratexia e tácticas[editar | editar a fonte]
O dicionario da RAG distingue entre as acepcións derivadas do termo de orixe militar, en que se confrontan os significados de estratexia e táctica, e o seu uso metafórico.[5][6] A estratexia é a arte de coordinar todos os elementos que inciden no desenvolvemento dun evento (orixinalmente referido a unha guerra ou na prevención dun conflito), e refírese tamén a proxectos de accións coordinadas para acadar un obxectivo a longo prazo, mentres que a táctica se centra en accións específicas e métodos concretos empregados para alcanzar obxectivos a curto prazo dentro da estratexia xeral. En resumo, a estratexia establece "que" se quere acadar e a táctica define "como" se vai acadar.
Cando se fala do futuro próximo, a xente adoita usar a palabra táctica. O teórico militar Carl von Clausewitz dixo que "a táctica é a arte de usar tropas na batalla; a estratexia é a arte de usar as batallas para gañar a guerra".[7]
A distinción entre estratexia e táctica aplícase a calquera planificación que se poida facer contra un opoñente. A estratexia é o que pretendemos facer en liñas xerais para alcanzar o noso obxectivo ou obxectivo a longo prazo. A táctica son os pasos detallados que se usan a medida que o noso opoñente se opón ao noso progreso. Por este motivo, as tácticas son a curta escala e fáciles de cambiar. A estratexia, en cambio, cámbiase o menos posíbel. Pode ser que o noso obxectivo simplemente non se poida alcanzar. Nese caso, procédese a buscar un novo obxectivo e unha estratexia nova ou axustada. Moitas veces, na guerra, no xadrez ou nos negocios, aínda se usan aproximadamente as mesmas tácticas para chegar a un obxectivo diferente.
A negociación é outra área onde a distinción entre estratexia e táctica é especialmente clara.[8]
Notas[editar | editar a fonte]
- ↑ Wragg, David (1973). A Dictionary of Aviation. Osprey. p. 251. ISBN 9780850451634.
- ↑ "ESTRATEGIA". Etimologías de Chile - Diccionario que explica el origen de las palabras (en castelán). Consultado o 2024-06-25.
- ↑ "Etymology of strategy by etymonline". www.etymonline.com (en inglés). Consultado o 2024-06-25.
- ↑ Freedman, Lawrence (2017-11-26). "The Meaning of Strategy, Part I: The Origins". Texas National Security Review (en inglés). Consultado o 2024-06-25.
- ↑ "estratexia". Dicionario da Real Academia Galega. Consultado o 2024-06-25.
- ↑ "táctica". Dicionario da Real Academia Galega. Consultado o 2024-06-25.
- ↑ Michiko Phifer, A Handbook of Military Strategy and Tactics (New Delhi: Vij Books India Private Limited, 2012), p. 1
- ↑ Schelling, Thomas C.1960. The strategy of conflict. Harvard University Press, especially chapter 2: An essay on bargaining.
Véxase tamén[editar | editar a fonte]
 |
Vexa a entrada do Galizionario acerca de Estratexia |
Bibliografía[editar | editar a fonte]
- Clausewitz, Carl von. 1989. On War, tradución ao inglés Michael Howard e Peter Paret. Princeton, NJ: Princeton Univ. Press.
- Gray, Colin S. 1999. Modern Strategy. Oxford: Oxford Univ. Press.
- Liddell Hart, Basil. H. 1967. Strategy. Nova York: Praeger.
- Luttwak, Edward. 2001. Strategy: the logic of war and peace. Cambridge, MA: Belknap Press.
- Sun Tzu. 1963. The Art of War. trans. Samuel B. Griffith. Oxford: Oxford Univ. Press.
- Watson, John 1998. Secrets of modern chess strategy: advances since Nimzowitsch. Gambit, Londres
