Mary Renault

Mary Renault

Biografía
Nacemento	(en) Eileen Mary Challans 4 de setembro de 1905 Londres, Reino Unido
Morte	13 de decembro de 1983 (78 anos) Cidade do Cabo, Suráfrica
Educación	St Hugh's College (en) Clifton High School (en)
Actividade
Campo de traballo	Literatura
Ocupación	novelista, enfermeira, biógrafa, escritora
Período de actividade	1939 -
Interesada en	Alexandre o Grande e Aquiles e Pátroclo (pt)
Xénero artístico	Novela histórica
Descrito pola fonte	Obálky knih, A Historical Dictionary of British Women, (p.369)

Eileen Mary Challans, nada en Forest Gate (Essex) o 4 de setembro de 1905 e finada na Cidade do Cabo o 13 de decembro de 1983, foi unha escritora inglesa-surafricana, coñecida como Mary Renault, coñecida polas súas novelas históricas ambientadas na antiga Grecia. Ademais de vívidos retratos ficticios de Teseo, Sócrates, Platón e Alexandre o Grande, escribiu unha biografía de Alexandre.

Traxectoria

Renault naceu en Dacre Lodge, 49 Plashet Road, Forest Gate, Essex (actualmente en Londres), filla do médico Frank Challans e de Mary Clementine Newsome Baxter Challans. Estudou primeiro na escola familiar de Levick e en Clifton Girls School en Bristol. Recibiu leccións de inglés en St Hugh's College, Oxford, entón un college feminino, recibindo un grao en 1928. En 1933 comezou a aprender enfermaría en Radcliffe Infirmary en Oxford. Durante o seu adestramento coñeceu a Julie Mullard (1912–1996), compañeira enfermeira coa que iniciou unha duradeira relación romántica.

Traballou como enfermeira mentres comezaba unha carreira literaria, tratando os evacuados de Dunkerque no Hospital de Emerxencia de Winford en Bristol, e traballando na vixilancia de cirurxía cerebral en Radcliffe Infirmary ata 1945. Publicou a súa primeira novela, Purposes of Love, en 1939: estaba ambientada na época contemporánea, e a novelista Linda Proud describiuna como "unha estraña combinación de platonismo e romance hospitalario". A súa novela The Friendly Young Ladies (1943), sobre unha relación lésbica entre unha escritora e unha enfermeira, parece inspirada pola súa propia relación con Mullard.

En 1948, despois de que a súa novela Return to Night gañase un premio da MGM por valor de 150 000, Renault e Mullard emigraron a Suráfrica, onde permaneceron o resto das súas vidas. Alí, segundo Proud, atoparon unha comunidade de expatriados homosexuais que "escaparan das actitudes represivas cara á homosexualidade en Gran Bretaña en comparación coa atmosfera comparativamente liberal de Durban.... Mary e Julie viron posible establecerse xuntas nesta nova terra sen causar a furia que ás veces provocaran na súa patria". Porén, Renault e Mullard foron críticas con aspectos menos liberais do seu novo país, e participaron no movemento Black Sash contra o apartheid na década de 1950.

Pouco antes da súa morte, Renault foi listada como unha das alumnas que deran máis honra á Radcliffe Infirmary Nurses' Home. Debido ao especialmente húmido inverno de 1983 na Cidade do Cabo, Ranault tivo un pequeno catarro. Ao principio, a tose non era máis que un pouco irritante para ela, mais axiña empeorou. Despois de que Mullard contase os seus temores ao seu amigo mutuo, o doutor Sonnenberg, aplicáronlle raios X, e diagnosticáronlle pneumonía, sendo enviada a un sanatorio. Tras fracasar na eliminación da pneumonía con antibióticos, un cirurxián británico visitante realizoulle unha broncoscopia con anestesia xeral. Pouco despois, o doutor revelou a Mullard que atopara fluídos no pulmón e aspirara algún del; a causa era cancro. Mullard pediu aos médicos que non dixesen nada a Renault a non ser que ela o pedise. En outubro, un amigo do doutor Sonnenberg, o doutor Slome, estivo drenando líquido dúas veces por semana e estaba decidido a inxectar un novo fármaco na pleura a mañá seguinte, coa esperanza de que evitase a formación de máis fluído. Antes de que comezase a operación, Mullard recibiu unha chamada, que sabía que "só podía significar unha cousa". Mary Renault faleceu na Cidade do Cabo o 13 de decembro de 1983.

Obras

Ficción contemporánea

• Purposes of Love (1939).
• Kind Are Her Answers (1940).
• The Friendly Young Ladies (1944).
• Return to Night (1947).
• The North Face (1948).
• The Charioteer (1953).

Novelas históricas

• The Last of the Wine (1956), ambientada en Atenas durante a guerra do Peloponeso. O narrador é un alumno de Sócrates.
• The King Must Die (1958), historia de Teseo ata a morte do seu pai.
• The Bull from the Sea (1962), resto da vida de Teseo.
• The Mask of Apollo (1966), un actor na época de Platón e Dionisio o Novo.
• Fire from Heaven (1969), Alexandre o Grande dende os catro anos ata a morte do seu pai.
• The Persian Boy (1972), Alexandre trala conquista de Persia dende a perspectiva de Bagoas.
• The Praise Singer (1978), o poeta Simónides de Ceos.
• Funeral Games (1981), sucesores de Alexadnre.

Non ficción

• The Lion in the Gateway: The Heroic Battles of the Greeks and Persians at Marathon, Salamis, and Thermopylae (1964), sobre as guerras médicas.
• The Nature of Alexander (1975), biografía de Alexandre o Grande.

Véxase tamén

Bibliografía

• Brian Alderson. "Challans, (Eileen) Mary" Dictionary of National Biography. Supplement, 1980–1989 (Oxford: Oxford University Press, 1990)
• Sweetman, David (1993). Mary Renault: a biography. Londres: Chatto & Windus. ISBN 0-7011-3568-9. .
• Zilboorg, Caroline (2001). The masks of Mary Renault: a literary biography. Columbia: University of Missouri Press. ISBN 0-8262-1322-7. .

Ligazóns externas

• Review of The Friendly Young Ladies
• "Thursday Sep. 4, 2014", Writer's Almanac with Garrison Keillor, birthday tribute.