Robert Morton

Robert Morton

Biografía
Nacemento	1430 (Gregoriano) Inglaterra, Reino Unido
Morte	1479 (Gregoriano) (48/49 anos)
Actividade
Campo de traballo	Música e Música renacentista
Lugar de traballo	Inglaterra
Ocupación	compositor

Robert Morton (con variedades do apelido Mourton e Moriton), nado cara ao ano 1430 e finado despois do 13 de marzo de 1479, foi un compositor inglés do Renacemento temperán, moi recoñecido no seu tempo e activo na corte de Borgoña, polo que se adscribe adoito á coñecida como escola de Borgoña. Da súa autoría só se conserva música vocal profana, sempre en forma de rondós para tres voces.

Traxectoria

Pouco se coñece con certeza da súa vida, agás no relativo á súa vinculación coa escola de Borgoña. Á parte do seu nacemento en Inglaterra, non se coñece dato ningún sobre os seus primeiros anos. Desde 1457 ata 1476 foi membro do coro de capela, e cara a 1460 os documentos da capela dan testemuño de que xa tiña o tratamento de sacerdote.

O longo período de relativa paz na corte borgoñoa baixo Filipe III de Borgoña (Filipe o Bo) acabou coa morte deste en 1467, e baixo o seu sucesor, Carlos o Temerario, as actividades musicais da corte víronse moi minguadas. Moitos dos cantantes e compositores da corte, entre os que estaba Hayne van Ghizeghem, con quen Morton tivo relación, participaron nas numerosas campañas militares. 

Os rexistros de pagamentos coñecidos a nome de Morton rematan en 1476 e, por ese motivo, durante moito tempo asumiuse que morrera nese ano. Porén, hai evidencias máis recentes nos arquivos do Vaticano de que estaba vivo cara a 1479, xa que se coñece que dimitiu dunha parroquia holandesa nese ano.

É probable, aínda que nunca se constatou, que fose o mesmo Robert Morton que chegou a ser bispo de Worcester e que morreu en 1497. 

Obra

Dado que case non se conserva ningún manuscrito de música do século XV en Inglaterra, non sorprende que a maior parte da música de Morton se conservase en fontes da Europa continental. Por iso se descoñece se anteriormente exerceu como músico nas illas británicas.

Sobreviviron oito pezas, todas rondós. Un dos máis famosos é o coñecido como L'homme armé, que foi moi utilizado por moitos compositores de principios do Renacemento como un cantus firmus para as misas. Esta peza, probabelmente datable en maio de 1464, parece que foi escrita como agasallo para outro compositor da corte, Simon le Breton.

Outro do seu rondós, Le souvenir de vous me tue, foi extremadamente famoso, como testemuña a gran cantidade de copias esparexidas por cancioneiros de toda Europa.

Todo o conservado da música de Morton é en francés. Canto á melodía, a súa música é algo máis sinxela que a dos seus contemporáneos, como Hayne ou Antoine Busnois.

Moitas das súas composicións foron utilizadas como material de partida para misas por compositores máis tardíos, como é o caso de Josquin des Prés.

Obras de atribución segura

• Cousine trop vous abusés.
• Il sera poure vous conbatu  /L'homme armé.
• Le souvenir de vous me tue.
• Mon bien ma joyeux.
• N'aray je jamais mieulx que j'ay.
• Paracheve ton entreprise.
• Plus j'ay le monde.
• Que pourroit plus faire une dame.

Obras de atribución dubidosa

• C'est temps perdu.
• Vive ma dame par amours.
• Pues serviçio vos desplaze.
• Vien avante morte dolente.

Véxase tamén

Bibliografía

• David Barbeitos. "Robert Morton". En The New Grove Dictionary of Music and Musicians. Ed. Stanley Sadie. Londres. Macmillan Editores Ltd. 1980. [ISBN 1-56159-174-2]
• David Fallows. "Robert Morton". En Grove Music Online. Ed. L. Macy.
• Gustave Reese, Music in the Renaissance. Nova York, W.W. Norton & Co. 1954. [ISBN 0-393-09530-4]