Xosé Manuel Carril
| Biografía | |
|---|---|
| Nacemento | 7 de agosto de 1969  (55 anos)Londres, Reino Unido |
| Educación | Universidade da Coruña |
| Actividade | |
| Ocupación | avogado, político |
| Partido político | Bloque Nacionalista Galego |
| Familia | |
| Irmáns | Paulo Carril |
    | |
Xosé Manuel Carril Vázquez, nado en Londres o 7 de agosto de 1969, é profesor de Dereito do Traballo e Seguridade Social na Universidade da Coruña e político galego vinculado ao BNG a través da UPG.
É irmán de Paulo Carril,[1] Secretario Confederal de Organización da CIG desde 2013 e Secretario Comarcal do sindicato na comarca da Coruña de 2001 a 2013.[2]
Traxectoria profesional
[editar | editar a fonte]Licenciado en Dereito desde 1992, Graduado en Dereito desde 1994 e Doutor desde 1998 pola Universidade da Coruña, foi Premio extraordinario de doutoramento da Universidade da Coruña (1998-1999) e desde 2003 é Profesor Titular de Dereito do Traballo e da Seguridade Social na Facultade de Dereito da Universidade da Coruña.
Autor de dúas monografías e de máis de medio centenar de artigos publicados en diversas revistas, algúns deles sobre Dereito Social da Unión Europea, Dereito francés do Traballo e da Seguridade Social, Dereito italiano do Traballo e da Seguridade Social, Dereito norteamericano do Traballo e Dereito do Traballo e da Seguridade Social en Galiza é ademais coautor de dous manuais universitarios de Dereito do Traballo e da Seguridade Social
Foi relator e comunicante en distintas reunións e congresos nacionais e internacionais sobre Dereito do Traballo e da Seguridade Social e Secretario Xeral da Universidade da Coruña (2006-2010).
É membro do Consello Científico do Anuario da Facultade de Dereito da Universidade da Coruña («Revista xurídica interdisciplinar internacional»).
Traxectoria política
[editar | editar a fonte]Membro das asembleas constituíntes de Galiza Nova na cidade da Coruña, dos Comités Abertos de Facultade da Universidade da Coruña, o colectivo antimilitarista Galiza Insubmisa e da Comisión pola Recuperación da Memoria Histórica da Comarca da Coruña. É tamén membro do Consello Local do BNG da cidade da Coruña e do Consello Nacional.
En 2006, foi xulgado e condenado canda Pilar García Negro e Francisco Xosé Rei por inxurias e desorde pública durante un pleno presidido por Francisco Vázquez en 2004; naquela sesión o alcalde pretendía cooficializar os topónimos castelán e galego para a cidade.[3][4]
En 2010, pasou á primeira liña da política coruñesa, ao ser elixido candidato do BNG á alcaldía do concello da Coruña, sucedendo o histórico Henrique Tello e exercendo así de portavoz do BNG na corporación municipal desde aquela até o ano 2015.
Durante a maior parte da súa etapa como voceiro do BNG nos plenos do concello coruñés simultaneou a súa actividade política coa docencia universitaria, especialmente na Facultade de Traballo do Campus de Esteiro en Ferrol. No ano 2014, foi detido e acusado de impedir pola forza un desafiuzamento, sendo condenado ao pagamento de 600 euros de multa e as custas procesuais.[5]
En xuño de 2015, presentou a súa dimisión como concelleiro na cidade da Coruña tralos malos resultados obtidos nas eleccións municipais, nas que o BNG perdeu tres edís e preto de 7 000 votos con respecto ás anteriores eleccións. Xunto a el abandonaron tamén María Xosé Bravo e Marisol Mirás (segunda e terceira na candidatura respectivamente), pasando a ocupar o único posto de concelleiro acadado polo BNG a número catro da lista, Avia Veira.[6]
Obras
[editar | editar a fonte]Individuais
[editar | editar a fonte]- 1999, La Seguridad Social de los trabajadores del mar. Ed. Civitas. ISBN 84-470-1242-5
- 2003, Asociaciones sindicales y empresariales de carácter internacional. Ed. Comares, 2003. ISBN 84-8444-753-7
- 2015, Una cuestión de Derechos Humanos: la protección de Seguridad Social de nuestros trabajadores del mar emigrantes en Noruega. Ed. Aranzadi. ISBN 978-84-9098-055-2
- 2019, La pesca pirata: un estudio jurídico desde la perspectiva del Derecho del Trabajo y de la Seguridad Social. Atelier. ISBN 9788417466541
Notas
[editar | editar a fonte]- ↑ E. Silveira (2010-12-15). "Carril se entrevista con Carril". La Voz de Galicia (en castelán). Consultado o 2017-06-25.
- ↑ Costas, Lui. "Paulo Carril abandona la Secretaría Comarcal de la CIG tras doce años - La Opinión A Coruña". Consultado o 2017-06-25.
- ↑ Pereiro, Xosé Manuel (2004-11-03). "El Ayuntamiento coruñés aprueba usar La Coruña de modo oficial". EL PAÍS (en castelán). Consultado o 2017-06-25.
- ↑ Alberto Mahía (2006-04-27). "Condenados tres militantes nacionalistas por insultar a Francisco Vázquez en un pleno". La Voz de Galicia (en castelán). Consultado o 2017-06-25.
- ↑ Galerías, Paco (2015-05-16). "Un político entre policías". La Opinión de A Coruña (en castelán) (publicado o 15 de maio de 2016). Consultado o 5 de febreiro de 2024.
- ↑ Redacción (2015-06-05). "Carril dimite por "ética e responsabilidade" e Avia Veira será a voceira do BNG na Coruña". Praza Pública. Consultado o 2024-02-05.
Véxase tamén
[editar | editar a fonte]Ligazóns externas
[editar | editar a fonte]- Intervención de Xosé Manuel Carril no Fórum Europa-Nova Economía
- Candidat@s 2011 do BNG Arquivado 06 de marzo de 2016 en Wayback Machine. Arquivo de bng-galiza.org
