The Wall (videoxogo)

The Wall
Desenvolvedor(es)	Álex González
Lanzamento	1986
Plataforma(s)	MSX
[ editar datos en Wikidata ]

The Wall é un videoxogo arcade de alta dificultade desenvolvido polo ourensán Álex González e producido por Erbe Software, lanzado en 1986. Está considerado o primeiro videoxogo galego.

Sinopse

Un alieníxena, DIRXX, debe superar un total de 22 pantallas camiñando por un muro (de aí o título) rodeado do mar e evitando distintos inimigos entre os que hai varios elementos da cultura popular galega como o mexillón, e outros obstáculos como rodas ou shuriken. A banda sonora, deseñada tamén por Álex González, emprega como base a popular canción "Na beira do mar", aínda que acelerada para ser adaptada ao estándar MSX-AUDIO.

A atmosfera temática do videoxogo presentábase do seguinte xeito impresa na caixa do casete de Erbe Software:

DIRXX saltou para evitar o pequeno ciberdroide electrificado, cuxo contacto sería fatal, e rodou polo chan, evitando por pouco un parafuso mortal. Entón correu desesperado cara á porta metálica do seguinte nivel, mentres sentía, en lugar de ver, o xigantesco robot que se lle achegaba por detrás.
Diante del, a enorme chapa metálica subía e caía cunha rapidez que desafiaba o cálculo. Intentando concentrarse, DIRXX acelerou a velocidade dos seus procesos mentais para superar esa proba suprema, e saltou sincronizando a súa velocidade coa da porta. O seu salto levouno ao extremo oposto, deixando ao seu perseguidor a unha man e perdendo por pouco a pendente de salvación. Un salto máis curto significaría a morte atrapada na pesada lámina, e un demasiado longo significaría o mesmo, no velenoso lago de cloro.