Pulp (novela)
| Pulp | |
|---|---|
| Título orixinal | Pulp |
| Autor/a | Charles Bukowski |
| Orixe | Estados Unidos |
| Lingua | inglés |
| Xénero(s) | realismo sucio, novela negra |
| Editorial | Black Sparrow Press |
| Data de pub. | 1994 |
| Formato | tapa dura |
| [ editar datos en Wikidata ] | |
Pulp é unha novela de Charles Bukowski, publicada en 1994, pouco despois da súa morte. Toma o título do xénero das revistas pulps. O protagonista é o detective privado Nick Belane.
Trama
[editar | editar a fonte]Nick Belane é un detective privado de 55 anos residente nos Ánxeles. Logo de tres matrimonios e tres divorcios, leva unha vida de alcoholismo e xogo. Enfróntase a casos do máis variado e absurdo.
A "señora Morte" encárgalle que atope a Louis-Ferdinand Céline, malia que xa leva 32 anos morto. Un operario de pompas fúnebres pídelle que unha extraterrestre o deixe en paz. Un coñecido pídelle que atope o "Pardal Vermello". Un homiño pídelle probas de que a súa muller o engana. Como en obras de Raymond Chandler, os casos comezan a entrelazarse.
Axiña se ve envolto en pelexas, obrigado a sacar a pistola e usar os nocellos. Consome grandes doses de alcol, e alterna estados de ánimo bos con momentos depresivos. Vai ós hipódromos a relaxarse, pero nin alí logra desconectar de todo do traballo.
