Juana Teresa Juega López
  | |
| Biografía | |
|---|---|
| Nacemento | 8 de abril de 1885 Laxe, España |
| Morte | 3 de decembro de 1979 (94 anos) Melide, España |
| Lugar de sepultura | Cemiterio do Castelo |
| Relixión | católica |
| Actividade | |
| Ocupación | poetisa |
| Empregador | Acción Católica e CEDA |
| Xénero artístico | poesía |
| Familia | |
| Cónxuxe | Emilio Pereiro Quiroga |
| Fillos | Emilio, Luis, Teresa e Carlos |
| Pai | Ramón Juega Charlín |
| Descrito pola fonte | Gran Enciclopedia Galega Silverio Cañada Diccionario bio-bibliográfico de escritores Diccionario de escritores en lingua galega |
 | |
Juana Teresa Juega López, nada en Laxe o 8 de abril de 1885 e finada en Melide o 3 de decembro de 1979, foi unha poeta galega en lingua galega e lingua castelá.
Traxectoria
[editar | editar a fonte]Filla do médico Ramón Juega Charlín, dos cinco aos trece anos de idade viviu en Tacuarembó, Uruguai, de onde procedía súa nai. De volta a Galicia a familia instalouse na Coruña onde o seu pai rexentaba un balneario. Juana publicou versos (algúns en galego) a partir de 1904 en El Eco de Galicia e en El Compostelano.
A poeta tiña preparado un libro de poemas con prólogo de Leopoldo Pedreira Taibo e dedicatoria-presentación de José María Riguera Montero, titulado Alma que llora, cousa que non era do agrado do seu noivo, José Morales Vilar, militar. En marzo de 1908 o tenente disparou varias veces contra ela,[1] feríndoa gravemente, e a continuación suicidouse. O libro nunca chegou a publicarse.
Dous anos despois Juana casou con Emilio Pereiro Quiroga, avogado de Melide, co que tivo catro fillos, residindo sucesivamente en Caldas de Reis, Arzúa, Palas de Rei, Melide e Santiago de Compostela. Durante a guerra civil española Juana, membro de Acción Católica e activista a prol da CEDA,[2] colaborou en manifestacións e actos a favor do franquismo.[3]
O seu poema "A morte" aparece na antoloxía de Uxío Carré Aldao de 1911[4] e o seu sobriño-neto, José-Maria Monterroso Devesa, fixo unha recompilación da súa obra, de máis de setenta composicións, oito delas en galego, que se publicou no ano 2000[3] no Boletín do Centro de Estudos Melidenses. Museo da Terra de Melide nº 13.
Notas
[editar | editar a fonte]- ↑ "Tragedia amorosa" El Diario de Pontevedra 7/3/1908 (en castelán).
- ↑ Amor, Amara (1990). "J. Teresa Juega: poeta esquecido". Festa da Palabra Silenciada n.º 7, pp. 113-116. ISSN 1139-4854.
- ↑ 3,0 3,1 Marco, Aurora (2007). Dicionario de Mulleres Galegas [Das orixes a 1975]. Edicións A Nosa Terra. p. 224-225. ISBN 978-84-8341-146-9.
- ↑ Carré (1911). Literatura gallega con extensos apéndices bibliográficos y una gran antología de 300 trabajos escogidos en prosa y verso de la mayor parte de los escritores regionales gallegos, p. 281-282.
Véxase tamén
[editar | editar a fonte]Bibliografía
[editar | editar a fonte]- "Juega López, Juana Teresa". Gran Enciclopedia Galega Silverio Cañada (DVD). El Progreso. 2005. ISBN 84-87804-88-8.
- Alvarellos Iglesias, Enrique (1993). Mulleres destacadas de Galicia. Alvarellos Editora. p. 147. ISBN 84-85311-96-5.
- Blanco, Carmen (1992). Escritoras galegas. Biblioteca 114 n.º 87. Editorial Compostela-El Correo Gallego. ISBN 84-85553-98-5.
- Carballo Calero, R. (1975) [1963]. Historia da literatura galega contemporánea. Galaxia. p. 515. ISBN 84-7154-227-7.
- Couceiro Freijomil, Antonio (1951-53). Diccionario bio-bibliográfico de escritores (en castelán) II. Bibliófilos Gallegos. p. 254.
- Fernández del Riego, F. (1992) [1990]. Diccionario de escritores en lingua galega (2ª ed.). Do Castro. p. 622. ISBN 84-7492-465-0.
- Rei Lema, X. M. (2011). Dicionario de Escritores e Escritoras da Costa da Morte p. 39. Seminario de Estudos Comarcais da Costa da Morte.
- Vilavedra, Dolores, ed. (1995). Diccionario da literatura galega. Autores I. Vigo: Editorial Galaxia. ISBN 84-8288-019-5.
Outros artigos
[editar | editar a fonte]Ligazóns externas
[editar | editar a fonte]- Bugallal, Isabel (10/12/2017). "Tragedia en la casa de baños" La Opinión A Coruña (en castelán).
- Campos Pico, Raquel (17/10/2017). "Cinco tiros contra a escritora que ía publicar un libro de poemas" Disque Cool.
