Porto de Bilbao
O porto de Bilbao é un porto da cidade de Bilbao, no País Vasco, situado na desembocadura da ría do Nervión no mar Cantábrico. Está xestionado pola Autoridade Portuaria de Bilbao e é capitanía da provincia marítima de Bilbao.
Nas súas orixes, o porto situábase nas ribeiras superiores da ría, xunto á vila de Bilbao onde se mantivo ata a década dos 80 do século XX. Na actualidade o porto de Bilbao sitúa a maioría das súas instalacións na parte inferior da ría, no que se coñece como o Abra Exterior, en terreos de Santurtzi, Zierbena, Getxo, Portugalete e Abanto Zierbena.
