O Rapote, Broño, Negreira

O Rapote
Parroquia	Broño
Concello	Negreira
Coordenadas	42°55′41″N 8°47′50″O
Poboación	35 hab. (2018)
[ editar datos en Wikidata ]

O Rapote é unha aldea da parroquia de San Martiño de Broño, no concello coruñés de Negreira. Tiña 35 habitantes no ano 2018 segundo datos do Instituto Nacional de Estadística, dos cales 20 eran homes e 15 eran mulleres.

Localización

Situada ao norte da parroquia, esta aldea atópase nos lindeiros co concello da Baña e coas parroquias de San Mamede da Pena e de San Vicenzo de Aro. Dende O Rapote vese ao completo o Monte da Pena - Feáns, quizais o punto máis alto do concello de Negreira e dende cuxos cumes podemos divisar unha extensísima panorámica, alcanzando a avistar lugares tan distantes como Santiago de Compostela, o Pico Sacro, Santa Comba, o Val de Barcala na súa plenitude, e en xeral boa parte do concello negreirés. A esta montaña pódese acceder por multitude de pistas e camiños, moitos dos cales foron abertos trala creación en 2004 do parque de captación de enerxía eólica do Corzán.

Os núcleos de poboación máis próximos son Feáns e Broño, a uns douscentos metros de distancia cada un. Con estas dúas aldeas, O Rapote comparte a festividade de San Miguel (29 e 30 de setembro), que ten como característica que se celebra soamente na metade da parroquia, sendo este feito o vestixio que queda da antiga parroquia de San Miguel de Broño, absoribida pola de San Martiño de Broño a finais do S. XVII. Cabe citar aquí as outras tres aldeas da parroquia: San Martiño, Redemuíños e Trasbarcala. Mención á parte merece a Casa de Antelo, un fermoso pazo con capela situado entre as parroquias bañesas de Ordoeste e Seoane que pertence á parroquia de Broño.

A aldea está cruzada en boa parte polo Camiño de Santiago - Fisterra, en auxe nos últimos tempos e máis de cara ao Ano Santo Xacobeo 2010.

Conta cun total de quince casas, as cales están distribuídas moi desigualmente, contando un núcleo principal que aglutina a maioría. Outras vivendas atópanse a maior distancia deste núcleo orixinario; porén, cómpre destacar que son construcións de recente creación, e víronse favorecidas pola importante emigración exterior, fundamentalmente dirixida cara ao continente europeo na segunda metade do século XX.

Economía

No Rapote predominou até hai poucos anos o sector primario, esencialmente gandeiro. Non obstante, este atópase nun detrimento significativo, e a día de hoxe podemos observar só tres casas con explotacións de gando vacún, maioritario na comarca. Malia isto, en boa parte dos fogares críanse animais destinados ao consumo propio (porcos, coellos, galiñas...).

Paisaxe

Cómpre salientar o aceptable estado dos montes que rodean a aldea. A súa rede de camiños permite andar en plena natureza sen distanciarse moito de zonas habitadas. Unha das sendas máis percorridas é a do Camiño que leva a Fisterra, pola que pasan peregrinos todo o ano na súa viaxe cara a fin do mundo, e tamén excursionistas a miúdo. Actualmente, esta vía atópase nun estado óptimo á altura da localidade do Rapote (agás algún tramo afectado polas intensas precipitacións caídas o inverno pasado), e permite, ademais de ir a pé, poder pasar con bicicleta sen riscos.

Véxase tamén

Outros artigos

• Negreira
• Redemuíños, Broño, Negreira

Ligazóns externas

• Páxina web do Concello de Negreira