Oysterband

Oysterband (orixinalmente The Oyster Band) é unha banda británica de folk-rock e folk-punk formada en Canterbury en 1976.^[1]

Traxectoria

Historia temperá

A banda formouse en paralelo á Fiddler's Dram baixo o nome de "Oyster Ceilidh Band" e tocou ao principio só como banda de baile. O nome Oyster provén da primeira asociación do grupo coa cidade costeira de Whitstable, Kent, coñecida pola calidade das súas ostras. O seu álbum debut foi Jack's Alive (1980) no selo discográfico Dingles. Os seguintes foron publicados no seu selo Pukka Music: English Rock 'n' Roll: The Early Years 1800–1850 e Lie Back and Think of England, seguido de Liberty Hall e 20 Golden Tie-Slackeners.

A aliñación da banda ía mudando neses álbums. A primeira formación era:

Cathy Lesurf – voz;
John Jones – melodeon, voz;
Alan Prosser – guitarras, violín;
Chris Taylor – guitarra, bouzouki, harmónica, mandola;
Ian Telfer – violín, concertina inglesa, saxofón;
Chris Wood – baixo;
Will Ward – fagot, crumhorn (cromorno), teclados

Chris Wood deixou a banda para ir ao Canadá e foi substituído no baixo por Ian Kearey. Posteriormente, Cathy Lesurf marchou para unirse á Albion Band de Ashley Hutchings, e Will Ward tamén marchou cando gravaron Lie Back and Think of England. Logo engadiron a Russell Lax á batería. O álbumStep Outside mesturou cancións escritas por eles mesmos, moitas veces con temática política, con reelaboración de estándares tradicionais como "Hal-an-Tow".

Historia máis recente

Oysterband, Cropredy Festival, Oxfordshire, 12 de agosto de 2004

Despois do lanzamento de Wide Blue Yonder en 1987 Kearey deixou a banda, substituído por Chopper (Ray Cooper). Os álbums posteriores incluíron Ride, Little Rock to Leipzig e a colaboración de June Tabor Freedom and Rain. O batería Lee Partis substituíu a Russell Lax en 1992. En 1993 o álbum Holy Bandits, cunha canción adicada ao Camiño de Santiago ("The Road to Santiago") impulsou a banda ao primeiro plano dunha escena folk-rock en expansión xunto con bandas como The Levellers.^[2]

Nesa década a banda adoptou unha postura máis abertamente política, gravando The Shouting End of Life e colaborando con Chumbawamba para gravar "Farewell to the Crown", cara B do sinxelo Tubthumping. Pero os lanzamentos recentes Deep Dark Ocean, Here I Stand, Rise Above e Meet You There fixeron que a banda volvese a un son máis suave e melódico, e nas recentes xiras baixo o lema 'The Big Session' colaboraron músicos emerxentes como Dan Donnelly, The Handsome Family, e xente veterana como June Tabor. James O'Grady (Uilleann, violín, frauta e voz) apareceu regularmente nos álbums e xiras da Oysters nos últimos anos. Tamén participaron John Jones, James O'Grady e Ian Telfer na voz e instrumentación.

En 2007, o batería Lee Partis deixou a banda para concentrarse no seu traballo como psicoterapeuta, asesorando en prisións, entrando Dilwyn Davies como substituto.

Despois do concerto do 30 aniversario, en 2009, a banda tomou un ano sabático durante o que John Jones e Chopper fixeron álbums en solitario.

A banda volveu ao estudo en 2011, formando equipo unha vez máis con June Tabor e lanzando Ragged Kingdom en setembro nun concerto con entradas esgotadas no Queen Elizabeth Hall de Londres. Al Scott produciu o álbum, alén de tocar o baixo e guitarra. En 2012, June Tabor e Oysterband gañaron a Mellor Canción Tradicional, Mellor Álbum e Mellor Grupo nos Premios Folk da BBC Radio 2 por Ragged Kingdom.

Ray Cooper deixou a banda en 2013 para seguir unha carreira en solitario e Adrian Oxaal, anteriormente da banda de rock James, asumiu o relevo, e Pete Flood, antes de Bellowhead, substituíu a Davies na batería.

Aliñación actual

John Jones - melodeon, voz principal
Alan Prosser - guitarras, voz
Ian Telfer - violín, teclado, voz
Sean Randle - batería, percusión, voz
Al Scott : baixo, mandolina, voz
Adrián Oxaal – violonchelo, guitarra eléctrica, voz

Discografía

Álbums de estudio

Como Fiddler's Dram

To See the Play – 1978
Fiddler's Dram – 1980

Como Oyster Ceilidh Banda

Jack's Alive – 1980

Como Oyster Band

English Rock 'n' Roll: The Early Years 1800–1850 – 1982
Lie Back and Think of England – 1983
20 Golden Tie-Slackeners – 1984
Liberty Hall – 1985
Step Outside – 1986
Wide Blue Yonder – 1987
Ride – 1989
Love Vigilantes – 1989
Freedom and Rain – 1990 (con June Tabor)

Como Oysterband

Deserters – 1992
Holy Bandits – 1993
Trawler – 1994
The Shouting End of Life – 1995
Deep Dark Ocean – 1997
Here I Stand – 1999
Rise Above – 2002
25 – 2003
Meet You There – 2007
The Oxford Girl and Other Stories – 2008
Ragged Kingdom – 2011 (colaboración con June Tabor)
Diamonds on the Water – 2014

Ao vivo

Little Rock to Leipzig – 1990 (parte en directo)
Alive and Shouting – 1996
Alive and Acoustic – 1998
25th Anniversary Concert – DVD – 2004
Northern Light – 2006
Fire and Fleet – 2019 (con June Tabor, parte en directo)

Álbums de recompilación

"The Road to Santiago" e "Bells Of Rhymney" da Oysterband foron incluídas no primeiro e no segundo álbum dobre recompilatorio Gaitas, violines y otras hierbas (DRO, 1992, 1993), no que participaron grupos galegos como Os Diplomáticos e Na Lúa, alén doutros grupos de éxito internacional como The Dubliners, Loreena McKennitt, The Pogues, Celtas Cortos, The Chieftains con Van Morrison, Clannad, Gwendal ou Alan Stivell.^[3]^[4] Entre 1994 e 2016 participaron noutros álbums colectivos.

Gaitas, Violines y otras hierbas – 1992 (con "Bells of Rhymney")
Gaitas, Violines y otras hierbas – 1993 (con "The Road to Santiago")
The Rough Guide to World Music – 1994 (coa música "When I'm Up I Can't Get Down")
The Rough Guide to English Roots Music – 1998 (coa peza "Sail on By")
Pearls from the Oysters – 1998 (con Step Outside, Wide Blue Yonder, Ride e Little Rock to Leipzig)
Granite Years (The Best of Oysterband 1986–1997) – 2000, dobre álbum
This House Will Stand (The Best Of Oysterband 1998–2015) – 2016, dobre álbum con "The Work Of My Own Two Hands" máis versións alternativas.

Notas

↑ "Biography Oysterband (en inglés)". All Music. Consultado o 5-1-2022.
↑ Colin, Larkin (1992). The Guinness encyclopedia of popular music. Guinness Publ. ISBN 0-85112-939-0.
↑ "GVYOH 1". Discogs. Consultado o 4-1-2021.
↑ "GVYOH". Discogs. Consultado o 4-1-2022.

Véxase tamén

Ligazóns externas

[1] "Biography Oysterband (en inglés)". All Music. Consultado o 5-1-2022.

[2] Colin, Larkin (1992). The Guinness encyclopedia of popular music. Guinness Publ. ISBN 0-85112-939-0.

[3] "GVYOH 1". Discogs. Consultado o 4-1-2021.

[4] "GVYOH". Discogs. Consultado o 4-1-2022.

[1]

[2]

[3]

[4]