Bomba (explosivo)

Para outras páxinas con títulos homónimos véxase: Bomba.

Unha granada de man de ferro coa mecha de madeira, de 1580

Massive Ordnance Air Blast (MOAB), a bomba non nuclear máis poderosa do arsenal estadounidense.

Unha bomba é un obxecto explosivo que libera a súa enerxía moi rapidamente. Esta detonación provoca unha gran onda de choque. A maioría das bombas non conteñen máis enerxía que o combustible común, excepto no caso dunha arma nuclear, pero son moi potentes ao liberar a súa enerxía dese xeito "explosivo". Adoita ser un tipo de recipiente cheo de material explosivo deseñado para destruír cousas e foron usadas desde hai séculos. Algunhas delas arroxan perigosos fragmentos metálicos chamados "metralla" e algunhas son bombas incendiarias.

Os materiais explosivos utilizados na minería funcionan do mesmo xeito, pero normalmente non se chaman bombas.

Etimoloxía

A palabra "bomba" ten unha orixe incerta, mais adoptouse nas linguas románicas peninsulares a partir do francés bombe e do italiano bomba. Estas á súa vez poden derivar do latín bombus, que significa "zunido de abellas".

O termo está relacionado co grego antigo βóμβος (bómbos), que tamén significa "ruído forte" ou "zunido". Bombyliós designaba insectos como moscas ou abellas, e ten unha orixe onomatopeica relacionada co son que fan ao voar. Da mesma orixe son os termos taxonómicos bómbice (de βόμβυξ, bómbux), bombina, bombus e bombinos entre outros.

En varias linguas derivadas do indoeuropeo consérvanse palabras semellantes, como o vocábulo lituano antigo bumbet, que significa "zunido" ou o termo escandinavo bumba, que se traduce como "tambor".

Usos

O seu significado principal como proxectil cargado de material explosivo, ten diversas acepcións; as forzas aéreas envían bombardeiros para destruír obxectivos inimigos. Os terroristas usan bombas en ataques suicidas ou en atentados etc.

Outros usos do termo

A palabra "bomba" ten outros usos:

• Como sinónimo de foguete ou artificio pirotécnico.
• No ámbito figurado, úsase para referirse a unha nova explosiva ou impactante.
• No contexto técnico, refírese a unha máquina que serve para trasfegar, extraer ou elevar fluídos por aspiración ou compresión.

Outros termos derivados

Da palabra "bomba" tamén se derivan outros termos:

• Bombear: impulsar un fluído usando unha bomba hidráulica, e de aí bombeiro.
• Bombardear: botar bombas explosivas desde un avión bombardeiro.
• Bombilla: ampola ou tubo delgado.
• Bombín: sombreiro en forma de fungo.
• Bombacho e bombacha: pantalón ancho.
• Bombo: tambor grande e bombardino (instrumento de vento metal)
• Bombón: chocolate pequeno, ás veces recheo

Véxase tamén

• Arma
• Arma nuclear